Read Mayangna Números 9 Bible Online

Números 9 - Mayangna bible

Números 9

¹Israel balna Egipto kaupak kalalahna kurihni as bayakwak usnit kat, kidika kurihni wainiku tatuna yak, Dawan yaklauwi Moses yak aput kalyulna: Walang kau, Sinaí asangni yak aput kalyulna:

²“Israel balna Egipto sauni kaupak kalalahna mani kidika kuihwak alasna nuhni as yamninna ki,

³yuldarang kat, ma salap minit kau arungka mani kidika kai'kawak, ma ulahu pīsni yak, amput yamnin manayulnayang kaput yamtanama.”

⁴Bahang Moses, Israel balna yak pakna, alasna kidika yamna atnin,

⁵dawak wainiku, ma 14 kuihwakat, walang Sinaí asangni yakat, alasnina kidika yayamna, Dawan Moses kau kalyulna dai kaput.

⁶Kaunah pasyak maisihni duduwa balna bik ban bangdai, kidika laih muih dauna muihni lalaihna kat, kaput bahang, kidika mani alasna sip yamwas dadana dai. Sihm kidika, maisihni dilaihna muih balna, Moses dawi Aarón yakat awi tatalna,

⁷dawak Moses yak aput kalyuyulna: —Yangna, muih dauna muihni laihna mayang, kidika bahang maisihni mailaihna. ¿Yultik dakayangna, alasna yamnin mani yak, Israel balna bitik kalpaktik, Dawan yak minit dis kalanin kidika, yangna bik yamnik sip āwas karang yah?

⁸Moses biri nanitna lana: —Tahatanauh Dawan manna kau ais yamnin kulwarang kidika yuyulwarang kat.

⁹Dawan Moses yak kiwi aput kalyulna: “Israel balna yak adika diyultah:

¹⁰Manna dawak sulamana bitik kalpakta, yang ayangki muhni kulta alasna kidika yamtanama. Angdika muihni, muih dauna laihna kat, maisihni kalkulna, dawak pa ūk naikau uina karang muihni balna laih,

¹¹aput yayamwarang, ma salap minit kau arungka, waiku tatuna kaupak usnit waiku yak, dawak masan nining yakat, sip muihni kidika dibasta tapalhni karak bahawi dawak plawar pupuhnin dini awas busna kidika karak kakaswarang,

¹²dawak yayahni danin awaski payahwak kau dini. Kaput bik wakalni bitik bahnin awaski. Warau tingni kaupak manalaihwi yakna alasna kidika yayamwarang, amput yamnin diyulnayang kaput.

¹³Angdika muihni warau tingni kaupak laihwi yakna alasnina kidika yamwas karang kat, dawak witing muihni yak dutnidis, dawak pa ūk kau bik kaiwas karang kat, wanaihni balna pas kaupak yakwi ipamna karangki. Dawak Dawan yakat minit dis kalanin dini kidika āna yakat dukiwas dai bahang, dutni yulni wah duwarang ki.

¹⁴“Manna pasmangna yakat pa ūk muihni balna yalalahwa kidika bitik insal kaiwi bayakna alasnina kidika yamnin ki, yang ayangki kau, amput yamnin yulnayang kaput. Israel balna awas, dawak Israel balna bik bitik sihm kaput yayamwarang.”

¹⁵Pramis ūni labanni pāni yakat, Papang kau ayangni nuhni yamnin, pāni āna mani kat, mukus kidika muklakna dai. Dawak ma ulahu nining kaupak kuh dahlwa kaput dahlna ma payahwa kat.

¹⁶Ban kaput kalahna dai: madah yakat, mukus kidika ū minit yak bukwa dai, pukta laih kuh dahlwa kapat talna dai.

¹⁷Mukus kidika ū minit kaupak yaklauwak, Israel balna kidika mahka lapapakwa dai, dawak angkat kiwi watwak witingna bik yakat uiwi wawatwa dai.

¹⁸Dawan yaklauwi pakwakat kalpakwi uiwadai ta yakat, kidi awas kat wawatwa dai, mukus kidika ma yapak ū minit yak watwi witkarang kat, Israel balna bik kaput wawatwa dai.

¹⁹Mukus kidika mamahni watwi karang kat, Israel balna mahka yaklauwi Dawan dini yayamwa dai.

²⁰Mukus kidika holi pāni minit yakat watwarang kat, ma parahni, Dawan yaklauwi pakwak lapapakwa dai mahka, kidi awaskat watwi pakwak wawatwa dai.

²¹Buas kat mukus kidika pukta manah watwa dai, dawak payahlawak mahka, yaklauwa dai, kaput witingna bik mahka lapapakwa dai. Madah, pukta karang bik mukus yaklauwak, witingna mahka lapakna dai.

²²Mukus kidika ma bu, waiku as, kidi awaskat kurih as watwarang kat, Israel balna kidika baisa lapapakwas dai, mahka wawatwa dai. Mukus kidika mahka kiwakat, witingna bik mahka uiwa dai.

²³Dawan yaklau yamnin diyulwa laih watwi ūnina labanni papakwa dai, dawak watta man lawa yamnin diyultaman yakat laih yaklauwi lapapakwa dai. Kaput bik, witingna laih Dawan warkni yayamwa dai, witing yaklau Moses yakat yamnin kalyulna dai kaput.