Read Mayangna Habacuc 2 Bible Online

Habacuc 2 - Mayangna bible

Habacuc 2

¹Yang yamni talasak awaki, sihm ma kau kilwi maintalwa sakkapat, talki ais yayulwarang pa Papang, dawak dutni dakik yulnayang kidika yulni ais yayulwarangpa.

²Dawan yaklauwi nangkitlana: “Sau pis labanna balna kau duta ultah, di namangkaki kidika, bahang kaput laihwatwas yamni yulwi talna atnin[4] yulni.

³Baisa mani kaiwi kawas ki, adika dini talda adika kaiwi kalahna atnin; kauna kalahwas karang laih awaski, kalahwarangki. Man laih tahata, ban naiwi kiwarang kapat bik, kat kidika mani palni kidika kiwi kawarang ki.

⁴Ultah, muih dudutni balna kidika laih witingna manah kapat kaldakawi,[5] kauna muih barangni balna kidika laih sangka karang, kat Papang yakat barangni balna bahang.”

⁵Ahal witingna manah kapat kaldakawa kidika laih dukih diawi parasni kidika;[6] yak-urupdas wawalwi, dawak ban baisa dukih diawi, parasni kidika yaklauwi dutni diyamwa karang bik.[7] Tinpas wakakahwi sihm sau ū kapat, isningnalakwaski sihm daunin kapat, kidika bahang witingna kidika uiwi sau balna yakat kalbauwi minit bayakwi duna atnin.

⁶Kauna sau balna dakyakwi duduna kidika balna sarahni diyulwi, kidika muihni balna yakat, dawak aput unbabauwarang: “¡Alakaih, man, man dima-awas balna kidika duta di duyang kaltaman kidika! ¿Mampat kat ban uduhta awamayah muih ritsni wayaki dunaman kidika?”

⁷Ismang aitas man kat didawan balna kidika uiwarang, kulnam dalani mamawa kidika mauswi sahmumuhwarang, dawak asna dis madadawarang.

⁸Muih balna kidika bitik kalpakwi man namang yakat yaklalauwarang, dima balna kidika dakyakwi duduna karang, man lawa dakyakta dunaman kaput witingna yakat. Mayayamwak launa awama dutni yamnaman balna bitik kau, dawak sauni yakat dutni yamnaman kidika, kaput bik tawan nunuhni balna yakat, dawak kidika muihni balna yakat bik, yamnaman yulni.

⁹¡Alakaih man, di malta uma yakat puta bung danaman kidika, di yamadangni balna kaiwa kidika kaupak yakmaldinin yulnin!

¹⁰Kaput yamta, man ūma kidika asalni manah muknaman, dawak daukalnam kidika man alas yamnaman, sau muihni balna manas di daukalnaman yulni.

¹¹Ahnikau daklana kinipala balna kidika, dawak pan rabutna balna kidika bik man namangkauh sararahwarang.

¹²¡Alakaih man, tawanma nunuhni balna dulauta yamtaman kidika, rahni balna laih dutni yamna kidika kau dungtaman kidika!

¹³Papang parasni nuhni duwa kidika yaklauwi warkma kidika dauh yampamwarang ki, dawak walama yaknaman kidika bik, kaput bik laih man wark balna yamnaman kidika kuhpau kau buswi id dana karang.

¹⁴Dawak kaput laih, Papang alas amanglanin kidika laih sau bitik yakat bahngna karang, sihm was balna kidika kuma yakat kiwi bahngwa kapat.

¹⁵¡Alakaih man, yaihmatkau muih balna yakat wasak bayahtamana kidika, wain dawi di dutni karak āta bayahtaman kidika, witingna wahdis dadawak talkuhti!

¹⁶Risnipik nuhni dai kidika, asalma kalahwarang, kat Dawan yaklauwi sutak as mawak dima ki dawak mayamwak Papang sainni disman kidika tatalna karang, dawak ayangma nuhni atnin dai kidika sau yakat bukna karang.

¹⁷Líbano asangni yakat dutni kalyamnaman kidika man namang yakat yaklalauna karang, dawak yakat di balna ita disyamna man kidika yulni bilmalalauwak irama. Kidika laih dutni yamnaman yulni kaiwarang kidika sauni yakat dutni yamnaman yulni tawan nunuhni balna dawak muihni balna niningna yakat.

¹⁸¿Ais ilpni as yah pan kau kidika awaskat simint kau di wayani as yamwi yakwa kidika? ¿Dawak ais as ilpniyah wayani as as alasmanah lani yakat kiwa kidika? Wayani kau yamna balna kidika laih yulbabauwas ki; ¿amput kidika yakat sipyah rahm kalkulna atnin, muih al yaklauwi yamwa kidika?

¹⁹¡Alakaih man, pan kau di wayani yamna yakat sahmuhtah kaltiman kidika, dawak kipala as yulbauwas yakat lawah kaltiman kidika! ¿Sip karang witingna yul as yakwi manayulna atnin? ¡Dikah, kat witingna laih sangka alas duduwas bahang, gol dawi lalah kau manah yayamna karang bik!

²⁰Kauna Papang laih ūni holi yakat sakki: ¡dawak witing nining yakat sau muihni balna bitik ap ki!