Read Mayangna Números 25 Bible Online

Números 25 - Mayangna bible

Números 25

¹Israel muihni balna Sitim sauni yak uiwi yalalahna mani kat, ahal balna kidika moab yayalni balna karak kalpakwi dutni yayamna,

²daninawan dauh yakat sakripais yayamwi yakat yulwi duwi uina. Israel balna kidika kasnin yayamwa dai kidika witingna bik kakaswi moabita papangnina dauh yakat minitna yuyulna,

³dawak kaput witingna dawan dauh Baal-peor prinias yakat uina dai. Bahang Dawan laih Israel balna niningna yakat kulnin daukalna dai,

⁴dawak Moses yak kalyulna: —Tawan muihni balna taninatuna bitik uduhtah, dawak yang niking yakat duyawah, madah yaringni yakat. Kapat laih Israel nining yakat kulnik daukalna kidika lungwarang.

⁵Moses yaklauwi Israel balna taninatuna balna yakat dipakwadai: —Manna lawa, angdika muihni balna, papang dauh, Baal-peor yakat uina balna kidika bitik itanama.

⁶Kaunah Israel muihni as yaklauwi, madián yal as dukiwa dai, witing ūni yakat, Moses talwasakdai dawakat Israel balna bitik kaluduhna bangdai, kidika minitni yakat bitik kalpaknin ūni labanni kiukawa yakat kaidabangdai.

⁷Finees Eleazar walanibis, Aarón mani, witing talna kat, Israel balna paskaupak kalahwi, langsa as duwi,

⁸dawi Israel yal dukiwadai dangnit yakat kiuna payahwa pāni kat, kaput laih langsa kau pawi ahlawadai baniu yakat, dawakat yal yakat bik kaput laih, Israel balna yakat diyamwakat manas dadauwa dai kidika, yakat dahn kalwa dai,

⁹uman, tausin manah 24 dadauna dai, witingna.

¹⁰Kaput laih Dawan yaklauwi Moses yakat kiwi aput kalyulwadai:

¹¹—Finees, yaklauwi yamwi Israel balna niningna kau kulnik daukalna kidika pina atnin, witing bik sihm minitna anna dai yang yamnayang kapat. Kidika bahang minit annin kidika yaklau yayamwakat buktasyang dawak witingna yakat bik imuktas awaki ki.

¹²Kidika bahang witing yakat kalyultah, witing karak kulnin aslah lani pranimis as yamtayang,

¹³kidika yulni witing yakat dawak sulani balna tingnina yakat bik ātayang, sumalyang as ban kaput atnin kidika, kat yang mikit anna kidika yulni dawak kaput laih Israel muihni balna kidika dutnina dawak disna.

¹⁴Israel muihni as madianita yaihnit yakat dauna ayangni kidika laih Zimri dai, dawak kidika laih Salú walanibis dai dawak bik Simeón sulani balna paskaupak ū duyang tanituna as dai.

¹⁵Madianita kaupak muih yal kidika ayangni laih Cozbi dai, dawak kidika laih Zur walanibis yal dai, Madián kaupak sulani balna dakni as tanituna.

¹⁶Dawan laih Moses yakat kiwi kalyulna:

¹⁷—Madián muihni balna yakat dikalbauta minitna bayaktanauh,

¹⁸sihm witingna yaklau manna yakat manakalbauwi mamatna bayakwi manayayamwakat dawan dauh Baal-peor yakat ayangni tanit nuhni yamnamana kaput, dawak madianita balna taninatuna walanibis yal Cozbi niningkauh laih, yang lawik wah as sihtingkat langsa kau dauna, dawan dauh Baal-peor yakat ayangni tanit nuhni yamna kidika yulni.