Read Mayangna Números 14 Bible Online

Números 14 - Mayangna bible

Números 14

¹Israel balna parasni sararahna dai, kidika puknita kaidi payayahna.

²Witing bitik laih, Moses dawi Aarón yakat dutni diyuyulna. Bahang aput yuyulna: “¡Kau yamni dai Egipto yakat daunin, kidika awaskat, kauhmak wanilang akat daunin dai!

³¿Ais yamwi Dawan adika sauni akat maiduaina yah? ¿Kalbauwi dauna atnin, dawakat mayalki balna, mawalakibis balna kidika waihla tingni yakat bukna atnin? ¡Kau yamnin karang Egipto yakat nawatwi kiuna atnin!”

⁴Biri biri yulwi babauna: “¡Matakituna as adi Egipto yakat nawatdi mawang!”

⁵Moses dawi Aarón karak limbabahwi muhnina sau kat lalakna dai, muih bitik muhnina tani yakat,

⁶dawakat Josué dawi Caleb karak, witingna uiwi sau kidika awaihwi tatalna dai kidika, praknina iswi bibisna, kalanin ahawa kidika bik, dalani duduwa kidika yulni

⁷dawakat Israel balna bitik yakat diyuyulna: —¡Yawik sau talna yangna kidika, uba yamni ki!

⁸Dawan mayang karak karang kat matingkisut laihwak kidi sauni mahawarang, dawakat mayana karang. Sau as, kidika pāni laih, tāwas dawi amak kidika was kapat biri.

⁹Kaunah manna Dawan niningkauh yaklalauwinih, kidika muihni balna niningna yakat yamaduduwinih, kat witingna laih mayang makasnik dini kalwarang ki; witingna laih muih as bik nanitna dakwas karangki, kaunah mayang laih, Dawan kidika mayang karak ki. ¡Yamaduduwinih!

¹⁰Kaunah muih balna kidika, mahka, kipala kau bahrnin yayamna. Kidika minitni Papang alasnina nuhni kidika, kalpaknin ūni labanni yakat lāih kalahna, muih bitik miniknapa yakat,

¹¹dawakat Dawan yaklauwi Moses yakat kalyulna: —¿Mampat kat dauh yakulwa kidika dawarang yah, adika tawanni? ¿Mampat kat kulninna kau rahm yakukulwas kidika dadawarang yah, witingna pasningna yakat paraski niningna kanayang bik kaput yayamwa kidika?

¹²Siknis as dutni sihtingkat, sip awas kalalahwarang, kidika sauni yakat uiwi pa duna atnin; kaunah man kaupak tawan nuhni as yamkiki, dawakat kau parasni, witingna karak dawakat.

¹³Moses yaklauwi biri nangnitlana Dawan yakat: —Man parasma kau, adika tawanni yaknaman, Egipto kaupak. Man yamna kidika Egipto muihni balna dakakawarang kat,

¹⁴Canaán muihni balna yakat diyuyulwarang. Witingna bik diyuyulwak dakakana, Dawan man laih, adika tawanni pasyakat man kidika, biri biri muhmana kaltalamana dawakat mukusma kidika witingna minitna yakat kidika, dawak madah yakat witingna tanitna mukus as karak yawaman dawak pukta yakat laih kuhpau as karak yawaman kidika.

¹⁵Adika muihni balna bitik imukma kat, tawan ūk balna man ayangma nuhni dakakawa kidika yuyulwarang:

¹⁶‘Dawan sip awas kalahna adika tawanni kalawak kana atnin, sau dianin diyulna pāni dai yakat, kaput bahang, kauhmak wanilang yakat imukna.’

¹⁷Kidika bahang, Dawan parasma nuhni kidika niningnakatah, man yulnaman kaput. Man yulnaman

¹⁸sirihni palni kulnam daukalwas ki, dalani lani dutaman kidika nuhni palni ki, dawakat muih dutni yamwa kidika datang diswi, dutni kalkultas man, kaunah wah kalatasman laih awas ki dutni, yamna kidika, papangnina dutni yayamna kidika, walaninabis kat bik wah diataman, munina, buhnina kau tanitna yakat.

¹⁹Dalani lani kidika man nuhni dutaman, adika tawanni muihni balna dutnina datang diswang, kat man kulnam laihwatnin lani kidika dunaman Egipto kaupak, adika pāni kat.

²⁰Dawan yaklauwi nangnitlana: —Yamni ki, man yayultaman kaput, dutnina dating diswi.

²¹Kaunah rahm kidika laih, sangkayang, yang alaskina kidika sau minit yakat buhngki,

²²yang alaskina tatalna muihni balna kidika, Egipto pāni yakat muih al di yamwas dini yamting tatalna muihni balna, kauhmak wanilang yakat yamnayang kidika, dawakat wat, wat traikitatalna balna kidika, dawakat yang yulki dakawi yamwas muihni balna kidika,

²³witingna as bik muihni bararak balna kau sau dianin yulna yang kidika tatalwas karangki. Dauh yakulna muihni balna bik tatalwas barang.

²⁴Yang diki yamyang Caleb manah kulnin satuk duna, yang yulki kat dakana, dawakat yang niking yakat barangni ki. Kidika bahang witing manah dating kawarangki, kiwi awaihwi talna sauni yakat, dawakat sulani balna bik yakat panina duduna karang.

²⁵(Amalecitas dawi, cananeo balna laih, walang yakat yalalahwi.) Manna laih yahan mani kauhmak wanilang munah awaihtanauh, Kuma Pauni nining yakat.

²⁶Dawan yaklauwi, Moses dawi Aarón yakat diyulna:

²⁷—¿Ampus wauhnik yah Israel dudutni balna, uba yul pāni manas yuyulwa kidika? Yang ayangki dutni yuyulwak dakanayang.

²⁸Yawa aput diyulta yatah: ‘Yang, Dawan, yang sangkika kau yaktik yultayang, yang kau ampus dutni yulnamana kaput kalating manakalahwarang ki.

²⁹Kurih muihasluih kaupak minitkau duwa balna, ayangnina āwi kulna kidika balna yang kau dutni yuyulna kidika bitik dadauwarang, dawakat muihnina kidika pāni kauhmak wanilang yakat ruhmwi dana karang.

³⁰Caleb dawi Josué karak laih awaski, manna laih as bik kidika sauni mananik pramis yamnayang yakat āwas awanama.

³¹Kaunah walamanabis balna, manna yulnamana, waihmanala balna tingnina yakat bubukwarang ti yulnamana kidika, duyawaki ki, want awas datanama pāni yakat bahang witingna laih alasna duduna karang.

³²Dautanangkat muihmana kidika pāni kauhmak wanilang yakat ruhmwi danakarang,

³³kidika yakat walamanabis balna yalahwi sīpnina maintatalwarang, kurih 40. Manna barangni awasmana dai kidika yulni, witingna kaput minit lalauna karang, manna bitik kauhmak wanilang yakat dautanama.

³⁴Manna ma muihasluih bu awaihta talnamana kidika sauni, kidika kurih muihasluih bu wah dutanama: ma as kidika kurih as kulnakarang. Kaput laih manna amanglatanama, aispa yang niking yakat yaklaunin kidika.’

³⁵Yang, Dawan yang adika, yultayang: Kaput diyamki ki muihni dudutni balna adika, kalpakwi niking yakat yaklalauna. Adika kauhnimak wanilang akat dadauna karang.

³⁶Moses yaklauwi, ahal sihna dai kidika, pa awaihwi talnin, witingna aiwi dutni manah yuyulna, kaput laih muih balna bik dutni yuyulna dai, bahang kidika balna Dawan yaklauwi imukna dai.

³⁸Kidika balna bitik dadauna kaunah pasyakat Caleb dawi Josué karak manah yaklalana.

³⁹Dawan yulna dai kaput, Moses yaklauwi Israel balna yakat diyulwak, kulninna bukna dai.

⁴⁰Payahwak mapiris yaklauwi, asang tuna yakat iluiwi dawi yuyulna: —¡Uman akat bangmayang! Dawan yaklau pa mayamnin yulna dai yakat mawanang, kaunah rahm dutni yamna mayang.

⁴¹Kaunah Moses yaklauwi diyulna: —¿Amput dawak Dawan yulni bayakta yamtamanah? ¡Yamtamana kidika dutni alahwanama!

⁴²Tamatna yakat baisa uiwinih, Dawan manna karak awaski. Waihmanala balna manaihiwarang.

⁴³Tamatna yakat, amalecitas dawi cananeo balna tamana tahahawi, manakalbaunin manaīna atnin. Dawan kidika ruhmta danamana bahang, witing manna karak awaski.

⁴⁴Kaunah, witingna laih asang mayakat kilnin yayamna dai; kaunah Dawan lani baksni kidika dawak Moses bik ū labanni kaupak kalalahwas dai.

⁴⁵Amalecitas dawi cananeo balna karak kalahwi Israel balna yakat uiwi uina, Horma pāni kat bitik bubukna.