Read Mayangna Miqueas 6 Bible Online

Miqueas 6 - Mayangna bible

Miqueas 6

¹Manna dakanauh, waradika Papang di yulwa balna kidika: “¡Lawaman yulma balna kidika asang yakat diyulta, dawak asang balna kidika man yultaman kidika dakakana karang!”

²Asang balna manna dakanauh, sau rahni parasni mana kidika; Papang kidika witing tawanni lani yamwarangki, dawak Israel niningkauh kalbilna karangki.

³Adika Papang yulwi: “Yang tawanki nangkitlata, ¿ais mayamnayang, kidika awaskat, ais yakat mausnayang?

⁴Egipto kaupak mayaknayang, warau tingni kaupak malaihtik yaknayang; Moisés, Aarón dawak María, sihnayang witingna kidika tamanatuna duduna atnin.

⁵Yang tawanki, waradika manna ismangna aitanauh, Moab kingni Balac witing ais yamnin kulna kidika, dawak Beor walanibis Balaam yaklauwi ais kalyulna kidika. Ismangkatta man Sitim kaupak Gilgal yakat lawanama kidika, dawak Papang kalbauwi minit bayakna balna yakat talah.”

⁶¿Ais kau dutik yawakiyah ayangni nuhni yamnin Dawan, Papang makau sakkidika yakat? ¿Witing muhni yakat yawakiyah turuh ahalmuk kurih as lalaihna kidika karak, sakripais karauni kauna buswa kidika yamtik kalanik?

⁷¿Papang kulnin alasna kalahwarang, sīp ahalmuk tausin kalaki kat kidika awaskat disala was murwa kapat kat tausin salap kalaki kat? ¿Kidika awaskat walakibis tatuna kidika kalaki kat dutki balna yamnayang kidika yulni minitlautik kalaki kat?

⁸Dawan yaklauwi uman mayulna, muih al, ais kidika di yamniyah ais tahawi witing kidika man kaupak dunin: la kat yamtah, barangni awah Papangma yakat yulni dakah kulnam mamakun.

⁹Dawan kidika tawan nuhni yakat kalyulwa sakki, sins tuhni duwi, rispik karuk kaldakanin: “Dakanauh, tawan, dawak, muih la sumalyang balna:[6]

¹⁰Muih dudutni ūni yakat malna ritsni sakki, paun kau mamalna kidika dutni talayang.

¹¹¿Amput dutni kidika dating diswarangyah, di balna kidika paun kau āwi muih balna yakat taihwa kidika?

¹²Adika tawanni nuhni paskau di duyang balna kidika laih muih taihyang balna, dawak alas yulyang balna, kaput bik muih bitik laih alas lani manah yayamwi.

¹³Kidika bahang wah makiki, dawak madaukalpamki ki, man dutni yamnaman kidika yulni.

¹⁴Kasma kauna ismanglak-awas karang, bahang man yuh wauhma, kasnin dini balna kidika uduhta duma, kauna di as bik laihta yaktas awama, dawak laihta yakma karang kat wār yaklauwi laih daukalna karang.

¹⁵Dahma kauna minik yaktas awama olib minik kidika tikma kauna salani yaktas awama, kaput bik wain minik kidika atakma kauna wasni laih ditas awama.

¹⁶Ais yamta usnit uinamahn sumalna balna dawak yamna balna kidika Omri, dawak Acab sulani balna, witingna yayamna kapat man bik yamnaman. Kidika bahang man yakat mayamki dawak muihma balna yakat bik muihsak daunin dawak sarahni bik, yang tawanki asalni kidika man mamat yakat bukwarang.”