Read Mayangna Zacarías 4 Bible Online

Zacarías 4 - Mayangna bible

Zacarías 4

¹Kaput laih insal yangkarak yulbauwasakdai kidika nawatwi kaina, dawak yasahmuhna, muih as kamasakkat uswi sahmuhwa kapat. Dawak yayulwi dakana:

²“¿Ais talamahn?” Dawak nangnitlanayang: “Talayang awas ilnin pāni as gol kau yamna kat, dawak minit yakat awas wasni punin as ilnasakkat. makau yakat awas tiaskaubu duwi, bahang kidika balna yakat wasni kidika kiwi tubo tiaskaubu kidika balna munah.

³Awas ilnin pāni yakat olib bu rauki, as laih tingnipal yakat dawak ūk kidika laih wadahni yakat.”

⁴Insal yangkarak yulbauwa kidika yakat kalyultik dakanayang: “Yang Dawanki, ¿ais tanka yah adika?”

⁵Insal yaklauwi nangkitlana: “¿Ais tanka kidika amanglatasmahn?” Yang kalyulnayang: “Dikah Dakiwan.”

⁶Dawak witing baisa yulna: “Adika yulni laih Dawak yulwi Zorobabel yakat: ‘Kalbauyang muihni balna kaupak bik awaski, dawak parasni kau bik awaski, kaunah yang Spiritki munah ki, Dawan kaput yulwi parasni nuhni bitik duwa kidika.

⁷¿Man kidika waismahn, asang nuhni? ¡Zorobabel muhni yakat sau langni kalma! Witing yaklauwi kipala tatuna kidika yakwarang, muih balna kidika sarahwi aput yulwabangkat: ¡Ampat nuhni yaksihnyah! ¡Ampat nuhni yaksihnyah!’ ”

⁸Kidika usnitkat Papang yaklauwi yul ūk yana:

⁹“Zorobabel yaklauwi makatyulnin ūni rahni kidika ukna ki, bahang witing yaklauwi yamwarangki dahn kat.” Kaput laih manna amanglatanama yang adika Dawan parasni nuhni bitik duwa kidika yaklauwi yasihna kidika.

¹⁰“Kidika balna rahm kukulwasdai kidika tatuna binin as bahwa kidika, waradika laih witing alasna duduwarang, Zorobabel yaklauwi adika warkni bitik witni kat yamwak.” Kidika usnit kat, insal kidika yaklauwi baisa minit yakat lakwi yulna: “Adika awasni tiaskaubu adika laih Dawan minikpa, kidika balna kau sau bitik yakat talwi.”

¹¹Yang lawik kalyultik dakanayang: “¿Ais balnayah olib bu adika, awas pāni tingnipal kau as dawak wadahni kau as kidika?”

¹²Adika bik kalyultik dakanayang: “¿Ais tanka yah olib tingni rahni bu gol tunibo yaihnit kau kidika, kidik tunibo munah awas wasni kiwa kidika dahlwa sakyakat?”

¹³Insal yaklauwi nangkitlana: “¿Amanglatamahn ais tanka yah?” Kalyulnayang: “Dikah yang Dawanki.”

¹⁴Dawak witing yaklauwi nangkitlana: “Adika balna bu kidika yaklauwi Papang dini yakna, Dawan dini yamna atnin sau bitik yakat.”