Read Mayangna Zacarías 11 Bible Online

Zacarías 11 - Mayangna bible

Zacarías 11

¹¡Líbano, dūrma balna kidika apahtah, dawak kuhpau yaklauwi suhunma balna kidika buswi disyamwang!

²¡Aidah, awas panan, kat suhun kidika bukna bahang, kat kidika balna pan nunuhni yaksisihni balna daukalmukna! ¡Ihtanauh manna, Basán kirahni balna, kat asangpas tubakni kidika bitik laih sau yakat bukna ki!

³Parasni sarahwi kakaidi sumalyang balna, kat sihrsihr tubakni kidika daukalna bahang. Layan ihwa kidika dakawi, kat Jordán asangnipas tubakni kidika daukalna bahang.

⁴Adika yayulna, yang Dakiwan: “Sīp balna inin pāni yakat dukiunin kidika maintalah.

⁵Bakanwi duyang muihni balna kidika ihiwi pāt dis kapat kaldakawi, dawak wauhwi bakanyang balna kidika yuyulwi: ‘¡Dawan yakat tingki, yang di duyang yang!’ Witingna sumalninayang palni yakat bik minikun tatalwas ki.

⁶Bahang sihm kaput bik, yang lawik adika muihni balna adika sauni akat yalalahwa balna yakat miniknakun talas awaki, nawatni kauh laih witingna yaihnitnakau muih ūk balna kidika dawak kingnina tingni yakat bik āki. Adika balna yaklauwi sau adika daukakalwarang, dawak kidika balna tingnina kaupak muih as bik laihtik dakyaktas awaki. Yang, Dawanyang kat yultayang.”

⁷Kaput laih sīp balna inin pāni yakat duwi kiunin dini balna kidika maintalnayang. Kaunah yamnayang, kidika warkni yamwi lalah yakyang balna ayangnina kau.[12] Dawak tulnah bu yaknayang: As ayangni paknayang “Yamni atnin” dawak ūk kidika laih “Aslah libitna”.

⁸Dawak waiku aslah pasyakat sumalyang balna bās kangnayang, kat kulnik laihwatnin kidika dahnkalna dai bahang, witingna yang akat dutni yakukulwadai.

⁹Dawak sīp balna yakat diyulnayang: “¡Yang wattik manna sumalmanayang awas awaki! ¡As daunin karangkat dauwang! ¡As ihiwarangkat, ihiwang! ¡Dawak wawatwarang balna kidika laih, biri biri kalkakaswang!”

¹⁰Kaput laih tulkinah ayangni “Yamni atnin” kidika dunayang dawak bahnayang, kidika sainni laih Papang witing pramis as yamna dai kidika nisan balna bitik kau dauh kalna.

¹¹Kidika mani pranimis dai kidika dauh kalna, dawak sīp balna bakanwi lalah yayakwa muihni balna talwabangdai kidika amanglalana, yang yamtayang balna kidika munah Dawan yulbauwadai kidik.

¹²Kaput laih diyulnayang: “Witingna yamni kapat tatalwa kat, minitlauwi yayawang; kidika awaskat dadawang.” Dawak minitlauwi yayana lalah dadasni 30.

¹³Dawan yaklauwi yayulna: “Kidika lalahni dadasni balna dutah, minit praisni yamni as yaahawada kidika, dawak makatyulnin ūni lalahni baksni yakat atah.” Dawak yang lawik lalah dadasni 30 kidika dutik makatyulnin ūni lalahni baksni yakat ānayang.

¹⁴Kidika usnit kat tulnah as dai kidika bahnayang, ayangni “Aslah libitna” dai kidika, kaput laih Judá dawak Israel karak kalwirah dai kidika bahwidis dana.

¹⁵Dawan yaklauwi yayulna: “Dawak waralaih sumalyang as warkma yamni yamtasman kapat awah.

¹⁶Kat adika sauni akat sumalyang as āki ki, sīp balna didisna kidika yulni apisbik kulwi kalbauwas muihni kidika, didisna balna kidika bik walwas karang, muihnina dakna balna kidika bik laihwi yamwas karang, di bayahwas karang parasninadis dana balna kidika, nawatkauh laih salani balna kidika kaswarang, tipisnimak balna bik dawas karang.

¹⁷¡Alakaih, sumalyang di sipawas sīp balna ruhmwi dawa kidika! ¡Isparah kidika witing tingnipal yakat kiwi bukwang, dawak minikpa tingnipal niningkauh yakat bik! ¡Tingni kidika kusulawang, dawak minikpa kidika bik di as bik talwas kawang!”