Read Mayangna Números 6 Bible Online

Números 6 - Mayangna bible

Números 6

¹Dawan yaklau Moses yakat kiwi aput kalyulna:

²“Israel balna yakat aput diyultah: Al karangpa, yal karangpa, Dawan yakat wirlawik nazareo[6] kapat kalahnin kulwarang kat,

³wain diwas karang ki, dawak wasak satni balna, dawak wain sapahna wasni yamna kidika bik dawak wain minik dawak pasas minik bik kaswas karangki.

⁴Witing pranimis yamna kidika baisa bayak'kiwas laih, wain panani kaupak minik yakwa kidika kaswas karangki, ais, ais karang bik.

⁵Basni dakwas karang kaunah dawak nanaiwarang, pranimis mani balna bayakwarang kat, witing laih Dawan dini yakna kidika kat atninki.

⁶Kidika mani balna pasyakat, muih dauna yaihnit yakat kiunin awas ki,

⁷papangni, nanangni, dawak wirahni kidika balna dadauwarang bik, yaihnit yakat kiunin awaski, muihni yakat dutni kallaihnin awas yulni, witing laih Dawan dini yakna atninki.

⁸Pranimis yamna kaupak ma bitik pasyakat, Dawan yakat manah dini yamwarang.

⁹“Muih as sirihni witing yaihnit yakat dauwak, witing basni maisihni kalwarang kat, Dawan dini yakna dai kidika, ma tiaskaubu bayakwak usnit kat basni kidika kahrmukwarang, yuldarang kat, witing maisihni dis kalahwa mani āna yakat.

¹⁰Ma tiaskaubās laihwakat, sumalyang nining yakat buhtuku binina bu dawak buhtuku kapat dibinina kidika bu dukiwarang, kalpaknin ūni labanni yakat.

¹¹Sumalyang yaklau as duwi busna karang dutni dawak disna atnin yulni dawak ūk kidika laih, sakripais karauni kauna kapat busna karang, dawak muih dauna muihni laihwak maisihni dutni kallaihna kidika kaupak, dutni dawak disna atnin prinias as yamna karang. Kidika mani watwi basni kidika Dawan dini yakna karang,

¹²dawak Dawan dini yaknin mani kidika watwi wisamni yamna karang. Ma bayakna balna yakat witing basni maisihni dis yamna dai kidika laih kulwas dawarang, kat dauh kalna bahang. Kaput laih sīp bin kurih as duwa kidika Dawan yakat dukiwi busna karang dutni dawak disnin yulni.

¹³“Maisihni dis kalahwarang mani kat, nazareo kidika, kalpaknin ūni yakat kiunin karangki,

¹⁴kaput laih Dawan yakat dukiwarang, sīp kurih as duwa kat, kidika buswak dutni dawak disnin yulni, dawak ūk dukiwi busna karang sīp yal kat, kidika laih watwi wanaihni karak yamni kalahna atnin yulni.

¹⁵Kaput bik plawar pupuhnin dis busna tanit yamni kidika ūk dukiuna karang, dawak di minik, wain kidika balna bik dukiuna karang.

¹⁶Sumalyang kidika yaklau Dawan muhni yakat dutni dawak disnin yulni sakripais kidika dawak sakripais karauni kauna kidika bik busna karang,

¹⁷kaput bik sīp almuk as duwi kiwarang busna atnin, wanaihni karak watwi yamni kalahna atnin yulni, dawak plawar pupuhnin dini dis āwi busna kidika, dawi wain bik dukiuna karang.

¹⁸Nazareo muihni kidika basni kahrna karang, kalpaknin ūni kiwikawa yakat, dawak basni dakwi Papang dini yakna dai kidika, watwi wanaihni karak yamni kalahnin yulni sakripais buswa kidika pasyakat ruhm'āna karang.

¹⁹Sumalyang kidika sīp almuk dangni muihni lahna kidika apis, plawar pupuhwas dini āwi busna kidika duwi, nazareo tingni yakat āna karang, basni kahrna usnit kat.

²⁰Kaput laih sumalyang kidika yaklauwi, Dawan muhni yakat dukiunin prinias as yamwarang. Di dauh pasni duwi Dawan muhnikau dukiwi prinias yamwa kidika, dawak barahnimak Dawan yakat kalawa kidika balna laih apakna karang sumalyang dini, kidika usnit kat, nazareo kidika sip karang wain dina atnin.

²¹“Adika ki lā, Dawan yakat pramis yamwi witing dini kalahwi nazareo kalna atnin kidika, dawak minitdis kalanin dini balna laih adika ki, di ūk kalanin sip kidika laih pasyakat banawi kulwas. Witing pramis yamna kidika yakat yamna karang, adika yamnin lani balna āna kaput.”

²²Dawan yaklau Moses yakat kiwi aput kalyulna:

²³“Aarón dawi walanibis balna yakat diyultah witingna yaklau Israel muihni balna yakat blis diyayamwarang kat aput yayamwarang:

²⁴‘Dawan yaklau blismayamwang dawak tingni dinityakat maduwang;

²⁵Dawan yaklau yamni matalwarang dawak witing dalani lani duwa kidika namangkawarang;

²⁶Dawan yaklau dalani matalwarang dawak kulnin aslah lani kidika mana karang.’

²⁷“Witingna laih kaput yang ayangki yuyulna karang Israel balna minitna yakat, dawak yang lawik blis diyamna awaki.”