Read Mayangna Números 2 Bible Online

Números 2 - Mayangna bible

Números 2

¹Dawan yaklau aput diyulna Moses dawi Aarón yakat:

²“Israel balna laih kalpaknin ūni labanni kidika kaupak apis nailuih kau ūnina labanni pakna atninna ki, planinakin dinit kat kat, dawak bik wanaihnina balna kat kat.

³“Ma kilwa niningkauh yakat ūnina labanni papakna karang Judá muihni kalbauyang balna planinakin dinit kau lapakwi aiwa kidika. Judá sulani kalbauyang balna tanina tuna kidika laih Naasón, Aminadab walanibis.

⁴Ayangni āwi kukulna yakat kalahna kat muih ahal manah 74,600 dai.

⁵Witingna yaihnitna yakat Isacar sulani kalbauyang balna kidika ūnina labanni papakna karang, witingna tanina tuna laih Natanael, Zuar walanibis.

⁶Ayangnina āwi kukulna yakat kalahwi, 54,400 muih ahal.

⁷Zabulón sulani kalbauyang balna kidika yaihnitna yakat ūnina labanni papakna karang, witingna taninatuna laih Eliab, Helón walanibis.

⁸Ayangnina āwi kukulwak kalahna kidika laih 57,400 muih ahal kalahna dai.

⁹Kaput laih Judá muihni kalbauyang balna kidika sahyakna bas kalahna karang, bitik kat 186,400, kidika ahalni balna Israel muihni balna tanitna yakat lapakwi uina karang.

¹⁰“Wadah niningkauh yakat ūnina labanni papakna karang Rubén sulani kalbauyang balna planinakin dinit kau lapakwi aiwa kidika. Witingna taninatuna laih Elisur, Sedeur walanibis,

¹¹ayangnina āwi kukulna yakat kalahwi 46,500 muih ahal.

¹²Kidika yaihnit yakat Simeón sulani kalbauyang balna, ūnina labanni papakna karang, witingna taninatuna laih Selumiel, Zurisadai walanibis,

¹³ayangnina āwi kukulna yakat kalahna 59,300 muih ahal.

¹⁴Gad sulani kalbauyang balna bik yaihnityak aslah kalpakwi ūnina labanni papakna karang, witingna taninatuna laih, Eliasaf Reuel walanibis,

¹⁵ayangnina āwi kukulna yakat kalahwi 45,650 muih ahal.

¹⁶Kaput laih Rubén sulani balna kidika kalbauyang manah sahyakna bas karang, bitik kat 151,450 muih ahal, kidika balna laih tatuna kaupak usnit yakat uiwarang.

¹⁷“Levita muihni balna laih ū lababanni arungka kidika papusyakat, kalpaknin ūni labanni kidika duwi uina karang. Ū lababanni arungka kidika laih as tatuna kalahwak ūk balna kidika usnit, usnit uina karang, planinakin dinit kat kat.

¹⁸“Ma kawa niningkauh yakat ūnina labanni papakna karang, Efraín sulani kalbauyang balna planinakin dinit kat uiwabang kidika, taninatuna laih Elisama, Amiud walanibis.

¹⁹Ayangnina āwi kukulna yakat kalahwi 40,500 muih ahal.

²⁰Kidika yaihnit yakat Manasés sulani kalbauyang balna kidika aslah kalpakwi ūnina labanni papakna karang, witingna taninatuna laih Gamaliel Pedasur walanibis,

²¹ayangnina āwi kukulna yakat kalahna 32,200 muih ahal.

²²Benjamín sulani kalbauyang balna bik aslah kalpakwi ūnina labanni papakna karang, tanina tuna laih Abidán, Gedeoni walanibis,

²³ayangnina āwi kukulna yakat kalahna 35,400 muih ahal.

²⁴Kaput laih Efraín sulani kalbauyang balna kidika sahyakna bas kalalahna karang, ahal kalbauyang manah bitik kat 180,100 muih ahal, tatuna usnitkau uiwabang kidika dangnitna yakat lapakwi uina karang.

²⁵“Tingpal nining yak ūnina labanni papakna karang, Dan sulani kalbauyang balna planikin dinit yakat lapapakwa muihni balna kidika. Dan sulani kalbauyang balna taninatuna laih Ahiezer, Amisadai walanibis,

²⁶ayangnina āwi kukulna yakat kalahna 62,700 muih ahal.

²⁷Kidika yaihnit yakat, Aser sulani kalbauyang balna ūnina labanni papakna karang, taninatuna laih Pagiel, Ocrán walanibis,

²⁸ayangnina āwi kukulna yakat kalahna 41,500 muih ahal.

²⁹Neftalí sulani kalbauyang balna bik kidika balna karak kalpakwi ūnina labanni papakna karang, taninatuna laih Ahira, Enán walanibis.

³⁰Ayangnina āwi kukulwak kalahna 53,400 muih ahal.

³¹Kaput laih Dan sulani kalbauyang balna kidika sahyakna bas kalalahna karang, bitik kat 157,600 muih ahal, witingna witni yakat lapakwi uina karang planinakin dinit yakat.”

³²Israel sulani kalbauyang bitik ayangni āwi kukulwak kalahna kidika laih, 600,550 muih ahal dai.

³³Dawan yaklau Moses yakat kalyulna dai kaput, levita balna laih kidika pasyakat ayangnina āwi kulwas dai.

³⁴Israel muihni balna laih Dawan yaklau Moses yakat amput kalyulna kidika kaput yayamna dai: Wanaihnina, sulanina kat kat, planinakin dinit kat lapakwi uina dai.