Read Mayangna Zacarías 1 Bible Online

Zacarías 1 - Mayangna bible

Zacarías 1

¹Darío king kana kurih bu laihna kaupak, waiku tiaskaubās kawa yakat, Dawan yaklauwi adika yulni sihna dai prapit Zacarías munah, Berequías walanibis dawak Ido mani. Bahang kalyulna:

²“Yang, Papang paraski nuhni dutayang kidika, yang uba kulnik daukalnayang dai manna papangmana balna dai kidika niningna yakat. Kaput bahang waradika diyultah yang tawan ki yakat: ‘Yang akat nawatta aiwanauh, dawak yang manna yakat yawaki. Yang Dawanyang kat yultayang.

⁴Muihmana bararak balna yayamna kapat yayamwinih, kidika balna yakat sara mani pranipit balna yaklauwi diyuyulna dai, yang kaupak yulki balna, witingna kulninna dutni kidika dana, dawak dutni yayamwa balna kidika bik danin, kaunah yang yulki dakwas dadana. Yang, Dawanyang kat yultayang.

⁵Kaunah waradika laih, ¿manna muihmana bararak balna dai kidika angkat bangyah? ¿Prapit balna kidika sangka ban karangkatpah?

⁶Kaput kaunah, yang yulki balna, laki balna kidika yang diki yamyang prakipit balna yakat dianayang dai kidika, manna muihmana bararak balna yakat diyuyulna dai. Dawak witingna kidika nawatwi aina dai yang akat, dawak amangkilalana dai yang adika Dawan yang, paraski nuhni bitik dutayang, dawak witingna kulninna dawak ais yayamwa kidika kaput diyamnayang dai.’ ”

⁷Adika yulni kuduh, yang prapit Zacarías, Berequías walanibis, dawak Ido maniyang, bahang Dawan kaupak dunayang dai waiku 11 kaupak ma 24 yakat (Sabat wainiku atwa kidika) Darío king kana kurih bu yakat.

⁸Pukta as kat yang amanakau kapat talnayang: Aras kilyang as talnayang, aniras kidika pauni kat kilnalikkat. Sau langni as kau yaklauna sakdai, burimak walsah yakat, dawak witing dangnit yakat aras buas bangdai, buas papauni, ūk balna kidika papau kapat, dawak ūk balna laih pipihni dai.

⁹Yang yultik dakanayang: “Dawan, ¿aras kilyang balna kidika wais balna yah?” Dawak insal yang karak yulbauwa kidika nangkitlana: “Yang namangkaki wais balna kidika.”

¹⁰Kaput laih burimak walsahkau sakdai kidika yaklauwi yulna: “Adika balna kuduh Dawan yaklauwi sihna kidika sau bitik yakat awaihwi talna atnin.”

¹¹Aras kilyang balna kidika yaklauwi kalyuyulna insal burimak walsah kau sakdai yakat: “Sau adika bitik awaihtik talnayangna, bahang yangna talnayang isninglak ki dawak kulnin bik aslah ki.”[1]

¹²Dawan innisal yaklauwi yulna: “Dawan, parasma nuhni bitik palni dutaman kidika, uman kurih 70 dawi, man Jerusalén niningyakat annaman kidika, dawak Judá tawanni nunuhni balna niningnayakat bik. ¿Ma ampus bayakwarang yah, dalani talasman tanit yakauh kidika?”

¹³Dawan yaklauwi yul dalani, dawak walani ānin yulni balna karak nangnitlana insal yangkarak yulbauwasakdai yakat,

¹⁴dawak usnitkat insal kidika yaklauwi yapakna yulna atnik: “Adika yulwi Dawan parasni nuhni duwa kidika: ‘Yang dalani palni talayang Jerusalén dawak Sayan asangni kidika bik.

¹⁵Kidika bahang kulnik daukalna kidika dahlna ki, kidika ninisan muihni balna di as bik kulwi kalbabauwas balna niningna yakat, yang apis manah kulnik dauklnayang kat witingna yaklauwi dutni kidika baisa dutni yayamna.

¹⁶Kaput bahang, yang, Dawan yang kat yultayang: Waradika laih kulnin minikun talnin karak nawattik aiwayang Jerusalén yakat, bahang yang lawik paktingkat makatyulnin ūni dawak tawanni nuhni kidika bitik watwi laihwi dulauwi yayamwarang.’ ”

¹⁷Kidika minityakat insal kidika yaklauwi yayulna: “Adika bik yultah: ‘Dawan parasni nuhni duwa kidika yaklauwi yulwi: Yamtingkat, tawanki nunuhni balna kidika watwi kasak palni bararakna karang; wattik Sayan yakat wingnita puhnin kidika duwarang, dawak yulki Jerusalén kidika watwi yang tawanki waltik yaknayang as karang.’ ”

¹⁸Amana kapat as ūk talnayang, bahang kidika yakat turuh tamni kapat arungka aiwi kalalahna.

¹⁹Insal yang karak yulbauwasakdai yakat kalyultik dakanayang, tamni balna kidika ais tanka yah, dawak witing yaklauwi nangkitlana: “Adika tamni balna tanka laih parasni balna pa bitik yakat ruhwi kiuna kidika Judá muihni balna dawak Israel balna kaput bik Jerusalén yakat bik.”

²⁰Kidika usnit kat Dawan yaklauwi nikingkana ayan kau di yamyang balna arungka.

²¹Yang yultik dakanayang: “¿Ayan kau di yamyang balna kidika ais yamwi ainayah?” Dawak witing yaklauwi nangkitlana: “Kaput bik laih tamni balna kidika Judá yakat muih ruhna kidika tanka kat, kaput laih muih as bik sip tunan dulauwas dai, ayan kau di yamyang balna adika laih aina ki muihsak daunin kidika kalalawak yukna atnin, dawan nisan balna tamnina daknin, witingna tamnina kau papawak Judá muihni balna pini ruhna.”