Read Mayangna Nahúm 3 Bible Online

Nahúm 3 - Mayangna bible

Nahúm 3

¹¡Alakaih man, tawan nuhni ā utuhyang, alas manah bahngna, kal-inin lani manah, taihnin lani kidika saran dis ki!

²¡Wah wiswakat parasni yulwa kidika, kar wīlni balna bayakwak parasni yulwa kidika! ¡Aras kikirak parasni yulwa kidika, dawak truk balna sutwa balna kidika bitik!

³¡Kalbauyang muihni balna kalahwi uiwa kidika, isparah yaringni balna kidika langsa yaringni kidika! ¡Muih di dakna balna kidika tausin ki dawak dadauna balna kidika laih mahni ududuhna ki! ¡Dadauna muihni balna kidika sip kuldi yakdas ki! ¡Muih balna kidika yakat kalnina pakwi!

⁴Adika pātni laih yayal ahal suhlsuhl balna yulnina, kidika yayal nunuhni yaksasihn balna yulnina, sukyah maesnitra balna, witing la bahwi dawak spirit dutni warkni yayamwa kidika, tunan balakwi tawan dawak nisan balna yakat.

⁵Papang parasni nuhni bitik duwa kidika yulwi: “Akat sakyang man namangkauh: Prakma kidika dulautik muhma yakat mukki, kaput laih nisan balna kidika wahma tatalwarang dawak sau muihni balna asalma tatalwarang.

⁶Dawak di maisihni kidika muhma yakat ruhmki, dawak rismapik dis dana awaki, kaput man yakat mayamting kat muih balna kidika matatalna karang.

⁷Muih bitik matalwi kiri aput yuyulwarang: ‘¡Nínive kidika bahwi dis dana! ¿Wais yaklauwi minikun talwarang yah? ¿Witing walaniānin kidika angkat yakwarangyah?’

⁸¿Tebas karak dawak man kauh tanit yamni man katpah, tawan nuhni as Nilo wasni kung kau pakkidika, yaihnit awaih was manah kidika, was murwa kidika laih tanit daknin as ki, dawak was kidika laih kaldaklawi awaihna kidika?

⁹Etiopía dawak Egipto kidika laih man namatdakwa as dai sarandis; Fut muihni balna, Libia muihni balna kidika man karak kalpakna mana dai aslah.

¹⁰Kaput dai kauna, Tebas muihni balna laih laihwi duwi uina pa ūk kau, walaninabis binina kidika laih ruhmwi babahrna ta sipintang yakat; taninatuna nunuhni balna yakat suerte ruruhmna, dawak tunan muihni balna ūk yakat laih laihwi balalakna dai sin kau.

¹¹Dawak man yakat bik wasak mabayayahwarang, sinsma dis dawak maldinin pāni walma waihmala pāni yakat.

¹²Man namatdaknam ū balna paknaman kidika laih sihm ani damni minik batatani laihna sakkapatki, isihdas bik bubukwa kidika, wais kaswa muhni tinipas yakat.

¹³Kalbauyang muihni balna duwa kidika yayal manah kapat ki, adika sauni daklana dūrni balna laih apahna ki waihla balna niningna yakat; kuhpau yaklauwi dūr kini balna kidika busyamna.

¹⁴Wasma ridi alahwah, ma-awaihdadakwak, sip wauhnam, tamat daknin balna kidika baisa parasni yamta. Wasmak yakat awah, dawak sau bibilni kidika ataktah, dawak ladrillo yamnin maulni kidika dutah.

¹⁵Yakat kuh kau mabusyamna karang, dawak isparah kidika laih sisin balna kapat madispamna karang muihma bitik. ¡Sisin kapat kalsahta mahta!

¹⁶Di wauhwi bakanyang balna kidika baisa mahni kalna makau kisang kau yala balna karak dawakat. (Sisin kidika unitak yakpamwi satuk kalwi dawi yaklauwi kiwi).

¹⁷Main matalayang balna kidika laih sisin balna kapat ki; dawak kalbauyang muihni balna walwi uduhyang balna kidika laih sihm dimuih mahni tausin kapat ki: sanni lakwakat ūdang yakat laihwi babangki; dawak ma daihwak mahka yaklauwi uiwi, kauna amangladas ki angkat uiwapa.

¹⁸“¡Sīpma maintalyang balna kidika ampat kamamih, Asiria kingni! Kalbauyang muihni balna tatuna dutaman kidika laih wingninata pupuhwi, dawak kalbauyang balna dutaman kidika laih asangpas yakat pini uiwi, ruhni, dawak muih as bik diski uduhna atnin.

¹⁹¡Maīna kidika laih sinika diski, madakna kidika sip yamwas ki! Man dutni man kidika muih bitik dakawi tingnina titiswi alasna duwi, bahang ¿wais as wauhwas dai dutni yamnaman kidika sarandis?”