Read Mayangna Amós 5 Bible Online

Amós 5 - Mayangna bible

Amós 5

¹Israel balna yang yulki kidika dakanauh, manna mamatna yakat dutni yamnin yultayang kidika dakanauh.

²Israel yaksihni barangni dai kidika bukna, bukna ki watwi bik yaklauwas atnin. Witing alas sauni yakat bukna, dawak muih as bik diski kaldulauna atnin.

³Papang yaklauwi aput yulwi Israel balna yakat: “Tawan nuhni as yaklauwi wār yakat muih tausin as sihwi, dawak muih andat as kamanah sangka nawatwi aiwarang, dawak tawan nuhni as muih andat as sihwakat, salap kamanah nawatwi aiwarang.”

⁴Aput Papang diyulwi Israel balna yakat: “Yang akat aiwanauh kaput laih sangka awanama.

⁵Betel yakat uiwinih, dawakat Gilgal yakat bik uiwinih, Beerseba munah bik bayayakwinih, kat Gilgal kidika sinika dis sau ūk yakat duwi kiuna karang, dawakat Betel kidika laih daukalpamna karang.”

⁶Papang yakat yawanauh dawak sangka ban awanama; kidika awas karangkat witing yaklauwi kuhpau sihwarang, Israel kingni sauni yakat, dawak Betel yakat muih dis karang pini atnin.

⁷¡Alakaih, manna la barangni kaupak tapalhni yakat wirlatamana kidika, dawak muih rahmni kidika bik sau yakat ruhmtalaktamana kidika!

⁸Papang yaklauwi, Pléyades dawi Orión kidika witing yamna, witing yaklauwi puksani kaupak madah yakat wirlawi, dawak madah kaupak pukta yakat wirlawi; witing kuma wasni yakat yulwi, dawak sau minit yakat walamwi; witing yaklauwi tanit parasni yakat daukalnin kidika kalawak kiwi, dawi tanit daknin[8] pāni balna yakat yamwak kiwi. Papang witing ayangni laih kidika ki.

¹⁰¡Alakaih, manna dutni talamana kidika, la kat yamnin tanit dakwa muihni yakat, dawak di rahm talwi yulyang muihni yakat niningkauh dutni kultamana!

¹¹Kat muih minikunni yakat kalmana kau taihtamana, dawak tunan minit yaktamana planinawar minit kidika, kipala kau ū yamnamana yakat sip yalahtas awanama, dawak wain dahnamana yanimak kaupak bik ditas awanama.

¹²Dutmana mahni kidik amanglatayang, dawak dutmana sarandis yamtamana kidika bik, muih la kat yakat taihtamana, alas bik kalyulta dini dakyaktamana, dawak la nuhni muihni yakat muih minikunni kidika yulni dis kalwi.

¹³Kidika bahang angdika muihni sins duwa kidika ap kalwi, kat mani balna kidika dutni bahang.

¹⁴Yamni kidika waltanauh, kauna dutni kidika laih waski, dawak sangka awanama; kaput laih manna yultamana kidika rahm karang: Papang kidika laih parasni nuhni duwi, bahang manna karak ki.

¹⁵¡Dutni kultanauh, dutni kidika! ¡Dalani talnauh yamni kidika! Barangni yamtanauh la muhni yakat, la barangni kidika yamnin; kaput laih sip kat Papang parasni nuhni duwa kidika, Israel balna dauwas yaklalana balna yakat miniknakun ditalwarang.

¹⁶Amput yulwi, Papang parasni nuhni duwa kidika: “Muih kalududuhwa pāni balna bitik yakat kaidinin sakkarang, tapas balna bitik yakat dalani duwi sarahna karang. Yamak muihni balna yakat kulninna buknin diyuyulwarang, dawak kaidayang muihni balna kidika kaidinin karang.

¹⁷Wain yanimak balna kidika bitik kakaidarang, yang diwisna aiwaki mani yakat.” Papang kaput yulwi.

¹⁸¡Alakaih kidika muihni balna Papang mani kidika baina kaiwang atwa balna kidika! ¿Manna amanglatamana kidika mani amput karang kidika? Puksani manah karang ki, madah laih awas karang ki.

¹⁹Sihm muih as layan kalpakwi kira kapat karang ki, dawak bik dangkatakalbas as karang kalpakwak yamaduwi kira kapat karang ki, kidika awaskat muih as ūnipas yakat kiwi kawi itikna yakat taihwak bil kalkaswa kapat bik karang.

²⁰Agha, Papang mani kidika puksani karang ki, madah awaskarang ki, puksani palni karang ki, dawak yaringni apis bik dis karang ki.

²¹“Manna alas dawak, prias satni yamtamana kidika dutni palni talayang, dawak maisihni bik talayang; manna aslah kalpaknin nuhni yamtamana kidika kulnik daukaltamana.

²²Yang ayangki nuhni dulaunin yulni sakripais bustamana kidika dukih yāwaski, plawar minik balna minitdis yatamana kidika bik; turuh almuk binina salalani, watwi kulnin aslah kalahnin yulni sakripais bustamana kidika bik dutas awaki.

²³¡Yang yaihkit kaupak naikau alahwanauh, unbauta sarahtamana kidika bik! ¡Ark pastanang bin yamwa kidika dakakih yawas ki!

²⁴Kaunah la kat yamnin kidika kalahwang was kapat, dawak muih kulnin yakat dutni dis kidika was burhwi kalahwi laihwatwas kapat kawang.

²⁵“Israel balna, ¿kauhmak wanilang pasyakat kurih muihasluih bu bang atnamna pasyakat manna sakripais dawak minitdis dini kidika yanamana dai kapat?

²⁶Waradika laih, manna kingmana Sicut[9] kidika truknamna ki, dawak yalani Quiyún kidika bik, dawan dauh wayani manna silp yamnamna kidika.

²⁷Sau ūk yakat manasihting yawanama, Damasco tanit yakau.” Papang yulwi, witing parasni nuhni duwa kidika laih witing ayangni.