Read Mayangna Números 22 Bible Online

Números 22 - Mayangna bible

Números 22

¹Israel balna mahka tanitna yakat uina dawakat Moab wanilang yakat watwi ūnina labanni yayamna Jordán wasni ma kilwa kaupak Jericó muhnit yakat.

²Balac, Zipor walanibis, witing talna dai, Israel balna yaklauwi, amorreo muihni balna yakat amput diyayamna dai kidika.

³Moab muihni balna yamaduduna dai, Israel balna yakat tatalwak uba muih mahni kat.

⁴Dawak Moab muihni balna yuyulna, Madián muihni bararak balna yakat: “Kidika muihni balna masauki dahn yayamwarang, turuh almuk sihrsihr kaswi dahn yayamwa kapat.” Kidika mani balna yakat, Balac kidika Moab kingni dai,

⁵dawak Beor walanibis Balaam yakat kalyulna dai witing yakat kiuna atnin, bahang Balaam laih Petor yakat sakdai, Éufrates wasni yaihnit yakat, Amav sauni yak. Balac muih sihki yakat diyulna dai, Balaam yakat aput kalyulna atnin: “Egipto kaupak tawan as kaina kidika, sau bitik yakat rawi kiuna ki, waralaih yang muhkit yakat pa duna bangki.

⁶Sirihni aiwa dutni diyulta yang yulki, witing balna kauh pararasni ki mayang karak dawakat. Sipkarang kat, kaput laih sip āwa kidika kalbauta minitna bayaktik, adika sauni kaupak yakmukki, amanglatayang yamni yultaman dawak dutni yultaman kidika yakat kalahwi.”

⁷Moab muihni barak kalna, dawakat, Madián muihni bararak balna bik, tingnina yakat lalah duwi uina Israel balna yakat dutni diyulwak minit launa atnin, dawakat Balaam sakyakat uiwi kawi, Balac yul sihna dai kidika kalyuyulna.

⁸Dawakat Balaam yaklauwi diyulna: —Adika puknita akat wattanauh, dawak Dawan ais yayulwarang kidika manayulki. Dawakat Moab muihni bararak balna yakat wawatna dai, witing karak.

⁹Kaunah Papang Balaam yakat lāih kalahwi kalyulwi dakana: —¿Man karak bangmana ahalni bahna kidika wais yak?

¹⁰Balaam biri nangnitlana: —Balac, Zipor walanibis, yaklauwi sihna, bahang witing laih Moab kingni, yang akat yayulna atnin

¹¹Egipto kaupak tawan as kalahwi kaina, dawakat sau bitik yakat rana sakki. Bahang Balac dukih kalawi yang yawik dutni diyulna atnik kidika balna yakat, kaput laih sip karangpa kalbauwi minit bayakwi, sauni kaupak kang'yaknin.

¹²Papang yaklauwi Balaam yakat kalyulna: —Witingna karak kalpakwi kiwinih, dawakat dutni bik diyulwinih, kidika tawanni laih yang lawik barangni diyaknayang.

¹³Payahwakat, Balaam yaklauwi, tunan muihni balna suhna dai kidika Balac, aput diyulna: —Saumana yakat yawanauh. Dawan yadawaski manna karak yawinik.

¹⁴Moab tunani muihni balna nawatwi aiwi, Balac yakat aput kalyuyulna: —Balaam, yangna karak kainin yulwas dana.

¹⁵Kaunah Balac, watwi tunan muihni yakwi sihna, muih mahwi, kau tanit nuhni dikulna muihni balna dai, tatuna sihna dai karak dawakat.

¹⁶Witingna Balaam yakat uiwi kaltalwi aput kalyuyulna: —Balac, Zipor walanibis aput yul masihwi: “Kalni dinit yakat buktik yultayang, aiwas atnam awaski.

¹⁷Ayangni tanit nuhni yamnin kidika manyak maki, dawakat ais yayulna kidika bitik yamki; kaunah rahm kidika tawanni yakat dutni kalyulta yatah.”

¹⁸Balaam yaklauwi nangnitnalana: —Balac yaklauwi, ūni kau gol, dawak lalah bung duwasak kidika bitik yawarang bik, witing yulni sip di as yamtasyang, nuhni karangpa dibin karangpa bik Dawan yang Papangki yulni balna niningkauh karangkat.

¹⁹Kaput kaunah, adika puknita akat watta payahtanauh, talki Dawan ais yayulwarang kidika.

²⁰Pukta yakat Papang yaklauwi Balaam yakat kaiwi aput kalyulna: —Kidika ahalni balna man yulna aina kat, lawa witingna karak yawah, kaunah yang mayulki kidika manah yamma.

²¹Payahwak mapiris, Balaam yaklauwi, muyulni dangni ilwi, Moab tunani muihni balna karak kiuna dai.

²²Balaam, muyulni, yakat kilwi kiuna dawak warauni balna bu minikdawi uina. Kaunah Papang kulnin daukalna dai Balaam kiuna kidika yulni, dawakat Dawan innisal as tanipas yakat kalahwi, tanit dakna dai.

²³Muyul kidika Dawan insal kidika talna mani kat tapas yakat sakdai tingni yakat isparah as duwa, ta kidika kaupak naikau kalahwi di dahnin pāni munah kiuna dai; kaunah Balaam laih muyul yak wisna dai ta yakat watwi kalahna atnin yulni.

²⁴Usnit kat Dawan innisal kidika ta tirisni as pakkat yakat kiwi yaklauna, ta yaihnit nabupak kidika ki nunuhni manah dai.

²⁵Muyul kidika Dawan innisal yak talna mani kat, pirini nakas bukwi Balaam barahnimak kidika taihna dai. Bahang Balaam yaklau watwi wisna dai.

²⁶Dawan innisal kidika watwi tanitna yak bayakwi, ta tirisni as pakkat kiwi yaklauna, bahang kidika tani tirisni insal yaklauna sakdai yakat, sip awas dai yaihnit bayaknin, kat uba tirisni dai.

²⁷Muyul kidika Dawan innisal yakat talna kat watwi sau yakat kalangna. Dawak Balaam kulnin daukalwi, pan kau duwi wisna dai.

²⁸Kidika minitni yakat Dawan yaklau yamna dai muyul kidika yulbauna atnin, dawak Balaam yakat aput kalyulna atnin: —¿Yang ais mayamna yang? Adika kat wat bās yawistaman.

²⁹Balaam yaklauwi kalyulna: —Yang akat sarahni yatalamahn. Tingki yakat kuh bik as duta sak yang kat laih, waradika minitni maititikdai.

³⁰Kaunah muyul yaklauwi kalyulna: —Yang laih muyul yang, sangkika bitik yak matruknayang, dawak bik yamni amangtalaman, wat as bik manyak kaput yamtas yang dai. Balaam biri nangnitlana: —Kidika laih rahmki.

³¹Dawakat Dawan yaklauwi, Balaam yak niningkana, insal tapas yak isniparah yakwi duwi yaklauna sak dai kidika, Balaam limbabahwi sau yakat muhni taihna,

³²kaunah Dawan innisal yaklauwi aput kalyulna: —¿Aisyamta muyul yakat wat bas wisnamahn? Yang kuduh tamat dalna aiwanayang man yawaman kidika kulnik daukalwi.[21]

³³Muyul kidika yatalwi watbās piriwa munah awaihwi bayakna, awaihwi bayakwas dai laih maīpamnayang karang, muyul kidika laih itasyang dai karangbik.

³⁴Dawak Balaam yaklauwi Dawan innisal yakat nangnitlana: —Dutni yamnayang, amanglatasyang dai, ta pas yakat sakman kidika nakitdakta, yawayang kidika dutni talaman kat, nawattik yawaki.

³⁵Kaunah Dawan innisal yaklauwi nangnitlana: —Sipman kidik ahalni balna karak yawanam, kaunah yang mayulki kidika manah yulna. Balac tunan muihni balna sihna dai yakarak, Balaam kalpakwi kiuna,

³⁶dawakat Balac dakana, Balaam kiwi atwak, tanit kauh kiwi kalpakna Moab tawanni nuhni as pakdai Arnón wasni yakat, kidika sauni kiwi watwa yakat,

³⁷dawakat aput kalyulna: —Muih sihting watwat mayuyulna aiwanam yulni; ¿ampadawak kainin yultasmandaih? ¿Kulnaman daih yang ayangma nuhni yamnik sip awas yang?

³⁸Dawakat Balaam yaklauwi nangnitlana: —Akat sakyang, matalna aiwanayang. Kaunah yang alas kulnik lani yulbaunik laih paraski disyang; Papang yaklauwi yayulwarang kidika manah laih sipyang.

³⁹Kidika usnit kat, Balaam kusna dai, Balac karak Quiriat-huzot pāni yakat,

⁴⁰kidika pāni yak Balac yaklauwi muih yakat pakna dai, turuh, sīp iwi Balaam yakat dukiwi kalana atnin, dawakat tunan muihni balna karak kalpakwi aina muihni balna yakat bik.

⁴¹Payahwak, Balac yaklauwi walna Balaam yakat, dawak pakwak Bamot-baal yakat kilna, kidika kaupak yaihnit bitik kidika talna dai Israel balna ūnina labanni kidika.