Read Mayangna Números 20 Bible Online

Números 20 - Mayangna bible

Números 20

¹Kurih pasyakat, waiku tatuna kidika yakat Israel balna uinadai, Zin kauhnimak wanilang yakat dawakat Cades yakat ma as as watna bangdai. Bahang yakat Mery dauwak nununa.

²Muih balna kidika, was dis dawakat, Moses dawi Aarón niningkau yaklauna

³dawakat, aput kalyuyulna Moses yakat: —¡Dawan yaklauwi Israel as balna yakat diawak dadauna yakat dauna yangna kalaih yamni dai!

⁴¿Dawan tawanni kidika ais yamta kauhmak wanilang pasyakat duainamanah? ¿Yangna dawakat tingkinalau balna bik dadawang yatimanakatpah?

⁵¿Ais yamta Egipto kaupak yanayaknamanah, dawakat adika pāni dutni akat yanaduainamanah? Akat sip di as dahdaski, ani damni bik diski, wain yamak bik diski, turuh balna kapat bik diski; ¡was palni bik mayang dinin diski!

⁶Moses dawi Aarón karak, tawan kaupak naikau alahuina, kalpaknin ūni yaihnit yakat uiwi muhnina kidika sau kat lalakna. Dawakat Dawan alasnina nuhni kidika laih kalahna,

⁷dawakat Dawan yaklauwi Moses yakat aput kalyulna:

⁸—Tulmanah kidika dutah, dawakat wirahma Aarón ilp mawak muih bitik uduhta. Usnit kat kipala yakat paktang, muih balna yakat was diawang. Talma kipala kaupak was kalahwarang, bahang witingna dawakat tuninaruh balna bitik didiwarang.

⁹Moses tulninah Papang muhni tani kau sakdai kidika duna, Dawan kalyulna kaput;

¹⁰usnit kat Moses dawi Aarón karak muih balna bitik ududuhna, kipala yaihnit yakat, dawakat Moses yulna: —Muih dudutni balna dakanauh: ¿adika kinipala kaupak was yakdi manadak ditanama katpah?

¹¹Kidika yulwi, Moses tulninah dulauwi, kipala yakat watbu wisna, dawakat was mahni kalahna. Kaput dawak muih tinglau balna dinina.

¹²Dawan yaklauwi Moses dawak Aarón yakat bik albupak diyulna: —Manna bik yang akat rahm yakultasmana, dawakat, ayangki bik nuhni yamtas danamana Israel balna muhnina yakat, kidika bahang, sau mananayang yakat adika muihni balna karak awas awanama.

¹³Kidika laih Meriba[16] wasnituna, kidika pāni yakat Israel balna Dawan yakat was kalyuyulna dawakat parasni niningnakana.

¹⁴Cades kaupak, Moses yaklauwi muih sihna Edom kingni yakat bahang aput yul sihna: “Wirahma Israel balna aput mayuyulwi: ‘Yakna yangna kidika.

¹⁵Yangna muihkinabararak balna Egipto yakat uiwi yalalahna dai ma mahni, kaunah Egipto muihni balna dutni yanayayamna muihkina bararak balna kau diyayamna dai kapat;

¹⁶kaput laih Dawan yak ilp yulna yangna dawakat sarahtayangna kidika witing dakana, dawak insal sihwak kaiwi Egipto kaupak yanayakna. Bahang waradika laih Cades tawanni yak bangyangna, man sauma kiu'watwa kung yakat.

¹⁷Man yakat mayuldi maidatang kat sauma pasmunah bayaktanakuh. Man di dahnaman pāni yak munah bayaktas awanaki, dawak wainma yanimak munah bik bayaktas awanaki, dawak man wasma kidika bik ditas awanaki. Ta nuhni munah yawanaki ki pirini yak bik awas awanaki ki, sauma kaupak bayakyawanaki kat.’ ”

¹⁸Edom kingni aput nangnitnalana: —¡Sauki munah bayayakwinih, bayaktanama kidika karak, tamana pasyakat alahwaki!

¹⁹Israel balna yaklauwi tanka yamnin kalyuyulna dai: —Ta nuhni munah yawanaki ki, yangna dawakat tingkinalau balna wasma didina karang kat minit lautanaki. Yang dukih yamwa kidika laih sauma pas munah bayakna atnikna.

²⁰Kaunah Edom kingni yaklauwi aput nangnitna lana: —¡Manna bayaktas awanama! Dawakat, Israel balna taninapas yakat kalahna dai kalbauyang muihni balna duwa kidika balna karak kalbaunin dini yamni duwi,

²¹dawak bayaknin awas witing sauni munah, kaput dawak Israel balna ta ūk wawalna dai.

²²Israel balna bitik kalahwi Hor asangni niningyakat uina dai.

²³Yakat, Edom sauni kiwi watwa kung yakat, Dawan yaklauwi Moses yakat dawakat Aarón yakat aput diyulna:

²⁴“Aarón dauwarang ki, Israel balna yakat sau dianin yulnayang pāni yakat kiwi kawas karangki, kat Meriba wasni kung yakat, yang yulki kat daka yamtas danamana karang.

²⁵Moses man lauwa Aarón dawi walanibis Eleazar karak Hor asangni tuna yak duyawah;

²⁶bahang Aarón sumalyang prakni kawa kidika yakta Eleazar yak ama. Aarón yakat dauna karang.”

²⁷Moses yamna dai Dawan yaklauwi kalyulna dai kaput. Israel muihni balna bitik talwabangkat Hor asangni yakat iluina dai,

²⁸dawakat kidika asangni tuna yakat, Moses yaklauwi Aarón witing sumalyang prakni kawa dai kidika yakwi Eleazar yakat āna dai. Sihm kidika asangni tuna yakat Aarón dauna dai; dawak Moses dawi Eleazar karak laih asang kaupak yaklalakna dai.

²⁹Israel balna Aarón dauna kidika dakakana kat, ma muihasluih minit kau salap kakaidana dai.