Read Mayangna Zacarías 12 Bible Online

Zacarías 12 - Mayangna bible

Zacarías 12

¹Adika kuduh Dawan yulni yulwa kidika Israel yakat. Dawan, witing kisang yamna kidika, dawak sau akat bik rahni āna kidika, dawak muih al yakat bik sangnika kalana kidika, aput yulwi:

²“Yang, Jerusalén kaupak yamtayang wain sutak kau utuhna kidika, dawak kidika yaklauwi yaihnit kau muih balna bitik wasak dilaihwa kidika. Kidika yaklauwi Jerusalén kidika awaihdadakwarang kat, Judá kau tawan nunuhni ūk balna kidika bik niningyakat kalbabauna karang.

³“Kidika mani yang lawik Jerusalén kidika kipala tikini as yamki nisan balna bitik niningna yakat. Wais dulaunin yamwarang kat kaldakna karang. Nisan balna bitik kalududhwarang Jerusalén niningyakat,

⁴kaput dawak, aras balna kidika bilninalauting kat kikirarang, dawak aras kilyang balna kidika sinsnina diswarang. Judá sulani balna kidika maintalki, dawak nisan balna aninaras balna kidika bitik laih miniknapa pukni yamki.

⁵Kidika talwi, Judá muihni kalbauyang tunan balna kidika yuyulwarang witing alas kulninna yakat: ‘Dawan parasni nuhni duwa kidika laih, Jerusalén muihni balna Papangnina, witing yaklauwi parasnina diawi.’

⁶“Kidika mani yamki Judá muihni kalbauyang tunan balna kidika laih kuh tuturni kuh paskau dahlwa kapat karang, dawak bik plawar minik dakwi uduhna kat kuh buswa kapat karang. Dibusna karang, tingninapalni, wadahnina yaihnit kau nisan balna bitik kidika, kaunah Jerusalén muihni balna laih watwi tawannina nuhni yakat yalalahwarang.

⁷Kaunah tatuna laih, yang, Dawan, Judá muihni balna kidika laihtik yakki, kaput laih Devid sulani balna tanit yamni dikulna kidika baisa baraknin awas yulni, dawak Jerusalén muihni balna bik, Judá sulani balna minitna yakat.

⁸Yang, Dawanyang, Jerusalén kau yalalahwa balna kidika nanitnadakki. Parasninadis balna kidika, tanit pararasni kakalna karang sihm Devid kapat, dawak Devid sulani balna laih Papang kapat karang, Dawan innisal kapat, witingna tanitna yakat kiwa kidika.

⁹“Kidika mani, angdik ninisan kat Jerusalén niningyakat kalbauwarang kat yang lawik daukalpamki.

¹⁰Makatyulnin dawak minikun talnin spiritni kidika bungdaki, Devid sulani balna dawak Jerusalén muihni balna yakat bik. Kaput laih witingna pawi ahllalana kidika tatalwarang, dawak yayamwarang kulninna bahna dalani kidika, kaput bik kakaidarang witing yulni, muih walanibis aslah kidika awaskat walanibis tatuna kidika dauwak kaida kapat.

¹¹Jerusalén yakat nuhni yayamna karang kulninna bahna dalani kidika, dawan dauh Hadad-rimón kau kulnin bahna dalani yayamwa kapat, Meguido wanilang yakat.

¹²Walaninabis balna kat kat, witingna silp silp kulnin bahna dalani kidika yayamwarang sauni yakat: Devid sulani balna, yayal balna bik; Natán sulani balna, dawak witingna yalnina balna bik;

¹³Leví sulani balna, dawak yalnina balna bik; Semei sulani balna, yalnina kauna;

¹⁴dawak sulani ūk balna bik kaput karang, witingna sip sip uiwarang, yalnina balna karak.