Read Mayangna Zacarías 14 Bible Online

Zacarías 14 - Mayangna bible

Zacarías 14

¹Dawan mani kidika kaiwi, dima dakyayakna balna dai kidika, Jerusalén, man pasmang yakat sahyakwi yuna karang.

²Kidika mani, Dawan yaklauwi uduhna karang nisan balna bitik kidika, Jerusalén niningyakat kalbauna atnin. Dawak tawanni nuhni kidika dakyakwi duna karang, ūni balna kau di balna kidika bitik yakwi duduna karang, yalnina balna yakat laihwi dutni diyayamna karang, dawak muihni balna kidika papuswayah laihwi duwi uina karang. Dawak sutni kidika laih yakat wawatna karang.

³Kidika usnit kat Dawan yaklauwi, kidika ninisan balna niningna yakat kalbauna karang, kalbaunin mani kalbauwa kapat kalbauna karang.

⁴Kidika mani, Dawan witing kalni kidika Olib asangni tuna sutni yakat taihna karang, kidika laih Jerusalén muhnit yakat sakkarang, ma kilwa niningyakauh. dawak langni nuhni as karang, ma kilwa kaupak ma kawa kat, Olib asangni kidika bu sahyakna karang. Asang sahyakna as kidika tingpal niningyakat kiwarang, dawak papuswayah ūk kidika laih wadah niningyakauh kiwarang,

⁵dawak manna laih iranama kidika asang bu walsahkau langni kidika munah, kidika laih Azal kat kiuna karang, nakasyakau. Manna iranama, tanit manikau muihmanabararak balna sau isihwak kikirana kapat, bahang kidika laih kalahna dai Judá yakat Ozías king kawa mani balna dai yakat. Dawak kaiwarang Dawan, yang Papangki kidika, witing yakat barangni balna kidika karak kalpakwi.

⁶Kidika mani, sanni diskarang ki, dawak sanni palni bik.[14]

⁷Kidika mani manah karang ki, kidika laih Papang manah amanglawarang ki. Witing yakat satuk awas karang ki madah dawak pukta karak, pukta karang bik ban yaringni karang ki.

⁸kaput laih Jerusalén kaupak was sanni kalahwarang, dawak kidika wasni laih kirarang wasma yakat bik dawak kurih karang bik ban, bahang kidika wasni papuswayah laih Kuma Dauna yakat kiwi kawarang, dawak papuswayah ūk kidika laih Mediterráneo kumani yakat kiwarang.

⁹Kidika mani Dawan kidika sau bitik minityakat king kawarang. Dawan laih witing manah karang ūk diskarang, dawak witing ayangni bik kidika manah aslah karang.

¹⁰Kidika sauni bitik laih walang manah kalna karang, Gueba kaupak Rimón kat, Jerusalén wadah niningkauh yakat. Jerusalén kidika laih mayakauh karang, dawak kidika pāni yakat muih yalalahna karang, Benjamín dūrni kaupak dūr sipintang as yakat (muhnilau kau dūr umani sakdai kidika) dawak makau kilwi talnin pāni Hananeel kau sakdai kidika kaupak king dinisala yayamwa pāni kat.

¹¹Agha, Jerusalén kidika yakat muih yalalahna karang, dawak watwi daukalpamwas karang. Dawak kidika muihni balna kidika yamadangni dis yalalahwarang.

¹²Kaunah nisan balna Jerusalén niningkauh kalbabauna balna kidika laih, Dawan yaklauwi parasni palni wah diana karang: dawak witingna sangka yakauna muihnina balna kidika dutlana karang, dawak miniknapa kidika bik dutlana karang, tunina bik tininapas yakat dutlawarang.

¹³Kidika mani Dawan yaklauwi muihsak manah dibahngna karang. Witingna aslah kidika muihni tingni kidika laihwi dulalauwarang biri biri.

¹⁴Kaput bik laih Judá kidika kalbauna karang Jerusalén yakat, kaput laih yaihnitna kau nisan balna kidika kaupak lalah, gol dawak asna bik mahni palni dakyayakna karang.

¹⁵Sihm kidika wahni muih balna minitna yakat bukwarang kidika, tinglau balna minitna yakat bukna karang, aras, muyul, kiamil, biriku dawak tinglau balna bitik waihla balna duduwa kidika ūnina labanni yakat.

¹⁶Kidika usnit kat, Jerusalén niningkauh kalbabauna muihni balna dauwas yaklalana balna kidika witingna kurih kaiwa bitik yakat uiwi king yakat ayangni nuhni yayamna karang, Dawan parasni nuhni bitik duwa kidika yakat, kaput laih ū lababanni pan tingni kau ilwi dawi kakawa alasnina kidika yayamna karang.

¹⁷Dawak nisan balna pasyakat muih as kat kiwi king yakat ayangni nuhni yamwas karang kat, Dawan parasni nuhni bitik duwa kidika yakat, witing sauni yakat waslauwas karang.

¹⁸Egipto muihni balna kidika uiwas karang kat, Dawan yaklauwi wah diana karang, angdika ninisan karang bik witing kiwi kidika alasnina yamwas karang kat sihm wah duna karang.

¹⁹Kidika karangki Egipto wah duwarang kidika, dawak nisan ūk balna bitik kidika alasnina yakat uiwas karang balna kidika.

²⁰Kidika mani aras dininamak kau lingnin dini duwa kidika yakat bik ulna karang “Dawan dini yakna”. Dawak makatyulnin ūni kau suba nunuhni balna kidika Papang dini yakna karang, dawak sunitak nunuhni balna sakripais busnin pāni muhnitkau bangkidika.

²¹Suba balna bitik Jerusalén dawak Judá kau bangkidika Dawan parasni nuhni bitik duwa kidika dini yakna karang. Wais kat sakripais yamna kiwarang kat kidika dau duwi yamna karang sakripais, dawak kidika kau duwi dimuihni kidika lahwarang. Kidika mani, di wauhwi bakanyang balna kidika diskarang, Dawan parasni nuhni bitik duwa kidika ūni yakat.