Read Mayangna Amós 6 Bible Online

Amós 6 - Mayangna bible

Amós 6

¹¡Alakaih, kidika muihni balna Sayan yakat wark yudutni manah yayamwa kidika! ¡Alakaih, kidika muihni balna Samaria yakat kulninna kalalawa kidika, dawak sau balna yakat tatuna nunuhni balna kidika Israel yakat uiwa kidika bik!

²Calne yakat yawa talnauh, kidika munah bayakyawanauh Hamat nuhni yakat, dawak filisteo balna panina Gat yakat lakwa yawanauh. ¿Manna kauh tanit yamni manakatpa, kidika sauni karak dawakat? ¿Manna saumana kidika kauh tanit yamni yah, witingna saunina karak dawakat?

³Manna kulkih manawaski ma dutni kaiwarang yakat, kauna dutni nuhni kidika laih yaihmatna yakat duaitamana.

⁴Pa yaksasihn yakat alangwamana, dawak alasna nuhni yamta sīp binina kidika ita kastamana, dawak turuh ahalmuk salalani kidika balna bik;

⁵puhnin dini sip-awas mana bik putamana, Devid yamwa dai kaput, unbaunin dini satni manas kalyakwi yayamwi:

⁶Sutak nunuhni kau wain wasni kidika didiwi, dawak walapni kalkakahwa kidika bik tanit yamni kidika kalkakahwi, ¡tawan daukalna sak-adika laih kukulwas ki!

⁷Manna kidika tatuna yawanama ki kauhmak wanilang yakat, dawak di kasta alasna dutamana kidika bitik laih dahn kalwarang.

⁸Papang witing alas ayangni kau yakwi yulna, witing parasni nuhni duwa kidika aput yulwi: “Jacob tawanni witing manah kapat kaldakawa kidika dutni kaltalayang; uni nunuhni yamna balna kidika talkih yawas ki; adika tawanni nuhni laih waihla tingni yakat ana awaki, paskau di balna bangkidika bitik kau.”

⁹Kaput laih, ū as pasyakat muih ahal salap wawatwarang kat, salap kidika bitik dadauna karang.

¹⁰Yamadangni kidika nuhni palni karang, muih as witing wanaihni dauna kat dulauwi ūpas kaupak yakkuhtik,[10] muih ūk ū paskau likyakat kalyulwarang: “¿Muih ūk as man karak likyah?” As kidika yaklauwi yulwarang, “Dikah.” Dawak tatuna dai kidika yulwarang: “¡Ap awah, pini kat Papang ayangni yulma!”

¹¹Kat papang yaklauwi wah kalawak kiwarang ki ū nunuhni balna minitna yakat, dawak ū binina balna minitna yakat bik, dawak bitik laih daukalmukna karang ki.

¹²¿Aras balna kidika sipyah kipala nunuhni balna kidika minit munah kilwi yaklanin? ¿Sipkat pah, kuma pasyakat sau tuknin kapat tukna atnin? ¡Manna lawa la kat yamnin kidika puisin yakat wirlanamana, kaput bik la kat minik yakna kidika tapalhni yakat wirlana mana!

¹³Manna dauh palni alasna duta yultamana: “Mayang alas maparaski munah parasni nuhni kidika dunamayang.”

¹⁴Israel balna manna yamni talnauh; Papang parasni nuhni duwa kidika yulwi: “Yang dulauki muih buas manna namangna yakat, manalaihwi manawiwirna karang yamni palni, wadah niningkauh sutni kaupak, tingpal niningkauh sutni nakas kat.”