Read Mayangna Números 15 Bible Online

Números 15 - Mayangna bible

Números 15

¹Dawan yaklauwi Moses yakat kiwi aput kalyulna:

²Israel balna yakat aput diyultah: Manna pa manaki yakat yawa awanama kat,

³turuh almuk as dawak sīp as yatanama, yang ayangki nuhni usnit yaka sakripais karauni kauna busna atnin yulni, kidika awas kat, minit dis kalanin di as karangpa, kidika awaskat alasna mani as karangpa,

⁴muih dutni dis yamnin yulni buswarang kidika, minityakat plawar kilo bu dukiwi disala karak, yamni banawi laihna karang.

⁵Kidika minit yakat, muih dutni dis danin yulni busnin duwi kiuna kidika, sīp as bitik wain batal karak libitna karang, yuldarangkat sīp yapak dukiwarang kat wain batal kaput dukiwarang ki.

⁶Muih dutni dis yamnin busnin dini kidika sīp almuk karang kat, plawar kidika kilo arungka karang dawakat disala kidika laih batal as minitkau karang

⁷dawakat wain kidika litro as minit kau karang, minitdis kalanin dini as walapni atnin yang niking yakat.

⁸Muih dutni dis yamnin busnin dini kidika turuh almuk bin karangkat, dawakat buswarang kidika biri, biri dutnina dadawak diswak yamnin kalahnin yulni karangkat, kidika awas kat pramis as barangni yamnin yulni karangkat,

⁹minit yakat lakna karangki plawar kilo tiaskauas, dawak disala batal bu, yakarak banawi laihna karang,

¹⁰baisa minit yakat, wain batal bu kidika laih busna walapni as yang diki.

¹¹Kaput yamna karang, turuh almuk, sīp almuk, sīp bin, dawakat kuts kidika balna duahaiwarang kidika.

¹²Tinglau as duaiwarang kidika, minit dis kalanin dini bitik libitwi duaiwarang ki, tinglau yapak duaiwarang kat kaput duaina barang, minit dis kalanin dini kidika.

¹³Israel balna bitik yayamwarang ki adika lani, witingna minitdis kalanin dini, busnin walapni as duwi aiwarang kat yang yakat.

¹⁴“Pa ūk naikau kaina muihni as karang kat, sirihni bayakkiwalik karangpa, kidika awaskat pāni yakat yalahwa karangpa kat, witing minitdis kalanin dini yang akat duaiwi walapni yamni as busnin kulwarangkat, manna amput yamnin manayulnayang kaput yamnakarang ki.

¹⁵Kidika lani kaput manna bitik kau yamtanama, pa naikau aiwa muihni balna bik, adika lani ban kaput karang walamanabis balna kau bik.

¹⁶La aslah karang manna, dawak pa naikau muihni balna bik.”

¹⁷Dawan yaklauwi Moses yakat aput kalyulna:

¹⁸“Israel balna yakat aput diyulta: Manaduyawaki pāni yakat yawa awanama kat,

¹⁹alasmanana dutanama kidika pāni kaupak di minik yakwa kidika kaupak, diminik balna kidika kaupak, buas yakta yanamna karangki.

²⁰Di minik balna unitak yakta, yang akat apis yatamana kaput, manna tatuna plawar laihtanama kidika kaupak apis yakta, minitdis kalanin as yatanama, plawar busna kau.

²¹Minit dis kalanin dini kidika ban kaput yamtanama.

²²“Moses yakat yamnin kalyulna yang balna kidika sip yamtas danamana karang kat, kaunah yamtas dana mana kidika ting yamtas danamana awas karang kat,

²³sirihni palni yamtanama manna sulamana bitik kalpakta, bahang aput yamtanama:

²⁴“Yamtas danamana kidika ting yamtas danamana awas karang kat, muih bitik kaput yayamna karang kat, tawan bitik, turuh almuk bin as busnin duaitanama, yang niking yakat busnin walapni as kapat kidika minityakat duaitanama di minik, dawakat wain bik duaitanama, Papang yulna kaput, kidika minit yakat kuts almuk as duaitanama busnin kidika laih muih maisihni dis yamnin yulni.

²⁵Usnit kat sumalyang yaklauwi prinias yamna karang Israel balna bitik dutnina dawak disna atnin yulni, kaput laih yang lawik dutnina dating disnakarang, kat yamwas dadana kidika ting yamwas dadana awas bahang dawakat witingna minit dis dianin dini kidika duahaina bahang dutnina dis yamnin yulni.

²⁶Yang lawik Israel balna bitik dutnina dating diswarang dawakat pa ūk muihni balna Israel balna pasningna kau yalalahwa balna bitik, dutni yayamna kidika isningna aiwas yayamna karang kat.

²⁷“Isning aiwas dutni yamna karang kat muih asla, adika muihni kuts as duaina karang, kurih as duwa kat busnin, witing dutni kidika disyamnin yulni.

²⁸Sumalyang yaklauwi prinias yamna karang dutni disnin yulni, kaput laih yang lawik dutni dating disna karang.

²⁹Adika lani Israel balna, dawakat Israel awas balna pasmangna yakat yalalahwa balna bik papatni kukulna karang, isningna aiwas dutni yayamna karang kat.

³⁰“Kaunah muih as talwinah dutni yamna karang, yang niking kau dutni yamna, Israel muihni kidika awas kat Israel muihni awas karang bik. Kaput laih kidika muihni laih dauna karang, wanaihni balna pasningna kaupak,

³¹kat yulki balna kidika dauh kulwi yamwas dana bahang; dakwi yakna karang, dutni kidika witing alas trukna karang.”

³²Israel balna kauhmak wanilang kau bangdai mani yaka, muih alas kuh walwa likkat tatalna dai yakurupdinin mani.[12]

³³Kidika alni laihwi duwi uina, Moses muhni yakat, Aarón muhni yakat, dawakat, tawan bitik muhni yakat bik,

³⁴maintatalna dai kidika alni, kat witingna amanglalawas dai dis kalyamnin kidika.

³⁵Dawan yaklauwi Moses yakat kalyulna: “Adika alni laih daunin yakat wiryaklana atnin ki. Israel balna bitik kau kipala duwi babahrna karang, kidika alni yakat, tawan paskaupak yakwi.”

³⁶Kaput laih Israel balna yaklauwi, kidika alni tawan paskaupak yakwi kipala kau barhwi ihina dai, Dawan yaklauwi Moses yakat kalyulna kaput.

³⁷Dawan yaklauwi Moses yakat kiwi aput kalyulna:

³⁸“Israel muihni balna yakat adika diyulta: Manna sulamana balna bitik, prakmana sutni yakat mamasni duyawanama. Kidika mamasni laih sangni karang.

³⁹Kaput laih, mamasni kidika talnama kat, yang lā mananayang kidika ismangna aitanama, dawakat yakat yamtanama, manna alas kultamana yakat yamtas awanama, dawakat dukih manawa yakat bik yamtas awanama, kaput laih yang niking yakat barangni awanama.

⁴⁰Kaput laih yang laki balna bitik yakat kulta yamtanama yang diki manah yamtanama, Papangmana yang bahang.

⁴¹Yang kuduh Dawan, manna Papangmana, Egipto kaupak manayaknayang kidika, manna Papangmana atnik yulni. Yang kuduh Dawan manna Papangmana.”