Read Mayangna Zacarías 2 Bible Online

Zacarías 2 - Mayangna bible

Zacarías 2

¹Dawak di ūk bik, amana kau kapat talnayang. Muih al as kaiwi kalahna, bahang witing laih tingni yakat kulwi talnin wahni as duwalikdai.

²Dawak yultik danayang: “¿Angkat yawamahn?” Dawak witing yaklauwi nangkitlana: “Jerusalén tawanni nuhni kidika kultik talki ki, naiki kidika dawak panuhni kidika bik ampuspa.”

³Kaput laih talnayang insal yang karak yulbauna kidika mahka kiwak, dawak insal ūk kalahwak kalpapakna

⁴dawak kalyulwadai: “Ira yawa kalyultah wahma as kulwi talnin wahni dukiwa kidika yakat: ‘Jerusalén kidika watwi muih uiwi yalalahwarangki, dawak muihni balna kidika mahni karangki, dawak tuninaruh balna bik daklawi dunin sip awas karang ki.

⁵Kaunah Dawan yulwi: Yang laih daklana as kuhpau kapat awaki Jerusalén yaihnit yakat, dawak tawan papus yakat yang alaskina yaksihni kidika niningkana awaki.’ ”

⁶Dawan aput yulwi: “Yang lawik yamnayang, manna kidika pa bitik yakat manaruhna atnin. Kaunah waralaih manayultayang: ¡Tingpal niningkauh sauni kidika kaupak iranauh! ¡Babilon kaupak iranauh, manalaihwi manaduwi uina kidika kaupak, Sayan yakat yalahtamana dai kidika! Yang, Dawan yang kat lawik yultayang.”

⁸Dawan parasni nuhni duwa kidika adika yulni karak yasihna, nisan balna manna dimana dakyayakna balna niningna yakat diyulna atnin: “Wais karang bik yang tawanki yakat uswarangkat, kidika laih sihm buihbin yal mikpa kapat[2] talayang yakat uswa kapat ki. Kidika bahang yang palni kalbauna awaki kidika ninisan balna niningna yakat, dawak diyamtingkat witingna warau duduwa kidika balna yaklauwi dinina kidika bitik laihwi duduna karang.” Kaput yamtik Dawan parasni nuhni bitik duwa kidika alasnina yaksihni kidik lāih yakki, dawak kaput laih manna amanglatanama witing yaklauwi yang akat yasihna kidika.

¹⁰Dawan yaklauwi aput karangti: “¡Alasna unbautanauh, Jerusalén muihni balna, kat yang aiwayang witingna pasningna yakat yalahna atnik!”

¹¹Adika kaput kalahwak, nisan balna manas Dawan yakat aiwi aslah kalalahwarang. Dawak witing yulwarang: “Adika ninisan balna bik yang tawanki balna karang. Dawak kaput laih yang manna pasmangna yakat yalahki.” Kaput laih manna amanglatanama Dawan parasni nuhni bitik duwa kidika yaklauwi yasihna kidik.

¹²Kaput laih Dawan watwi Judá kidika witing dini palni kapat duna karang, holi sauni yakat, dawak watwi bik yulna karang, Jerusalén kidika witing tawanni nuhni walwi yakwi duna.

¹³¡Sau muihni balna bitik ap atnin Dawan niningyakat, kat witing laih mayang akat kaiwi, witing pāni holi yalahwa kidika kaupak!