Read Mayangna Números 21 Bible Online

Números 21 - Mayangna bible

Números 21

¹Cananeo kingni witing yalahwadai Néguev sauni yakat, tawanni nuhni ayangni laih Arad, bahang yakat tusdai, witing dakana Israel balna kidika Atarim tani munah aiwi atwak dakana dai, bahang witing laih kalahwi kalbauwi Israel balna manas laihwi silak āna dai.

²Kaput laih Israel balna Dawan yakat kalyuyulna, witing tingninasut laihwak kalbauwi minit bayakwi sauni kidika duduwarang kat, tawan nunuhni balna kidika bitik daukalnin yuyulna.

³Israel balna yuyulwa yakat diawadai, Dawan yaklauwi, tingninasut laihwak Canaán muihni balna kingnina yakat kalbauwi minit bayayakna, bitik ihina, dawak tawannina nunuhni balna bitik daukakalna, kaput yayamna dai bahang, kidika pāni ayangni papakna Horma.[17]

⁴Israel muihni balna laih Hor asangni kaupak kalahwi, Kuma Pauni niningyakauh awaihwi uina, Edom sauni munah bayaknin awas yulni. Tapas yakat muih balna kidika kulninna laihwatwas dadana

⁵dawakat Papang niningkau dutni yuyulna, dawakat Moses niningkauh bik. Aput yuyulna: —¿Manna ais yamta Egipto kaupak yanayaknamanah? ¿Yana yamtang kauhmak wanilang akat daunikna? Was dawak kasnin dini bik diski. ¡Adika kasnin dutni adika yanasuhna!

⁶Dawan yaklauwi bil puisin dutni duduwa balna[18] kidika sihna dai, muih balna yakat kasna atnin, kaput laih Israel muihni balna mahni dadauna dai.

⁷Kaput kalahwak Moses yakat uiwi kalyuyulna: —¡Dutni yamna yangna, Dawan nining yakat, dawak man namangyakat bik yulnayangna kidika! ¡Dawan yak kalyultang kat bil kidika yangna kaupak yakwang! Moses yaklauwi Dawan yakat kalyulna, Israel balna kidika dutnina dawak disna atnin,

⁸dawakat Dawan yaklauwi kalyulna: —Bil wayani as yamta, dawakat, plakin panina yakat iltah. Angdika muihni bil kaswarang kat, bil wayani plakin panani kau ilna wītyakat talwarangkat, yaklawarang.

⁹Moses laih bras kau bil wayani as yamwi plakin panani yakat ilna dai, dawak muih bil kaswakat, bras kau bil wayani yamna wītyakat talwi yaklalawa dai.

¹⁰Israel balna ban lapakwi uina tanitna yakat, dawakat Obot pāni yakat, uiwi payayahna.

¹¹Obot pāni kaupak kalahwi uiwi payayahna Ije-abarim pāni kauhmak wanilang pasyakat, Moab sauni makilwa niningkauh.

¹²Kidika kaupak kalahwi uiwi, Zered wasnikung yakat, payayahna.

¹³Kidika kaupak kalahwi uiwi Arnón wasni nakaskau yakat payayahna. Adika wasni laih amorreo balna saunina kau, kauhmak wanilang pasyakat kiwi, dawakat adika wasni yaklauwi sahyakna ki, amorreo sauni dawi Moab sauni karak.

¹⁴Adika wauhnitaya yakat yulwi, Dawan kalbauna ta kidika: “Vaheb munah bayaknayangna Sufá sauni yakat, wasnibin manah, dawakat Arnón munah,

¹⁵wasbinina kung munah Ar sauni kat kiwa kidika dawakat Moab sauni kung kat.”

¹⁶Arnón wasni kaupak Beer[19] kat uhuina dai. Yakat pa kuhrna kudungni as sakki, bahang Dawan yaklauwi Moses yakat aput kalyulna dai kidika: “Muih balna uduhta bahang yang lawik was diaki.”

¹⁷Kidika mani, Israel balna aput unbabauna: “¡Sau kuhrna pasyakaupak was burhwi kalahwi! ¡Sau kuhrna kudungni yakat unbautanauh!

¹⁸¡Tunan muihni balna kukuhrna, tatuna wauhwa panan yakau, dawakat tawan paskau muih nunuhni balna, tulninanah kau apapahna!” Israel balna kidika kauhmak wanilang munah uina Matana kat;

¹⁹Matana kaupak Nahaliel, dawak Nahaliel kaupak Bamot kat,

²⁰dawakat Bamot kaupak, Moab sauni langni yakat, Pisga sauni maluih yakat, kidika kaupak kauhmak wanilang lāih kidika.

²¹Israel balna muih yakwi sisihna dai Sehón yakat, amorreo balna kingnina, bahang aput yul kalsisihna:

²²“Sauma pasmunah bayaknin kultayangna. Di dahnaman pāni munah bayaktas awanaki, dawakat wainma yamak pasmunah bik bayaktas awanaki, pama kuhrnaman wasni kidika bik ditas awanaki. Sauma pasmunah bayaktanaki kaunah ta nuhni munah.”

²³Kaunah Sehón didawak bayakwas dai sauni manah, nawatkauh laih muih bitik Israel balna taninapas yakat kalalahna, kalpakna atnin kauhmak wanilang yakat, dawakat Jahaza pāni yakat ui'kakawak mahka kalbabauna dai.

²⁴Kaunah Israel ban kalbauwi minit bayayakna dai dawakat sauni kidika kawi dudunadai, Arnón wasni kaupak, Jaboc wasni kat, yuldarangkat amonita balna saunina kiu'watwa yakat, bahang kidika balna laih yamni parasnina duwa-bangdai.

²⁵Kaput laih Israel balna amorreo balna tawannina nunuhni kidika bitik kawi duduna dai, yuldarangkat, Hesbón dawi tawannina balna amorreo tingni dinit yakat dai kidika bitik witingna karak watwi aslah yalalahna dai.

²⁶Hesbón tawanni nuhni kidika yakat, Sehón witing yalahwadai amorreo balna kingnina. Sehón witing war kalbabauna dai Moab kingni tatuna kau sakdai yakarak, dawakat sauni bitik dakyakna dai Arnón wasni kat.

²⁷Kidika bahang yul damni ulyang balna yuyulwi: “¡Hesbón akat aiwanauh, King Sehón tawanni nuhni akat! ¡Watta dulauta yamta, parasni kalatanauh!

²⁸Hesbón kaupak, Sehón tawanni nuhni yakat, kuh dahlwak wayauni kilna dai, dawak Moab kau Ar kidika buswi daukalpamna dai, Arnón kau pa maluihni balna bitik duwa kidika.

²⁹¡Mamakun palni, Moab! ¡Disnaman papang dauh Quemós tawanni! Witing dana ahalma balna kidika kalahwi kikirana atnin, dawak yayalma balna kidika king Sehón tingni yakat bukna atnin.

³⁰Hesbón parasni bitik bahwi disyamna; Dibón kaupak Nofa bitik laih daukalna. dawakat kuhpau kidika laih Medeba[20] kat kiuna dai.”

³¹Kaput laih Israel witing amorreo sauni kidika kawi duna dai.

³²Kidika minit yakat, Moses yaklauwi muih sihna dai, Jazer tawanni nuhni kidika lakwi talna atnin, dawakat Israel balna yaihnitna kau tawan nunuhni dai kidika, kalbauwi minit bayakwi duduna, dawakat amorreo balna yakat yalalahwa dai kidika bitik kangwi yakmumukna.

³³Usnit kat Basán niningyakauh nawatwi uina, kaunah Basán kingni, Og witing kalbaunin ahalni duwa kidika bitik duwi niningna kau kalbauna kalahwi kiuna, Edrei pāni yakat.

³⁴Kaput laih Dawan yaklauwi Moses yakat kalyulna: “Yamaduwinih, yang lawik man tingma yaka āki, kalbauyang muihni balna dawakat sauni bitik. Man lawa yamma witing yakat Sehón kau yamnaman dai kaput, amorreo kingni Hesbón kau yalahwadai kidika.”

³⁵Kaput laih, Israel balna yaklauwi ihina Og dawak walanibis balna, kalbauyang muihni balna duwa dai kidika bitik dadauna. As bik sangnika karak dadawas dai, dawakat saunina balna bitik duduna.