Read Mayangna Amós 7 Bible Online

Amós 7 - Mayangna bible

Amós 7

¹Adika Papang yaklauwi nikingkana: Di dahna balna kidika mahka ukuswi kalahwa yakat, kidika laih witni kau dadahna balna dai kidika, bahang kidika laih king dini kidika bahwi dulauwak usnit yakat dadahwi, bahang yang talnayang dai Papang yaklauwi sisin balna kidika yamwak talnayang.

²Sisin balna kidika dibasta balna bitik kasmumukna witni kau bayakna duldul dai yakat kakaswa yakat, yang yulnayang: —¡Papang dutkina datang diswang! ¿Man tawanma Jacob kidika amput sip karang yah, witing dibin kidika?

³Papang yamnin kulna dai kidika kaupak dapamwi, aput yulna: —¡Adika kaput laih kalahwas karang ki!

⁴Adika Papang nikingkana: Talnayang wah as sihwakat, kuhpau, bahang kuma tuhni nuhni kidika bitik laih buhlakna dai, dawak asangpas balna bik laih dahn kalwasakdai.

⁵Yang yulnayang: —¡Papang, laihwatta plisma! ¿Man tawanma Jacob kidika amput sip karangyah, witing dibin kidika?

⁶Papang yamnin kulna dai kidika kaupak dapamwi, aput yulna: —¡Adika bik kaput kalahwas karang ki!

⁷Papang adika dini bik nikingkana: Witing daklana as yaihnit yakat yaklauna sakdai, dawak tingni yakat plum as duwa sakdai, simint dau ū yamwi yusyayamwa dini kapatnah.

⁸Dawak yayulwi dakana: —¿Amós, man ais talamanh? Dawakat nangnitlanayang: —Plum as. —Adika plumni kau yang tawanki Israel kidika kultik talki ki, witing ampus barangni kidika. Wat as bik dutni dating diswas karang ki baisa minit yakat.

⁹Isaac pāni maisihni dis balna kidika bitik laih daukalmukki, dawak Israel minit yulwa uni balna kidika bitik laih daukalna karang. ¡Jeroboam sulani balna niningna yakat isparah dulauki!

¹⁰Betel sumalniyang nuhni Amasías yaklauwi sihna, Israel kingni Jeroboam yakat kalyulna atnin: “Amós dai kidika Israel balna pasyakat likki, bahang man namangkauh yaklaunin yamwa likki. Adika sauni muihni balna adika baisa sip wawauhwas ki, yul yulwalik kidika.

¹¹Bahang yakat yulwa likki: ‘Jeroboam kidika isparah kau dauwarang ki, dawak Israel muihni balna kidika bitik laih sau ūk yakat laihwi duwi uina karang ki.’ ”

¹²Usnit kat, Amasías yaklauwi Amós yakat pakna: —¡Akaupak naikau yawah, prapit! Man sumaltaman kidika kaupak di yakta dunam kat Judá sauni yakat yawah:

¹³Di kalahwarang dini balna kidika baisa yulwinih Betel akat, kat king pāni maisihni dis as bahang, dawak bik king kawa sauni akat makat yulnin uni tanit nuhni kulna kidika sakbahang.

¹⁴Kauna Amós yaklauwi nangnitlana: —Yang prapit awasyang, dawak bik prapit kalnin bik kultas yang kulnik yakat. Yang dukih yawa balna kidika yaktik dutayang sīp maintalna, dawak ani damni asangpas kau bahang kidika minik waltik[11] bik,

¹⁵kauna Papang yaklauwi sīp maintalayang dai kidika kaupak yadakyakna, dawi yayulna: ‘Yawa yang ayangki kau yakta yultah, tawanki Israel yakat.’

¹⁶Kaput bahang Papang yulni kidika dakah. Adika man yultaman: ‘Papang ayangni kau yakwi di as bik yulwinih, Israel niningyakat, dawak bik Isaac sulani balna niningna yakat bik di as bik yulwinih.’

¹⁷Kauna adika Papang yulwi: ‘Man yalma kidika al suhlsuhl kalahwarang, tawan nuhni pasyakat, dawak walamabis ahal, dawak yayal balna kidika bik isparah kau dadauna karang; dawak sauma kidika sahyakwi duduna karang, suerte kau ruhmwi talwi; man laih Papang kulwas balna saunina yakat daunaman karang, dawak Israel balna kidika sau ūk yakat duwi uina karang, man sauma kaupak naikau.’