Read Mayangna Números 17 Bible Online

Números 17 - Mayangna bible

Números 17

¹Dawan yaklauwi Moses yakat kiwi aput kalyulna:

²“Israel sulani balna, taninatuna duduwa balna bitik yakat diyultang kat tulna as as duahaiwang, yuldarang kat bitik kat tulna salap minit kau bu karang ki. Tulninanah bitik yakat ayangni ulna,

³dawakat leví sulani balna tulninah kidika Aarón ayangni kau ulna, sulani bitik tulna as as karang ki.

⁴Kalpaknin ūni yakat uita lakna, Papang kuringni muhnit tani yakat, kidika pāni yakat manna karang kalpakta yang.

⁵Yang waltik yaknayang muihni tulninah kidika kalating kat udungna karang, kaput laih Israel balna manna yakat dutni manayuyulwas karang, yang muhki yakat.”

⁶Moses yaklauwi, Israel balna yakat diyulna, tatuna muihni balna bitik, tulna duwi uina, kaput laih bitik kat tulna salap minit kau bu uduhna dai. Kidika pasyakat Aarón tulninah bik tusdai.

⁷Moses yaklauwi tulna balna kidika Dawan muhni tani yakat lakna dai, kalpaknin ūni yakat,

⁸dawakat payahwak kiwi talna, kalpaknin ūni yakat, bahang Aarón tulninah laih udungna dai, bahang kidika laih Leví sulani dai bahang: dawakat udungwi puluna dai, kaput laih almendras minik yakna dai.

⁹Kaput laih Dawan talwa sakkat tulna balna kidika bitik yakna dai Moses yaklauwi, yakwi Israel balna yakat niningna kana. Bitik tatalna usnit kat, bitik tulninanah duduna dai.

¹⁰Watwi Dawan yaklauwi Moses yakat kalyulna: “Watwi, Aarón tulninah kidika la baksni muhnit yakat uiwi lakwang, kidika pāni yakat apaktang tuskawang, tawan kulninna dutni kidika balna niningkana atnin as kaput. Kaput yamtangkat yang muhkit tani yakat dutni yuyulwa kidika dadawarang, dawakat dadauwas karang.”

¹¹Dawan yaklauwi Moses yakat amput kalyulna kaput yamna dai,

¹²kaunah Israel balna Moses yakat aput kalyuyulna: “¡Bitik laih disnamayang! ¡Bitik daudarang ki!

¹³Dawan ayangni nuhni yamnin pāni yakat uiwa kidika bitik dadauwi. ¿Kaput laih bitik daudarang katpah?”