Read Mayangna Miqueas 4 Bible Online

Miqueas 4 - Mayangna bible

Miqueas 4

¹Mani witni balna yakat, asang kau Papang ūni sak kidika ban yakat kaput āna karang. Kidika asangni laih tanit maluihni karang, asang ūk balna karak. Sau muhni balna bitik kidika witing yakat aina karang;

²tawan mahni kidika uiwi kawi yuyulwarang: “Aiwanangkat Papang asangni yakat mailwarang, Jacob Papangni uni yakat, kaput laih witing tani kidika manikingkawang, dawak kaput laih witing tani munah mawarang.” Kat Sayan kaupak kalahwarang ki, Papang maisumalwarang balna kidika, dawak Jerusalén munah yulni balna kidik kaiwarang ki.

³Dawan yaklauwi nisan balna lanina yamwarang tawan mahni kalbibilwa kidika barangni awarangki, pa naikau balna kidika bik. Witingna isninaparah kidika sau tuknin dini yayamwarang, dawak langninasa kidika laih di minik daknin dini yamna karang. Tawan as bik kalbaunin dini laihwi karang ūk niningyakat war kalbaunin sumalnin bik diskarang.

⁴Kaput laih muih kidika yamaduwas yalalahwarang, kaput laih witingna wingninata pupuhwarang wainnina dawak aninina damni panan dinit sanni yakat. ¡Adika laih Papang parasni nuhni bitik duwa kidika yulni balna!

⁵Tawan ūk balna laih daninawan yulni dakakawi, kaunah yangna bik ban yulni dakanaki Dawan, Mapapangki yakat.

⁶Adika Dawan yulwi: “Kidika mani, yang sīpki balna uduhki, wah dianayang balna dai kidika: sakahwa balna, disuhna kidika dawak ruhna balna kidika bik. Kidika wawatna balna karak, nisan as parasni yamki. Yang, Dawan, tawanki yakat kabamint awaki Sayan asangni kaupak, warmani dawak ban kaput atnin.

⁸Dawak, Jerusalén man laih Sayan asangni parasniman, ma laih watta king tawanni nuhni awama, marid yal nuhni man dai kidika.”

⁹Waralaih, ¿ais yamta sarahtamahn, muih yal as muihbin duwarang kat kaldalawak sarahwa kapat? ¿Man yakat king as diskatpah? ¿Kidika awaskat la masumalwa muihni balna dadauna yah?

¹⁰Pihrta sarahta, Sayan tawanni nuhni, yal as muihbin duwarang kat dalawa kapat, kat muihma balna kidika man kaupak kalalahwarang ki, dawak ahni palni yakat witingna yalalahwarang, Babilon kat bik uiwarang ki. Kauna yakat Dawan witing tawanni kidika laihwi yakwarang; waihnila balna kaupak laihwi yakwarang.

¹¹Waradika laih muih mahni kalududuhna manna namangnakauh, bahang aput yuyulwi: “¡Dukih mayawakat yamdi taldarang Jerusalén kidika daukalwakat!”

¹²Kauna kidika ninisan balna amanglalawas ki kulnin lani balna dawak Papang warkni balna bik; witingna amanglalawas ki dukiwi libitwarang kidika sihm plawar minik bahwi uduhwi sitwa kapat yamak kau.

¹³¡Sayan tawanni nuhni lawa sakta unitak kidika yakta! Kat Dawan yulwi: “Yang lawik turuh almuk parasni kapat maki tamni balna kidika ayang, tipisnimak kidika laih bras, kaput laih tawan manas daukalta yawama. Man lawa ritsnina dutni munah duduna kidika dakyakma, dawak yang diki yakma, sau bitik Daniwan kidika yakat.”