Read Mayangna Números 23 Bible Online

Números 23 - Mayangna bible

Números 23

¹Balaam yaklauwi kalyulna: —Akat sakripais busnin pāni tiaskaubu yamtah, dawakat turuh ahalmuk tiaskaubu, sīp ahalmuk tiaskaubu ita yamta yatah.

²Balaam yulna kaput, Balac yamna dai, albupak sakripais busnin pāni yakat, turuh almuk as, sīp almuk as, ihilna dai, sakripais busnin pāni tiaskaubu kidika bitik yakat.

³Usnitkat Balaam yaklauwi Balac yakat aput kalyulna: —Sakripais busnin pāni yakat wattah, yang laih talna yawayang, Dawan kau wat kalpakki pa. Usnit dawakat, witing yang akat ising pakwarang kidika man yakat mayulki. Asang ubulni bin di ukuswas dis, askat yakat Balaam yaklauwi kalyulna:

⁴yaka pāni yakat Papang laih kalahna dai muhni tani yakat. Balaam yaklauwi kalyulna: —Sakripais busnin pāni tiaskaubu yamna ridi yamnayang, dawakat busnin pāni as yakat turuh almuk as dawakat sīp almuk as inayang bitik kau.

⁵Dawakat, Dawan yaklauwi Balaam tinpas yakat kalana dai ais yulni kidika, dawakat kalyulna: —Balac sakyakat yawa, yang mayultayang aput kalyulta.

⁶Balaam nawatwi kiuna Balac sakyakat, bahang Balac laih kasakni sakdai, sakripais busnin yaihnit yakat, moab muihni balna taninatuna balna bitik, minikdawa bangdai.

⁷Balaam aput witing yulni yulwa dai: “Ma kilwa asangni balna kaupak, Aram kaupak, Balac yayamwa aiwanayang Moab kingni kidika. ‘Aiwa Israel yakat dutni kalyulta yatah yatna, dawakat dutni bik kalkulta Jacob tawanni yakat.’

⁸¿Kaunah, Dawan yaklauwi dutni kalyulwas kidika amput yang dutni kalyulki yah?

⁹Adika kinipala tuna akaupak, sipyang talnik, adika asangni tuna kaupak talayang: tawan as witing alas yalahwa kidika, tawan ūk balna karak satuk ki.

¹⁰Sau yahamni kapatki, ¿wais sipyah kulnin? ¿Wais sipyah numniba kidika amanglanin? ¡Dauki kat yamni karang, dawakat, witni kat yawaki kidika, witingna uiwa kapat karang kat!”

¹¹Dawakat Balac, yaklauwi, Balaam yamwa kidika yulni kalyulwadai: —¿Ais yamtamahn? Yang maduainayang witingna karak yamni awas balna yakat dutni diyulna atnam dawakat man lawa yamni diyulta sakman.

¹²Dawakat Balaam yaklauwi nangnitlana: —Yang mayulnayang yulki ki atnayang, Dawan yaklauwi ais yang tikpas yakat awarang kidika manah.

¹³Kaunah Balac watwi yulna: —Yang karak aiwang pa ūk mawang, yakaupak laih Israel balna bang kidika kung awaih kidika manah talna, kaunah bang kidika pāni bitik laih awaski. Kidika yakaupak dutni diyulta yatah.

¹⁴Dawakat Balac yaklauwi Balaam yakat dukiuna, Zofim sauni muih dis pāni yakat, dawakat Pisga asangni tuna yakat, kidika pāni yakat sakripais busnin pāni tiaskaubu yamna dai yakat,

¹⁵Kidika pāni yakat Balaam yaklauwi Balac yakat kalyulna: —Sakripais busnin pāni akat wattah, yang laih yawik Papang karak kalpakki.

¹⁶Dawan kalahwi Balaam karak kalpapakna, tinpas yakat awadai ais yulnin kidika. Kidika minit yakat baisa aput kalyulna: —Nawatta Balac sakyakat yawa, yang mayulna yang kaput kalyulta.

¹⁷Balaam nawatwi kiwi kalpakna Balac karak bahang Balac laih kasakni sakdai, sakripais busnin yaihnit yakat, dawakat Moab muihni balna taninatuna bik Balac karak bangdai. Dawakat Balac kalyulwi dakana: —¿Dawan ais mayulwadah?

¹⁸Dawakat, Balaam adika yulni balna yulna: “Balac, Zipor walanibis, yamni yadakah.

¹⁹Papang laih dauyang balna kapat awaski: alas yulwas ki, yulni balna bik satuk wirlawas ki. Witing ais yulwa kidika, yamwi. Pramis as yamwakat, yakat yamwi.

²⁰Yang akat yapakna, minit yultik barangni yaknik, Papang yaklauwi barangni yakwak, yang niningkau yulnik sip awas yang.

²¹Israel pasyakat, alas, dawakat dutni bik taldaski, Jacob tawanni kidika. Dawan Papangni kidika laih witingna karak ki, dawakat witingna laih king kalyuyulwi.

²²Papang yaklau Egipto kaupak diyakna kidika laih witingna dinina, sihm turuh almuk kat tamnina balna kidika laih witing dini kapat.

²³Jacob niningyakat, dutni kidika parasni diski; Israel niningyakat di as malnikau dutni kalyamnin kidika diski. Waradika pāni, Israel yakat kalyulnin ki: ‘¡Di yamni taldas dini kidika ampus manna yakat yamna yah Papang!’

²⁴Adika tawanni yaklauwi, layan anyang as kapat, dawakat yakurupwas karang dini kidika kaswarang kat, dawakat ina kidika āni diwarang kat.”

²⁵Balac yaklauwi Balaam yakat kalyulna: —¡Man kidika tawanni yakat sip dutni kalyultas man, kidika bahang, mamatyulta barangni kalyakwinih!

²⁶Dawakat Balaam yaklauwi aput nangnitlana: —¿Mayulnayang awasyah, Dawan ais yayulwa kamanah yamnik sipyang?

²⁷Balac kalyulwa dai: —Aiwangkat pa ūk maduyawaki. Sipkarang kidika pāni kaupak Israel yakat dutni kalyultang kat, Papang kulnin daukakalwas atnin.

²⁸Kaput laih, Balac yaklauwi Balaam kidika duwa kiuna, Peor asangni tuna yakat, yakaupak kauhmak wanilang bitik yamni lāih dai.

²⁹Yakat Balaam yaklauwi Balac yakat kalyulna: —Sakripais busnin pāni tiaskaubu, yamta yatah dawakat turuh ahalmuk tiaskaubu, sīp ahalmuk tiaskaubu ita yatah.

³⁰Balaam yulna kaput, Balac yamna, sakripais busnin pāni balna yakat, turuh almuk as, dawakat sīp almuk as ilwi busna dai sakripais busnin pāni bitik kau.