Read Mayangna Números 3 Bible Online

Números 3 - Mayangna bible

Números 3

¹Sinaí asangni yakat, Dawan yaklauwi Moses yakat yulbauna mani kat, Aarón dawi Moses karak sulanina balna laih adika dai:

²Aarón walanibis balna: Nadab, walanibis barakni, kaupak, Abiú, Eleazar dawak Itamar.

³Arungkapak, Papang dini yakna dai dawak bik sumalyang ahana dai sumalyang warkni balna kidika yamna atninna,

⁴kaunah Nadab dawi Abiú karak laih Dawan muhni yakat dadauna dai kat Sinaí kauhnimak walang yakat taldas kuhni as biwi kalalana dai kidika yulni. Witingna laih walabis disdai. Eleazar dawi Itamar karak laih sumalyang yamnin dini balna kidika yayamna dai, papangnina Aarón minitna talwak.

⁵Dawan yaklau Moses yakat kaiwi aput kalyulna:

⁶“Leví sulani balna yultang aiwi sumalyang Aarón dini yayamwang.

⁷Aarón dini yayamwarang dawak tawan muihni balna yakat bik dinina yayamna karang, kalpaknin ūni labanni niningyakat dawak holi pāni kidika laih witingna tingnina yakat karang.

⁸Kaput bik kalpaknin ūni labanni paskau dunin dini bang kidika bitik main tatalwarang, dawak Israel muihni balna yakat bik dinina yayamna karang, holi pāni warkni balna bitik yakat.

⁹Levita balna kidika Israel paskaupak silp yaktangkat Aarón dawi sulani balna yakat dinina yayamna karang,

¹⁰dawakat Aarón tingni yakat danaman karang sulanina balna dawak sumalyang yamnin dini balna kidika bik. Wais kat sumalyang awas bik sumalyang yamnin balna kidika yamwarang kat dauna karangki.”

¹¹Dawan Moses yakat kiwi aput kalyulna:

¹²“Israel balna paskaupak, levita balna kidika yaktik dunayang, witingna bitik kau walaninabis tatuna balna yayana kidika yulni. Witingna laih yang diki balna,

¹³kat walaninabis tatuna kalahwarang kidika laih yang diki. Egipto muihni balna walaninabis tatuna balna bitik -inayang, dawak Israel balna walaninabis tatuna laih apaknayang dai, dawak tingninalau tatuna yakna balna kidika bik. Kaput bahang yang diki balna. Yang kuduh Dawan.”

¹⁴Sinaí kauhnimak walang yakat Dawan yaklau Moses yakat kiwi aput kalyulna:

¹⁵“Levita balna ayangnina āta kultah, wanaihnina kat kat, dawak walabis ahal binina waiku as kaupak minit kauh duduwa balna kidika bik ayangnina dutah.”

¹⁶Moses yaklau ayangnina āwi kulna dai, Dawan yaklau yamnin kalyulna dai kaput.

¹⁷Leví walanibis balna: Gersón, Coat, dawak Merari.

¹⁸Gersón sulani balna, wanaihni kat kat, dawak panina kat kat, bahang adika balna dai, Libni dawak Simei.

¹⁹Coat sulani balna laih adika dai, Amram, Izhar, Hebrón dawak Uziel.

²⁰Merari sulani balna panina kat kat kidika laih adika dai, Mahli dawak Musi. Adika balna bitik Leví sulani balna dai wanaihnina kat kat kulna dai kidika.

²¹Gersón sulani laih, Libni dawak Simei dai.

²²Ahal binina waiku as kaupak minit kauh balna kidika ayangnina āwi kulwak kalahna dai 7,500 muih.

²³Adika sulani balna laih ūnina lababanni pakwi yalalahna dai, holi pāni dangnit kau ma kawa niningyakat.

²⁴Gersón sulani balna tanina tuna laih Eliasaf, Lael walanibis.

²⁵Kalpaknin ūni labanni kau, holi pāni kidika witingna main tatalwadai, di unitak mumukwadai kidika dawak dūr kawa kau asna ririwādai kidika bik,

²⁶watak kau asna ririwādai kidika dawak watak dūrni kawa yakat ririwādai kidika bik dawak wah sisitwa balna dai kidika bitik maintatalwadai.

²⁷Coat sulani balna laih, Amram, Izhar, Hebrón dawak Uziel,

²⁸dawak ahal bitik waiku as minitkau duduwa dai kidika kukulna kat muih 8,300[4] kalahna dai. Adika sulani balna holi pāni maintatalwadai,

²⁹adika balna laih ūnina labanni papakna dai, holi pāni kaupak wadah nining yakat.

³⁰Adika sulani balna taninatuna laih Elizafán dai, Uziel walanibis.

³¹Adika sulani balna maintatalwa dai, pramis baksni, tinibil, awas ilnin pāni, sakripais busnin pāni balna, Papang dini yakna dunin dini balna dai kidika, tunan sitwa asnina kidika dawak dunin dini balna bitikkau.

³²Levita balna taninatuna laih Eleazar, sumalyang nuhni Aarón walanibis, witing laih holi pāni maintatalwa kidika balna yakat minitna talwadai.

³³Merari sulani balna laih, Mahli dawak Musi.

³⁴Muih ahal bitik kulna dai, waiku as duduwa kaupak minitkauh kidika, kulwak kalahna kidika laih 6,200 muih dai.

³⁵Taninatuna laih Zuriel dai, Abihail walanibis, dawak adika balna ūnina labanni papakna dai, holi pāni kaupak tingpal nining yakat.

³⁶Merari sulani balna laih, holi pāni tatni balna, rahni balna, lāni balna, rauni balna dawak dunin dini balna kidika maintatalwadai,

³⁷kaput bik watak kau pan dakwi ukwi awaihlana balna dawak rupni balna bik maintatalwa dai.

³⁸Ma kawa niningkauh holi pāni muhnityak Moses dawi Aarón walanibis balna karak ūnina labanni papakna dai, witingna bik maintatalwadai holi pāni kidika, Israel balna ayangnina kau. Wais kat sumalyang awas bik, kidika warkni balna kidika yamwarang kat, dauna atnin dai.

³⁹Moses dawi Aarón karak muih ayangni āwi kukulna dai wanaihnina kat kat, Dawan yaklau kalyulna dai kaput, ahal binina waiku as duduwa minitkauh balna bitik kulwak kalahna dai 22000 muih.

⁴⁰Dawan yaklau Moses yakat kalyulna: “Israel walaninabis balna tatuna kidika bitik ayangnina āta kultah, waiku as kaupak minitkauh duduwa balna kidika, dawak ayangnina ātah.

⁴¹Israel balna walaninabis tatuna dunayang kidika yulni, levita balna kidika apakbangta yatah. Yang kuduh Dawan yang. Sihm kaput bik, Israel balna tingninalau tatuna yayakwak duki kidika yulni, levita balna tingninalau kidika apakbangta yatah.”

⁴²Moses yaklau Israel balna walaninabis tatuna kidika bitik ayangnina āwi kulna dai Dawan yaklau kalyulna dai kaput,

⁴³walabis ahal waiku as minitkau duduwa balna kidika bitik ayangnina ulwak kalahna dai 22,273 muih.

⁴⁴Dawan yaklau Moses yakat kiwi aput kalyulna:

⁴⁵“Levita balna kidika dutah, Israel balna walaninabis balna tatuna kidika yulni, dawak levita balna tingninalau kidika bik dutah, Israel balna tingninalau kidika yulni, kat levita balna laih yang diki balna bahang. Yang kuduh Dawan.

⁴⁶Israel balna walaninabis laih mahni ki levita balna walaninabis karak dawakat, kaput bahang, baisa 273 walaninabis tatuna ahal kidika laihwi yaknin ki,

⁴⁷bahang diyultang lalah dadasni singka lalauna karang holi pāni lalahni kulna kidika kau. Bahang kidika lalahni laih granos 11 duwi,

⁴⁸kidika lalahni Aarón dawak walanibis balna yakat bik diatah, witingna dilaihwi yakna as kapat.”

⁴⁹Israel walaninabis tatuna balna laihwi yaknin lalahni kidika, Moses yaklau uduhna dai,

⁵⁰uduhwak kalahna 1,365 holi pāni lalahni kau.

⁵¹Adika lalahni Aarón dawak walanibis balna yakat diana dai, Dawan yaklau yamnin kalyulna dai kaput.