Read Mayangna Números 8 Bible Online

Números 8 - Mayangna bible

Números 8

¹Dawan yaklauwi Moses yak kalyulna aput:

²“Aarón yak kalyultang kat, awas balna kidika pāni āwi kalawakat yaringni duna karang, awas ilnin pāni nining yakat.”

³Dawan yaklauwi Moses yak kalyulna dai kaput Aarón yamna, awas balna pāni kat lakwi dahlna, awas ilnin pāni nining yakat yaringni kalana.

⁴Awas ilnin pāni kidika gol kau manah yamna dai. Moses yaklauwi yamna, Dawan amput yamnin niningkana dai kaput.

⁵Dawan yaklau Moses yak aput kalyulna:

⁶“Levita balna kidika Israel balna kaupak silp yakta dutnina kidika bitik dis yamtah.

⁷Dutnina dis yamnin kidika aput yama: Man lauwa dutni dis yamnin wasni kau duta rasma, dawakat irisar kau muihnina bitik kakarna karang, kidika kaupak asnina yayana karang; kaput laih maisihni dis kalalahna karang.

⁸Usnit kat turuh almuk bin as dawakat plawar buas dawi disala karak laihwarang bahang kidika di laih minit dis kalanin dini karang, kidika minit yakat turuh almuk bin duwarang walapni busna atnin dutni dis yamnin yulni.

⁹Man lauwa diyultang kat levita balna, kidika Papang karak yulbaunin ūni labanni yaihnit yak uiwarang, dawak Israel balna bitik kalududuhwarang.

¹⁰Usnit, levita balna diyultang kat muhki tani yak yaklauwarang, dawak Israel balna laih tingnina minit yak yuyuwarang.

¹¹Aarón yaklauwi levita balna kidika muhki yak duaiwarang, Israel balna bitik ayangnina usnit yak, dawak kapat laih levita balna, yang diki yamyang dikulna karang.

¹²Usnit dawak levita balna tingnina yuyuwarang turuh almuk bin minit yak bahang kidika tuniruh bin iwarang, dutnina kidika disna atnin, dawak ūk iwarang kidika laih buswarang, levita dutnina disna atnin.

¹³Kidika bayakwak usnit, man lauwa, Aarón dawak walanibis balna, yang kau yata man kidika prinias yamna;

¹⁴kaput laih levita balna, yang diki manah atnin, Israel pas kaupak silp yakma.

¹⁵Kidika usnit levita balna uiwi mahka yang diki yayamwarang. Dutnina dis yamna atnin, yang kau minit dis kalanin kidika yamna ki,

¹⁶ampadawak, Israel balna bitik pasyak, witingna laih yang diki yamnina manah kalkulna. Yang aput didunayang, biri Israel balna walaninabis tatuna batahnwarang kidika yana atnin,

¹⁷Egipto walaninabis tatuna balna ina yang dai, bahang, kulnayang Israel balna walaninabis tatuna batahnwarang kidika yang duna atnin, sihm tinglau balna walaninabis tatuna sahwa kidika bik.

¹⁸Kaunah biri yanin, levita bahna kidika dunayang.

¹⁹Israel balna bitik pasyak, levita balna waltik yaknayang, dawak Aarón dawi walanibis balna tingnina yak ātik danayang, kaput laih Israel balna ayangnina kau kalpaknin ūni labanni yakat wark balna yamna atninna dawak Dawan kaupak dutni dawak disnin lani kidika duna atninna Israel muihni balna dinina. Kaput laih Israel muihni balna kidika holi pāni kidika yaihnit yakat uiwas karang, dawak di dutni as bik dikalahwas karang ki.”

²⁰Dawan yaklauwi, libait balna witing dini yamnin wirlanin yulna dai kapat, Moses, Aarón dawak tawan muihni bitik yayamna dai.

²¹Libait asninana kakawa kidika yannina, kaput witingna maisihni dis kakalna, dawak Aarón Dawan muhni yak dukiuna, minit dis kalanin kalna kidika, dawi dutnina dis yamnin prinias yamna.

²²Adika bitik bayakwak usnit, levita balna mahka uina, kalpaknin ūni labanni yak, Dawan dini yamnin, Aarón dawak walanibis balna karak kalpakwi minitna yak ditatalwak. Dawan Moses yak kalyulna dai kaput levita balna yakat diyamna dai.

²³Dawan yaklauwi levita Moses yak aput kalyulna:

²⁴“Levita muihni balna kurih muihasluih minitkau singka duwa balna kidika, kalpaknin ūni labanni pasyakat, mahka diyamnin ki,

²⁵dawakat, kurih muihasluih bu minit kau salap laihwa mani kat, mahka yakaupak dawi kalahwarang ki.

²⁶Kurih kaput lalaihwarang mani kat, wanaihnina balna, kalpaknin ūni labanni kau di yayamwa yakat, tingninasut lalaihwarang ki.”