Read Mayangna Números 7 Bible Online

Números 7 - Mayangna bible

Números 7

¹Holi pāni kidika Moses yamwi dana mani kat, di salani kau duwi, pāni kidika Papang dini yakna dai, paskau dunin dini balna bangkidika karak libitwi.

²Usnitkat, sulani balna bitik paskau tunan duwa muihni balna, muih ayang āwi kukulna dai kidika balna,

³Dawan yakat minitdis kalanin dini duahaina dai, di puwi tuknin dini tiaskauas, dawak turuh ahalmuk pan muryang balna 12; yuldarang kat di puwi tuknin dini kidika tunan muihni balna bu duahaina dai dawak turuh almuk pan muryang as kidika laih, muihnina kat kat as as duahaina dai. Adika bitik holi pāni muhnityakat lalakna dai.

⁴Dawan yaklauwi Moses yakat kalyulna:

⁵“Di puwi tuknin dini balna kidika dawak turuh pan muryang balna kidika, levita balna yakat diatangkat kalpaknin ūni labanni kau di yayamwa balna yakat duwi di yayamwang, witingna wark ais ais yayamwa balna kidika pasyakat.”

⁶Moses laih di puwi tuknin dini balna kidika dawak turuh ahalmuk balna kidika bik duwi levita balna yakat sahyakwi diana.

⁷Gersón sulani balna yakat diana di puwi tuknin dini balna bu, dawak turuh ahalmuk pan muryang balna arungka, witingna dukihdai kidika dini balna kau warknina balna yamna atninna.

⁸Merari sulani balna yakat laih diana dai, di puwi tuknin dini balna arungka, turuh ahalmuk pan muryang balna kidika tiaskaubās, witingna dukihdai kidika dini balna kau warknina balna yamna atninna, Aarón walanibis Itamar taninatuna kawak.

⁹Coat sulani balna yakat laih, di puwi tuknin dini balna kidika diawas dai, dawak turuh ahalmuk pan muryang balna bik diawasdai, kat di balna Dawan dini yakna balna kidika, salahkau trukwi dukiunin dai bahang.

¹⁰Sakripais busnin pāni kidika Papang dini yakna mani kat, sulani balna taninatuna kidika bitik minitdis kalanin dini duwi uiwi sakripais busnin pāni kidika muhnityakat lalakna dai.

¹¹Bahang Dawan yaklau Moses yakat kalyulna: “Ma bitik yakat sulani balna taninatuna kidika ūk ūk karang sakripais busnin pāni Papang dini yakwak minit dis kalanin dini duwi uiwa balna kidika niningnayakat.”

¹²Naasón, Aminadab walanibis kidika, tatuna dukiuna dai, minitdis kalanin dini kidika, witing laih Judá sulani dai.

¹³Minitdis kalanin dini dukiuna dai kidika laih, sutak ānin dini as lalah kau yamna, tikini laih, gramos 1,430 duwadai, dawak lalah kau sutak nuhni as yamna dai, tikini laih, gramos 770 duwadai (holi pāni kidika laih tikini kaput duwadai), kidika dini balna bupak plawar tanit yamni kidika babung uhwi disala karak banawi laihna dai, kidika laih minit dis kalanin dini di satni balna minik dai;

¹⁴kidika minityakat gol kau ispun nuhni as yamna dai, tikini laih gramos 110 duwadai, kidika isnipun bung walapni busnin dini,

¹⁵turuh almuk wahma as, sīp almuk as dawak sīp kurih as duwa kidika as sakripais karauni kauna busna atnin,

¹⁶kuts almuk as dutni dawak disnin yulni sakripais busna atnin,

¹⁷dawak witni kat, sakripais buswi watwi wanaihni karak yamni kalahna atnin dini kidika laih, turuh ahalmuk bu, sīp ahalmuk singka, kuts ahalmuk singka, sīp kurih as duduwa balna kidika singka. Adika laih Aminadab walanibis Naasón duaina dai minitdis kalanin dini.

¹⁸Usnit kat, ma bu yakat Natanael, Zuar walanibis kidika dukiuna dai, minitdis kalanin dini, bahang witing laih Isacar sulani balna taninatuna dai,

¹⁹dawak Naasón ampus dukiuna kat, sihm kaput duwi kiuna dai.[7]

²⁴Kidika kaupak ma bas yakat, minitdis kalanin dini dukiuna kidika laih Eliab, Helón walanibis, witing laih Zabulón sulani balna taninatuna dai,

²⁵muhnilau balna duwi uina kaput, witing bik duwi kiunadai.

³⁰Ma arungka yakat, minitdis kalanin dini kidika dukiuna dai Elisur, Sedeur walanibis, witing laih Rubén sulani balna tanina dai,

³¹muhnilau balna duwi uina kaput, witing bik duwi kiuna dai.

³⁶Ma singka yakat, minitdis kalanin dini dukiuna kidika laih, Selumiel, Zurisadai walanibis, witing laih Simeón sulani balna taninatuna dai,

³⁷muhnilau kau, minitdis kalanin dini muih ūk balna duahaina kaput, witing bik duaina dai.

⁴²Reuel walanibis Eliasaf kidika, ma tiaskauas kat minitdis kalanin dini kidika dukiuna dai, witing laih Gad sulani balna taninatuna dai,

⁴³muhnilau kau minitdis kalanin dini ampus duahaina kat witing bik kaput duaina dai.

⁴⁸Amiud walanibis Elisama kidika, ma tiaskaubu mani kat, minitdis kalanin dini kidika dukiuna dai, witing laih Efraín sulani balna taninatuna dai,

⁴⁹muhnilau kau, minitdis kalanin dini, ūk balna duahaina kaput witing bik duaina dai.

⁵⁴Pedasur walanibis Gamaliel kidika, ma tiaskaubās mani kat, minitdis kalanin dini kidika kalana dai; witing laih Manasés sulani balna taninatuna dai,

⁵⁵muhnilau kau minitdis kalanin dini ampus duahaina kat kaput witing bik duaina dai.

⁶⁰Gedeoni walanibis Abidán kidika, ma tiaskauarungka mani kat; minitdis kalanin dini kidika dukiuna dai. Witing laih Benjamín sulani balna kidika taninatuna dai,

⁶¹dawak muhnilau kau minitdis kalanin dini, kalana dai kaput, watwi kalanadai.

⁶⁶Amisadai walanibis Ahiezer kidika, ma salap mani kat, minitdis kalanin dini kidika dukiuna, witing laih Dan sulani balna kidika taninatuna dai,

⁶⁷dawak muhnilau kau minitdis kalanin dini, kalana dai kaput watwi kalanadai.

⁷²Ocrán walanibis Pagiel kidika, ma salap minitkau as mani yak, minitdis kalanin dini kidika dukiuna, witing laih Aser sulani balna taninatuna dai,

⁷³dawak muhnilau kau, minitdis kalanin dini kalanadai kaput watwi kalanadai.

⁷⁸Enán walanibis Ahira kidika, ma salap minit kau bu mani kat, minitdis kalanin dini kidika dukiuna. Witing laih Neftalí sulani balna kidika taninatuna dai,

⁷⁹muhnilau kau, minitdis kalanin dini, ūk balna duahaina kaput witing bik duaina dai.

⁸⁴Kaput bahang, sakripais busnin pāni kidika, Papang dini yakna mani kat, Israel sulani balna taninatuna balna bitik yaklau sutak ānin dini lalah kau yamna kidika 12, sutak nunuhni lalah kau yamna kidika 12 dawak ispun nunuhni gol kau yamna kidika bik 12 diayana dai.

⁸⁵Sutak ānin dini as kidika tikini laih, gramos 1,430 duwadai, dawak sutak nuhni as kidika tikini laih, 770 gramos duwadai. Bitik kat, sutak ānin dini balna dawi sutak nunuhni balna kidika karak tikini kidika laih, 26,400 gramos duwadai, holi pāni tikini kidika laih kaput duwadai.

⁸⁶Ispun nunuhni gol kau yamna kidika bik 12 bangdai, walapni busnin dini kidika babung, kidika balna as kidika laih tikini 110 gramos duduwadai, holi pāni tikini kidika laih kaput duwadai. Ispun nunuhni balna kau gol duwadai kidika bitik kat tikini, 1,300 gramos duwadai.

⁸⁷Sakripais karauni kauna busnin dini balna kidika bitik kat turuh ahalmuk wawahma 12, s-ip ahalmuk 12, s-ip kurih as duduwa balna kidika 12 dawak minitdis kalanin dini di minik satni balna kauna, dawak sakripais yamwak dutni dawak disnin yulni kuts ahalmuk 12.

⁸⁸Sakripais yamwi watwi wanaihni karak yamni kalahna atnin tingnilau balna kidika laih bitik kat turuh ahalmuk wawahma 24, s-ip ahalmuk 60, kuts ahalmuk 60 dawak s-ip kurih as duduwa balna kidika bik 60. Adika balna dai minitdis kalanin dini balna, sakripais busnin pāni yakat busnin dai kidika, Papang dini yakna usnitkat.

⁸⁹Moses witing Papang karak kalpaknin ūni labanni yakat kana mani kat, Dawan karak yulbauna atnin, witing dakana dai Dawan yaklau yulkalbauwakat pramis baksni kidika putnin minit kaupak, di lawani bu duldai kidika walsah kaupak.