Read Mayangna Sofonías 1 Bible Online

Sofonías 1 - Mayangna bible

Sofonías 1

¹Adika yulni kuduh, Papang yaklauwi kalyulna Sofonías yakat, Judá kingni, Amón walanibis Josías mani balna dai yakat. Sofonías kidika Cusi walanibis, dawak Cusi kidika Gedalías walanibis, dawak Gedalías kidika laih Amarías walanibis, dawak Amarías kidika laih Ezequías walanibis dai.

²Adika Papang yulwi: “Sau minitkau di balna bangkidika bitik laih dismukki ki.

³Dismukki ki muih, didauh balna, dawak uhbinina balna, waspadini balna bik, muih dudutni balna kalnina yakat āting bubukwarang ki, dawak sau minit yakat muih bik dispamki ki.” Papang kaput yulwi:

⁴“Judá tawanni yakat tingki yuki ki, dawak Jerusalén kau yalalahwa balna yakat bik. Adika pāni kaupak, Baal kidika bik ustik yakpamki ki, dawak sumalniyang balna ayangnina bitik kau.

⁵U mayak kilwi yala balna kau minitna yuyulwa balna kidika ītik dismukki ki, dawak sihm kidika muihni balna yangkau limbabahwi ayangki kau pramis yayamwi, dawak dawan dauh Milcom ayangni kau bik.

⁶Dawak yangkaupak alahwi uiwa balna kidika bitik ītik dismukki ki, kaput bik yangkau yawawalwas balna kidika dawak, yayulwi bik dakakawas balna kidika bik.”

⁷¡Papang muhni yakat ap awanauh, kat Papang mani kidika ulisna bahang! ¡Papang sakripais as yamwarangki, dawak witing yulwakat aina balna kidika laih witing dini kakalna!

⁸“Sakripais busnin mani yakat tunan muihni balna kidika wah diaki —Papang kaput yulwi—, king walanibis balna yak bik, dawak muih bitik kaninna satuk kakawa balna yakat bik.

⁹Kaput bik wah diana awaki kidika mani dūr kung[1] yakat sutwi kakawa kidika, dawak kalbaunin, alas, kidika mana buhng kidika daninawan balna ūnina.”

¹⁰Adika Papang yulwi: “Kidika mani parasni sarhwi ilp yuyulwak dakakana karang, Waspa dini Dūrni kaupak. Muih kidika sarahna karang, tawan sahyakna bu kidika kaupak, kaput bik asang ububulni binina kidika ihrna karang.

¹¹¡Manna sarahtanauh, tawan sahyakna as kudungni muihni balna mana kidika, kat di wauhwi bakanyang balna[2] bitik dadauwarang ki, yakmaldi lalah kau wark kalahyang balna bitik laih dadauna karang!

¹²“Kidika mani awas as dutik Jerusalén kidika bitik isihtik talki. Wais balna isningnalak, wain uhlana kapat kaldakakawa kidika wah diaki, dawak witingna alas kulninna paskau yuyulwa kidika: ‘¡Papang di as yamwas karang, yamni dawak dutni bik atwa kidika!’

¹³Kidika bahang, ritsnina balna kidika mamalna karang, dawak ūnina balna kidika bitik daukalmukna karang. Unina laih papakwarang kauna yakat kakawas karang; wain yamak laih yayamwarang kauna kidika kaupak wain didiwas karang.”

¹⁴¡Papang mani nuhni kidika ulis dana! ¡Uman ulis dana, sirihni kaiwi! Papang mani parasni yulwarang kidika laih tapalhni palni karang ki: ¡muih isningna dadasni balna bitik sararahwarang ki!

¹⁵Kulnin daukalna mani as karang ki, kaidinin dawak kulnin bukna mani as karang ki, daukalna dawak bahwi dis dana karang, puksani dawak mukus manah pukni karang;

¹⁶trumpit puhwi parasni sarahna mani as karang ki, tawan nunuhni pararasni dawak makau kilwi tatalwa pāni balna kidika niningna yakat karang ki.

¹⁷Papang yulwi: “muih balna kidika diyamting kat isningna ababahlwarang. Miniknapa dis kapat lapapakwarang, kat yang nikingkauh dutni yayamna bahang. Witingna ānina kidika utuhna karang, sau yahamni kapat, dawak witingna muihnina kidika uduhna karang sihm diba kapat.”

¹⁸Papang kulnin daukalna mani yakat, muih balna kidika sip laihwi yayakwas karang, golnina dawak lalahnina balna yaklauwi, kat Papang kulnin daukalna kuhnipau yaklauwi bitik buswi bayakkiwarang ki. ¡Sau muihni balna kidika bitik minit as kat dismukna karangki!