Read Mayangna Habacuc 1 Bible Online

Habacuc 1 - Mayangna bible

Habacuc 1

¹Adika yulni balna kuduh Dawan yaklauwi prapit Habacuc yakat niningkana kidika.

²Papang, ¿mampat kat man yakat ilp yultik sarahtingkat yadakas awamayah? ¿Mampat kat kulninna dutni anyang balna yayamwa yulni man yakat mayulting aiwa yalaihta yaktas awamayah?

³¿Ais yamta nikingkatamahn, kulnin kaidinin lani kidika nuhni palni, dawak dutni lani bik? Kulnin anyang dawak bahwi dis yamnin lani kidika ya-awaihdak ki; pa bitik yakat kalbilnin lani dawak kalbaunin lani manah ki.

⁴Lā kat yamwas ki, muih rahmni kidika kalkau atakna ki, dutni kidika yaklauwi yamni yakat uiwi kiwi dawak lā kat kidika dutni yaklawi wirwi.

⁵“Manna talnauh muih balna yakat, awaihdak bangkidika; tala muihsak dautanauh. Dini kidika yamnik manah ki, dawak kidika rahm kultas awanama muih as yaklauwi manayulwarang kat kidika dini.

⁶Caldeo muihni balna yakat wār dulauki, dawak muhni balna kidika muih dudutni ki, dawak witingna laih niningh kukulwi, sau adika sutni nakas kaupak sutni nakas kat kiri awaihwi witingna sauni awas kidika laihwi duna atnin.

⁷Kidika balna laih wayakani dawak yamadadangni ki, la ūk tatalwas ki, kauna witingna lan kamana laih tatalwi.

⁸Aniras balna kidika nawah balna karak tanit parasni kikiri, dawak tanit anyang balna ki kauhmak wanilang sunilu balna[1] karak dawakat. Aras kilyang balna kidika mahni kilwi kikiri, kaput bik naikau tukwi kawi kalbabauwi, sihm yakalnuh witing kasnin dini minit yakat kiwi bukwi laihwa kapat.

⁹Witingna taninapas kau di balna kidika laih bitik daukakalwi, uiwa kidika tapas yakat yamadangni lani manah dahwi uiwi, dawak muihni laihwi silak ahawa kidika laih mahni ki, kuma kauhnimak balna karak dawakat.

¹⁰King balna yakat sarahni tatalwi, dawak muih nunuhni balna yakat bik. Nanit daknin uni yayamna balna yakat talwi niningna kakarana, kidika niningnayakat sau uhwi banghilwi dai kidika munah kilwi kawi kalbauwi dakyayakwi.

¹¹Wing wahni kapat aiwi bayayakwi, witingna dawan tatalwas ki, kauna parasnina duduwa kidika manah tatalwi.”[2]

¹²Dawan, ¿man kidika ban kaput atnin awasman katpah, yang Papangki holi nining dautas ban kaput[3] man kidika? Dawan, takitdakyang man, Caldeo balna yakat man lawa parasnina dianaman kaput laih witingna la kat kidika yamna atnin.

¹³Man laih maisihni as bik disman, dutni kidika ban dana atnam, dawak talkih talna atnam; ¿ampadawak muih dudutni balna yakat ap data ditalaman, ap datamahn muih dudutni balna kidika yaklauwi muih yayamni yakat ihiwak?

¹⁴¿Amput dawak muih balna kidika kuma kau waspa dini balna kapat diyamtamahn, dawak tinglau balna king dis kapat?

¹⁵Caldeo muihni balna nisan ūk balna yakat kawi duduwi di pamyang sihm waspa dini laihwa kapat: kuyuhl kau dawak pamwi laihnin dini ūk kau bik laihwa kidika, usnitkat, bitik uduhwi talwi alasna kalahwi.

¹⁶Kidika bahang, di pamyang kidika witing kuyuhlni dawak waspa dini karhwi laihwa dini kidika dalani talwi, dawak kidika dini balna yakat sakripais buswi, dawak walapni bik buswi, kat kidika dini balna munah kasnin dini yakwi duwa bahang manas palni, dawak bik yamni.

¹⁷Kaput laih ¿Caldeo balna kidika ban waspa dini karhwi lalaihwa di kidika kau ban karhwi mailalaihwarang yah? ¿Ban ihiwarang yah, miniknakun talwas muih balna yakat?