Read Mayangna Números 31 Bible Online

Números 31 - Mayangna bible

Números 31

¹Dawan yaklauwi Moses yakat aput kalyulna:

²“Israel ayangni kau duta Madián yakat birita kalyamta, kidika usnit kat man mahka dauma.”

³Moses yaklauwi tawan yakat diyulna: —Buas mana kidika kalbaunin dini mahka dutanauh kalbauna yawanama ki, Madián niningyakat kalbautanauh, birita kalyamtanauh Dawan ayangki kau duta.

⁴Sulani bitik pasyakat, ahal tausin as as yakwi sisihna karang kalbauna atnin.

⁵Kaput laih sulani bitikkau ahal tausin as as walwi yakana dai, bitik kat tausin salap minit kau bu dai, kalbauyang balna.

⁶Kaput laih Moses yaklauwi sihna dai kalbaunin yakat, sumalyang Eleazar walanbis Finees bik kiuna dai, bahang witing laih di maisihni dis dini balna kidika duwi kiuna, dawakat trumpit bik duwi kiuna dai, kalbaunin kidika mahka kai'kawak, pukwak mahka kalbauna atnin kidika.

⁷Dawakat madianita balna niningna yakat kalbauwi bitik imumukna dai, Dawan diyulna dai kaput Moses munah.

⁸Ihina dai, Evi, Requem, Zur, Hur dawakat Reba, yuldarang kat Madián kingni singka balna dai kidika dawakat, Beor walanbis Balaam bik ihina dai.

⁹Israel balna, madianita yayalni balna laih silak kau duwi uina, dawakat walaninabis dibinina bitik, kamanah bik awas tingninalau balna dawakat di ūk balna minit nuhni kulna balna bitik duwi uinadai;

¹⁰kidika minit yakat tawannina balna bitik bubusna dai.

¹¹Muih dawi, tinglau balna kapat niningna yayakna kidika,

¹²Moses yakat duwi uina dai, sumalyang Eleazar yakat duwi uina dawakat Israel tawanni yakat bik duwi uina dai, bahang witingna laih Moab wanilang yakat bangdai, Jordán wasni kung Jericó muhnit yakat.

¹³Moses, sumalyang Eleazar, tawan tanituna balna bitik kalahwi kalpapakwa dai, kalbauwi dawi nawatwi aiwak.

¹⁴Kaunah Moses kulnin daukalwa dai, kalbauyang uduhna tausin tanina tuna duwa lik yakat, dawakat, kaluduhna andat tanina tuna duwalik yakat bik, kalbauwi dawi aiwakat,

¹⁵aput diyulwadai: —¿Ais yamta yayal balna kidika itas danamanah?

¹⁶Witingna balna kuduh yayamwak, Balaam yulni, Israel balna yakat duwi uiwi Dawan niningkauh yaklauwi dawan dauh Baal-peor yakat ayangni tanit nuhni yayamna kidika. Kidika yulni Dawan yaklauwi witing tawanni yakat, wah nuhni kalana dai.

¹⁷Walabis ahal yayal muih bararak balna kidika bitik imuktanauh, kaunah yayal sirarau baisa ahal kalpapakwas balna kidika laih ihiwinih.

¹⁸Yayal sirarau baisa ahal kalpapakwas balna kidika laih manna dutanauh.

¹⁹Muih ina muihnimana, dawakat muih dauna laihna mana balna mana kidika, ma tiaskauas tawan paskaupak naikau awanama. Manna, dawakat muih laihta duainamana kidika balna bik, ma bās yakat, dawakat, ma tiaskau bu yakat bik, dutmana dis yamtanama.

²⁰Asmanana balna bik dutni dis yamtanama, di unitak balna yus yamtamana kidika, kuts basni kau yamna balna dawakat pan kau di yamna balna bitik.

²¹Sumalyang Eleazar yaklauwi, kalbauyang muihni balna kalbauwi aina balna yakat diyulna: —Dawan yaklauwi adika lani, Moses yakat kalana dai:

²²gol dini, lalah dini, ayan kau di yamna balna, lit kau yamna balna

²³—yul aslah, di bitik kuh daihni kau sip dauwas kidika—, kuh pasyakat āta busta maisihnidis yamnamna ki, dawak maisihni dis kalnin wasni kau suhtanama. Kuh daihni kau maisihni dis yamwa kidika laih, waskau manah suhta maisihni dis yamtanama.

²⁴Ma tiaskaubu bayakwak asmanana suhtanama, dawak maisihni dis kaltanama. Kidika usnit kat sip awanama ū labanni balna pasyakat yawa awanama.

²⁵Dawan yaklauwi Moses yakat kalyulna:

²⁶“Sumalyang Eleazar, dawak tawan tunan muihni balna tingmasut lalaihwak, muih balna, dawak tinglau balna dakyakwi duahaina kidika, madianita balna tingnina kaupak, kultah,

²⁷sahyakta bu, uiwi kalbauna muihni balna yakat wayahyakta diama, dawakat tawan muihni balna yakat bik papuswayah as kidika diama.

²⁸Dawakat yang bik buas yakta yama: kalbauyang balna duduwarang pasyakaupak muih dawak tinglau balna bik, andat singka kaupak as as yaknaman karang,

²⁹dawakat dini balna kidika sumalyang Eleazar tingni yakat kalama, yang diki kulna kidika.

³⁰Dawakat papus wayah ūk, Israel balna dinina kidika, muih dawak tinglau balna, sīp turuh, biriku balna kidika, andat papusbah kaupak pasyakat as as yayakna karang, bahang kidika libait balna paki maisihni dis kau, di yayamwa balna dinina karang.”

³¹Dawan yulna kaput yayamna dai Moses dawi Eleazar karak.

³²Waihninala balna tingnina kaupak dakyayakna dai kidika laih aput dai tausin andat tiaskauas minitkau muihasluih bās minit kau salap minitkau singka sīp,

³³tausin muihasluih bās, minitkau salap minitkau singka, turuh ahalmuk,

³⁴tausin muihasluih bās kau as biriku,

³⁵dawakat, tausin muihasluih minitkau salap minitkau bu yayal sirarau. Kalbauyang balna witingna silp laihwi duduna kidika laih kulwas ki.

³⁶Kaput bahang, kalbauyang balna papus wayah duduna kidika laih aput dai, sīp manah 337,500 dai,

³⁷Dawan yakat kalalana kidika laih 675 dai;

³⁸turuh ahalmuk tausin manah 36 duduna dai kidika kaupak, Dawan yakat kalalana dai 72;

³⁹30,500 biriku duduna kaupak, Dawan yakat kalalana dai 71;

⁴⁰dawakat, sirarau tausin manah 16 dai kidika kaupak, Dawan yakat kalalana dai 32.

⁴¹Dawan dini kulna kidika Moses yaklauwi sumalyang Eleazar tingni yakat kalana dai Dawan kalyulna dai kaput.

⁴²Papus wayah ūk, Moses yaklauwi sahyakna dai kidika, Israel balna dinina kalbauyang balna ampus duduna kat,

⁴³tawan muihni balna bik sihm kaput duduna dai, yuldarang kat: 337,500 sīp,

⁴⁴turuh ahalmuk, tausin manah 36,

⁴⁵biriku, 30,500,

⁴⁶dawakat, sirarau kidika tausin manah 16.

⁴⁷Adika papus sahyakna kaupak, Moses yaklauwi 50 paskaupak as yakna dai, muih dawak tinglau balna bik kaput yamna dai, kidika laih libait balna Dawan pāni holi kau diyayamwa balna yakat diana dai, Dawan yaklauwi Moses yakat yamnin kalyulna dai kaput.

⁴⁸Kaput dawak kalbauyang balna tausin dawak andat kidika balna yakat tanina tuna kakana balna, yuldarang kat tunan muihni balna dai kidika, Moses yakat uiwi kaltatalna dai

⁴⁹aput kalyuyulna: “Yangna man dima yamyang balna, tunan awana yangna dai kalbauyang tausin dawak andat balna tanina tuna yangna dai bahang kultik talningkat bik diswaski.

⁵⁰gol dini yangna yaknayangna dai kidika akat bitik duaitayangna: ting ānin, alah di ūk ūk balna, Dawan yakat kalana atnin yangna yana laihwi yakna atnin.”

⁵¹Moses Eleazar karak, gol dini balna duahaiwak lalaihwa dai.

⁵²Kalbauyang balna tausin dawak andat tuna kidika balna taninatuna balna gol duahaina dai kidika, tikini duwa dai andat as minitkau muihasluih arungka minitkau arungka kilo,

⁵³kalbauyang balna bitik kau waihninala tingnina kaupak didakyayakna dai kidika pai apis duahaina dai.

⁵⁴Kaput laih, Moses dawi Eleazar karak kalbauyang balna tausin, andat tunan kakana balna, gol dini duahaina dai kidika duwi, kalpaknin ūni labanni yakat duwi uina dai, kaput Dawan kidika Israel balna yakat dikulwa atnin yulni.