Read Mayangna Amós 8 Bible Online

Amós 8 - Mayangna bible

Amós 8

¹Papang yaklauwi adika nikingkana: Di punin dini as yakat, di minik lalahna balna kat puna bangdai,

²dawak witing yayulwi dakana: —¿Amós, man ais talamanh? Dawakat nangnitlanayang: —Di punin dini as. Dawak, witing yaklauwi nangnitlana: —Di minik lalahna balna buas punin dini as kau puna sakki. Dawak Papang yaklauwi yayulna: —Uman Israel kidika lalahna; watas bik dutni kidika dating diswas karang ki.

³Kidika mani king ūni yakat unbabauwa kidika, kaidinin yakat wirlana karang ki. Muih mahni laih dadauna karang ki, ap ahni yakat ruhmyayakna karang ki. Papang yaklauwi kaput yulwi.

⁴Adika dakanauh, manna muih kulninna yudutni balna yakat taihtamana kidika, dawak adika sauni muihni balna miniknakunni balna yakat di daukaltamana kidika;

⁵manna yultamana: “¿Waiku wisamni alasnina kidika mampat kat bayakwarangyah; kaput dawak mapakwarang ki minik balna kidika wauhwi bakanna atnin? ¿Mampat bayakwarangyah yakurupdinin mani,[12] bayak dawak mayang maplawarki minik adi bakanna atnin, dawak, paun kau bik ditaihna atnin?

⁶¡Muih miniknakunni kidika daukalmukdarang, dawak witingna silp muihnina kalbakkanwarang, trasnina kidika launa atnin yulni, trasnina kidika dibin sus as minit karang bik! ¡Plawar unitak balna bik dibakandarang!”

⁷Papang kidika Jacob alasnina yaksihni kidika kau yakwi yulna: “Dikitkahwas karang witingna yayamna kidika.”

⁸¿Adika yulni sau kidika isihwas karangyah? ¿Kidika muihni balna witingna bitik kakaidas karangyah? ¡Sau kidika dulauwi lakwi awarang, sihm Nilo wasni kilwi yaklakwi awa kapat!

⁹Papang yulwi: “Kidika mani, yamtingkat matunak dawa yakat ma kidika yakmaldana karang,[13] dawak madah palni yakat kalatingkat, sau adika puksani manah kalahna karang.

¹⁰Alasna kidika wirlana awaki kaidinin yakat, dadauna kidika yulni, dawak unbabauwa kidika, dauna laniwana kidika unbabauna karang; yamting kat manna kidika kulnin bukna asnina kat āwanama, dawak tunamana kidika kusta salaini datanama, dalani wauhtamana kidika yulni. Kakaidarang, wais kat walanibis aslah duwa kat disna kat kaida kapat, dawak di bitik kidika tapalhni manah kalna karang.”

¹¹Papang yulwi: “Mani balna kaiwi, kidika yakat, yuh sihkiki sau yakat; kasnin dini dis atnin laih awaski, dawak bik was dis dawarang laih awaski, kauna yuh diawarang kidika laih Papang yulni kidika dis karang ki, dawak dakakih diawarang.

¹²Muih balna kidika pini tulutulu karang pa balna yakat, Papang yulni walwi, uiwarang kuma as kaupak kuma as kat, dawak tingpal nining kaupak ma kilwa nining yakat uiwarang kauna witingna sip yayakwas karang.

¹³Yayal sirarau yayamni, wawahma yayamni kulninna parasni kidika sangka dauwi bubukwarang, dukih diawakat, kidika mani.

¹⁴Samaria daniwan dauh balna ayangnina kau yakwi yuyulwi kidika aput: ‘Dawan dauh sangnika kau, Dan’, ‘Beerseba daniwan dauh balna sangnika kau’, witing bubukna karang watwi yaklaunin-awas.”