Read Mayangna Sofonías 2 Bible Online

Sofonías 2 - Mayangna bible

Sofonías 2

¹Manna kaluduhtanauh, aslah alahwanauh, asalmana dis muihni balna mana kidika,

²manaruhmlakwas tanit kauh, dibasta kusuni as pini diswa kidika ma as;[3] manna mamatna yakat bukwas tanitkauh Dawan kulnin daukalna daihni kidika; manna mamatna yakat bukwas tanit kauh Dawan kulnin daukalna mani.

³Manna bitik kau Papang waltanauh, adika sauni akat kulnin yudutni duyang balna, dawak witing yulni kat dakayang balna. Barangni awanauh, kaput bik kulnamna yudutni dutanauh, sipkat manna yakmaldinin pāni as yaktanama, Papang anwarang mani yakat.

⁴Gaza tawanni nuhni kidika di dis kalwarang, dawak Ascalón di dis kalna karang; madah palni kangwi yakwarang Asdod yakat yalalahwa balna kidika, dawak Ecrón muihni balna laih rikni kau dutwi yakna karang.

⁵¡Alakaih, manna Creta muihni balna, kuma kung kau yalahtamana kidika! Papang, adika yulni balna manna namangnakauh yulna: “¡Canaán, filisteo balna saunina, madaukalpamki dawak, muihni balna bik dis karang!

⁶Kuma kungkau tawan balna bangkidika sihrsihr manah kalna karang, sip maintalyang balna kalududuhna karang, kaput bik tingninalau balna ānin uni yayamna karang.”

⁷Judá tawanni muihni balna dadauwas yaklalana kidika, witingna panina duduna karang, mampat witingna Papangnina kidika kaiwi tingninasut laihna karang mani yakat, dawak witingna kidika satuk kakalna karang. Kidika yakat witingna tingninalau maintatalna karang, dawak pukta laih yakat yakururupdana karang Ascalón uni balna yakat.

⁸Kaput yulwi, Papang parasni nuhni bitik duwa kidika, Israel Papangni: “Moab muihni balna muih uhuswa kidika dakana yang, dawak Amón muihni balna bik muih uhuswa kidika. Witingna laih yang wanaihki balna yakat uhusna dawak witingna saunina munah nuhni kakalna. Kidika bahang, yang sangkika kau yaktik yultayang Moab laih Sodoma kapat kalwarang dawak Amón balna laih Gomorra kapat kakalwarang, sau as wakal manah ukuswa kapat karang, kuma mainni karang, pa as muih dis ban kaput karang. Yang tawanki muihni dauwas yaklalana balna kidika dinina duduwarang dawak saunina balna bik dakyayakwarang.”

¹⁰Aput witingna minitna duduna karang, Moab dawak Amón karak, Papang tawanni yakat dutni yuyulna kidika yulni, dawak Papang parasni nuhni duwa kidika witing tawanni muihni balna yaihnitna yakat kawi kidika munah nuhni kakalna yulni.

¹¹Papang kidika yamadangni palni karang witingna niningna yakat. Dawan dauh balna kidika bitik laih bahwi dismukwarang, dawak witing manah ayangni nuhni yamna karang pa bitik yakat, dawak kalangsah muihni balna bik.

¹²¡Etiopía muihni balna, manna bik sihm Papang isniparah baini yakat buktamana!

¹³Witing tingni kidika, tingpal niningyakat yuna karang, Asiria kidika bahwi dispamna atnin yulni, dawak Nínive tawanni nuhni kidika di dis dana karang, kauhmak wanilang yampamwarang.

¹⁴ūnina tatni balna kidika apapahwarang, kidika yakat sīp balna kidika kalalangna karang, kaput bik asangpas dini balna bik. Kubam dawak yami balna kidika ūnina rahni makau yakat payayahna dawak kuparis[4] balna kidika yuyulna karang windar balna dawak dūr kung yakat.

¹⁵Kidika tawanni nuhni kuduh, witing manah kapat kaldakawa dai kidika, tawanni muihni balna yuyulwa dai, tawan ūk diski sau akat adika manah tawan yamni ki. ¡Ampat di dis danayah, nawah balna ūnina kalna! Muih yapak kidika yaihnit yakat bayayakwarang kidika wiuhwi muhnina dutni yayamwarang, di dauh as tatalwa yulni.