Read Mayangna Zacarías 6 Bible Online

Zacarías 6 - Mayangna bible

Zacarías 6

¹Amana kapat ūk talnayang. Kalbaunin kārni balna arungka aiwi kalalahwak talnayang, bras asangni bu walsah yakat.

²Kār tatuna kidika laih aras papauni kat sitna kat mumurwadai, dawak kidika kaupak kār bu kidika laih aras sani kat mumurwadai;

³dawak kidika kaupak kār bās yakat laih aras pipihni kat mumurwadai, dawak kār arungka yakat laih aniras balna kidika bulni sani pihni karak kat mumurwadai.

⁴Insal yangkarak yulbauwa yakat kalyultik dakanayang: “Yang Dawanki, ¿adika ais tanka yah?”

⁵Insal yaklauwi nangkitlana: “Adika balna kuduh wing arungka kidika, Dawan muhni kaupak kalalahwa kidika sau bitik yakat.

⁶Kār aras sani balna mumurwa kidika laih tingpal niningkauh sauni yakat uiwi; dawak aras pipihni sitna balna kidika laih ma kawa yakat uiwi; dawak aras bubulni pihni sani karak balna kidika laih wadah niningkau sauni yakat uiwi.”

⁷Dawak aras bulni pihni sani karak kidika kalahwi uina, sau bitik yakat awaihwi talkih dai. Insal kidika yaklauwi diyulna: “Sau kidika bitik awaihta talnauh.” Dawak witingna kaput yayamna dai.

⁸Kidika usnit kat, insal kidika parasni sarahwi yayulna: “¡Talah, tingpal niningyakat uina kidika laih, kidika sauni yakat Dawan kulnin daukalna kidika sanni yayamwarangki!”

⁹Dawak yaklauwi adika yulni balna yana:

¹⁰“Lalah uduhtah, Babilon yakat laihwi duwi uiwak nawatwi aina balna pasyakaupak: Heldai, Tobías dawak Jedaías. Usnit kat, sihm kidika mani, Sofonías walanibis Josías ūni yakat yawah.

¹¹Lalah dawak gol bik uduhnaman kidika kau kraun yamtah, dawak Josadac bis sumalyang nuhni Josué tunan yakat paktah.

¹²Dawak kalyultah: ‘Dawan parasni nuhni bitik duwa kidika yulwi, al as ayangni sulani, kidika rikni kaupak ukuswi kalahwarang dawak Dawan ūni kidika watwi laihwi dulauwi yamwarang.

¹³Dawan ūni kidika watwi laihwi dulauwi yamwarang, dawak king risnipik kidika duwarang. Witing trunni yakat yalahwi kabamint kawarang, dawak trunni yaihnit yakat sumalyang kidika yalahwarang, dawak witingna albupak kulninna aslah kidika sakkarang.

¹⁴Dawak kraun balna kidika laih isningkatwa atnin dini as karang bahang makatyulnin ūni yakat wawatna karang, Heldai,[6] Tobías, Jedaías dawak Josías,[7] Sofonías walanbis kidika balna risninapik kau.’ ”

¹⁵Pa naikaupak muih kaiwarang, Dawan ūni kidika tingnisut laihwi yamnin; dawak kaput laih manna amanglatanama Dawan parasni nuhni duwa kidika yaklauwi yasihna. Adika kaput kalahna karang manna Papangmana Dawan yakat kaldakanama, dawak yulni yakat bik yamtanama kat.