Read Mayangna Zacarías 8 Bible Online

Zacarías 8 - Mayangna bible

Zacarías 8

¹Dawan parasni nuhni bitik duwa kidika yaklauwi adika yulni yana:

²“Adika kuduh, Dawan paraski nuhni bitik dutayang kidika, yultayang kidik: Sayan yulni nuhni palni minit antayang, kulnin daukalnin karak minit antayang.

³Bahang nawattik yawinik ki Jerusalén yakat, kidika yakat yalahna atnik. Kaput laih Jerusalén kidika kalyulna karang tawan nuhni as barangni ki, dawak Dawan parasni nuhni bitik duwa asangni kidika laih kalyulna karang asang Holi.

⁴Muihbarak ahal, yayal watwi muih kalududuhwa pāni yakat yalalahna karang, dawak tulninanah karuk uiwarang uba muihbararak kakalna kidika yulni.

⁵Walabis ahal, yayal, tawan nuhni kau muih kalududuhwa pāni kidika buhng dawarang, dawak kidika yakat yakikisdarang.

⁶Kidika mani, witingna miniknapa yakat tatalwa kidika sip awas kapat karang, yang tawanki kau watna balna muihni kidika, kaunah yang laih kaput talas awaki. Yang Dawan paraski nuhni bitik dutayang kidika yultayang:

⁷Yang tawanki kidika laihtik yakki ma kilwa dawak ma kawa kidika niningkauh sauni balna parasnina kaupak,

⁸dawak Jerusalén yakat duaiki, kidika yakat yalahna atnin. Kaput laih witingna kidika yang tawanki karang, dawak yang laih witingna Papangnina awaki, barangni lani karak dawak lā kat lani karak.”

⁹Dawan parasni nuhni duwa kidika adika yulwi: “Baisa apis parasmana yaktanauh, manna kidika mani balna yakat prapit balna yuyulwak dakanamana kidika, Dawan parasni nuhni bitik duwa kidika ūni yamnin yulni rahni uhukna kidika mani kaupak.

¹⁰Kat warmani balna kat, muih ahal minitna kidika lalauwaski dawak wark tingnilau balna bik. Dawak waihla balna kidika yulni, muih balna kidika kulnin aslah lani disdai, dawak yaklauwi muih balna kidika biri biri yamni awas atnin kidika ānayang dai.

¹¹Kaunah waralaih, adika tawanni muihni balna buas wawatna kidika, tatuna kau dai kapat laih yamtas awaki. Yang Dawan parasni nuhni bitik duwa kidika yulwi.

¹²Kat kulnin aslah lani kidika laih witingna pasyakat dahna karang bahang. Wainnina yamak kidika minik yakna karang; dawak sau bik kalawak minik yakna karang; dawak kisang kidika bik diwas sihna karang. Dawak yang lawik kidika balna bitik diana awaki adika tawanni muihni balna wawatna karang kidika balna yakat.

¹³Dawak kaput bik manna Judá dawak Israel muihni balna mana kidika, blisin dutni kidika nisan ūk balna diana kidika pasyakat manna yakat bik manana dai, kaput laih warmani yang manalaihtik yakki, dawak blisin kidika manaki. ¡Yamaduduwinih! ¡Baisa apis parasmana kidika yaktanauh!”

¹⁴Dawan parasni nuhni duwa kidika adika yulwi: “Manna muihmanabararak balna kidika yakat wah dianin yamnayang dai, witingna yaklauwi yayamwak kulnik daukalna dai bahang.

¹⁵Waradika laih nawatnikauh, Jerusalén dawak Judá yakat bik yamni diyamnik kidika kulnayang. Kaput bahang, yamaduduwinih.

¹⁶Adika kuduh manna nining ban kaput yamnamna kidika: Manna biri biri yul rahm kidika yultanauh, dawak la kat kidika yamtanauh, dawak la yamnin pāni yakat kulnin aslah kidika dunin waltanauh;

¹⁷manna biri biri dutni kalyayamwinih, alas bik Papang ayangni kau yakta yuyulwinih. Kat kidika balna bitik yang dutni talayang. Yang Dawanyang kat yultayang.”

¹⁸Dawan parasni nuhni bitik duwa kidika yang yakat kiwi yayulna:

¹⁹“Yuh wauhnin kidika waiku arungka, singka, tiaskaubu dawak salap yakat, kidika balna laih alasna yakat wirlana karang, dawak kidika laih alasna as isninglak karang Judá sulani balna dinina. ¡Di rahm kidika dawak kulnin aslah lani kidika manna dalani talnauh!”

²⁰Dawan parasni nuhni duwa kidika yaklauwi adika yulni yulwi: “Baisa muih ainin ki tawan nunuhni muihni balna manas.

²¹Kaput laih tawan nuhni muihni balna kidika yaklauwi tawan nuhni ūk muihni balna yakat diyuyulwarang: ‘¡Dawan parasni nuhni bitik duwa yakat waldi mawang, dawak kalyuldak blismaiyamwarang!’ Dawak ūk balna kidika yaklauwi nangnitlalawarang: ‘¡Yangna bik yawanaki!’

²²Dawak Jerusalén yakat aina karang tawan balna mahni dawak nisan balna bik mahni, Dawan parasni nuhni bitik duwa yakat walwi, dawak witing blisinni kidika walwi.

²³Kidika mani balna yakat, nisan balna pa ūk kaupak kidika salap kalahwi Ju muihni balna praknina yakat lalaihwarang dawi diyuyulwarang: ‘¡Yangna yawakih yanawi, kat yangna dakanayangna Papang kidika manna karak ki!’ ”