Read Mayangna Números 10 Bible Online

Números 10 - Mayangna bible

Números 10

¹Dawan yaklauwi Moses yak aput kalyulna:

²“Trumpit bu yamtah lalah kau, amar kau tista yamtah, bahang kidika kau duta puhtang kat muih kalududuhwarang dawak diyulna mahka lapaknin kidika.

³Trumpit bupak pupuhwarang kat muih balna bitik kalududuhwarang, kalpaknin ūni labanni, man muhma tani yakat.

⁴Kaunah trumpit kidika aslah puhwarang kat, sulani balna taninatuna manah kalududuhwarang.

⁵Trumpit kidika puhwak, muih balna bik parasni sarahwarang kat, ma kilwa nining kauh muih ban kidika mahka lapapakwarang,

⁶dawak watbu puhwarang yakat laih wadah niningkauh watwi ūnina labanni papakna bangkidika yaklauwi lapapakna karang. Trumpit puhwi sararahwarang kidika laih yaklauwi lapaknin sainni karang.

⁷Dauhmanah puhwarang kidika laih muih balna kidika kaluduhnin sainni karang.

⁸Trumpit puhnin muihni balna kidika laih sumalyang balna karang, Aarón sulani balna. Adika laih manna yakat lā as ban kaput atnin karang.

⁹“Manna saumana kat, waihmanala kidika kaiwi manakalbauwakat, alahwa kalbaunamna barang kat, trumpit puhta parasni bik sarahtanama. Kaput laih, yang Dawan manna Papangmana yang adika, manna yakat isingkatwak, waihmanala tingni kaupak manalaihtik yakki.

¹⁰Trumpit puhtanama alasna mani kat, waiku wisam kalahwa mani, dawakat, busnin dini duaitamana kapat Papang nining kau, dawak biri biri dutmana datanang dima yulni busnin dini bustamana kaput mani balna yakat trumpit puhtanama. Kaput laih isingpuk karang manna yakat. Yang kuduh Dawan manna Papangmana.”

¹¹Kurih bu laihwi bayakwi minit yakat waiku bu, kidika kaupak ma muihasluih laihna yakat, mukus kidika mahka yaklauwi kiuna, Papang pāni holi kidika minit kaupak.

¹²Israel balna mahka lapapakna dai Sinaí kauhnimak wanilang kaupak. Mukus kidika kiwi laihwatna dai Parán kauhnimak wanilang yakat.

¹³Dawan yaklauwi Moses yakat kalyulna kaput,

¹⁴tatuna, kalbauyang balna uina kidika laih, Judá planikin dinit kau lapapakwa balna dai kidika, taninatuna laih Naasón, Aminadab walanibis.

¹⁵Isacar sulani kalbauyang balna kidika, taninatuna duwa kidika laih Natanael, Zuar walanibis.

¹⁶Zabulón sulani kalbauyang balna taninatuna laih Eliab dai, Helón walanibis.

¹⁷Kaput laih Papang ayangni nuhni yamnin pāni kidika dudutna, Gersón dawi Merari sulani balna, usnit kat mahka trukwi duwi uina.

¹⁸Kidika usnit kat, kalbauyang balna Rubén planikin dinit kat lapapakwa balna kidika uinadai, taninatuna laih Elisur, Sedeur walanibis.

¹⁹Simeón sulani kalbauyang taninatuna laih Selumiel, Zurisadai walanibis.

²⁰Gad sulani kalbauyang balna taninatuna laih Eliasaf dai, Reuel walanibis.

²¹Kidika usnit yakat Coat sulani balna uina dai, yusyamnin Dawan dini balna duwi uinadai, uiwi wawatwa kat, Papang ayangni nuhni yamnin pāni yamwi dadana awadai.

²²Kidika usnit yakat Efraín muihni kalbauyang balna planinakin dinit yakat lapapakwa uiwadai, taninatuna laih Elisama, Amiud walanibis.

²³Manasés sulani kalbauyang balna taninatuna laih Gamaliel, Pedasur walanibis.

²⁴Benjamín sulani kalbauyang balna taninatuna laih Abidán, Gedeoni walanibis.

²⁵Witni yakat, kalbauyang ūk kalna dangnitna yakat, uiwa bangdai Dan planikin dinit yakat lapakwa balna kidika, taninatuna laih Ahiezer, Amisadai walanibis.

²⁶Aser sulani kalbauyang balna tanina tuna laih Pagiel, Ocrán walanibis.

²⁷Neftalí sulani kalbauyang balna taninatuna laih Ahira, Enán walanibis.

²⁸Israel muihni kalbauyang balna, mahka lapapakwarang kat, aput laih uiwadai.

²⁹Ma askat Moses yaklauwi daini Hobab, Reuel madianita muihni walanibis yakat aput kalyulna: —Yang adika sauni kaupak mahka yawayangna, Dawan yaklauwi pa as yananin yulna pāni yakat. Yangna karak aiwah, yamni mayamtanaki, kat Dawan yaklauwi yulna Israel yakat dalani kaltalna atnin.

³⁰Hobab yaklauwi nangnitlana: —Dikah, yang sauki yakat nawattik yawakih yawi, wanaihki balna bangyakat.

³¹Moses yaklauwi kalyulna: —Kiwinih. Kauhmak wanilang pasyakat watwi payahnin pāni pa pakkidika yamni amanglataman, man sipman ta nikingnakanam.

³²Yangna karak yawanama kat, Dawan yaklauwi, di yamni yanawarang kat, manyak bik matanaki.

³³Kaput laih, Dawan asangni kaupak kalahwi, ma bās lapapakna. Lā baksni Dawan dini kidika witingna tanitna yakat kiuna dai, yakurupdinin pāni as walwīnah.

³⁴Ma payahlawak mahka lapakwi uiwakat, Dawan mukusni kidika witingna minitna yakat kiwa dai.

³⁵Lā salap kuringni kidika mahka duwi uiwak, Moses aput yulwa dai: “¡Dawan, lawah! ¡Waihmala balna ruhwi kalahwang! ¡Dutni makukulwa balna kidika matalwi kikirang!”

³⁶Kaunah lā salap kuringni kidika watwakat, Moses aput yulwadai: “¡Dawan waralaih nawatta aiwah Israel kalbauyang muihni mahni pasyakat!”