Read Mayangna Zacarías 9 Bible Online

Zacarías 9 - Mayangna bible

Zacarías 9

¹Adika yulni kuduh Dawan yaklauwi isningnapakwadai kidika, Hadrac dawak Damasco tawanni nuhni sauni kidika niningyakat: “Siria tawanni nunuhni balna[8] kidika laih Dawan dini balna, sihm Israel sulani balna kapat.

²Hamat bik witing dini, kidika tawanni nunuhni balna yaihnitkau kidika, dawak Tiro, Sidón witingna yalalahwa lani balna bitik.

³Tiro laih ū pararasni balna kidika yamna, dawak uduhna gol dawak lalah bik, muih as wasmak kuhrwi uduhwakapat.

⁴Kaunah Dawan yaklauwi kidika balna bitik dakyakna karang, dawak ritsni balna kidika bitik laih kuma yakat ruhmna karang, dawak tawanni nuhni kidika bitik laih busna karang.

⁵“Ascalón tawanni nuhni kidika dini talwarang kat, muihsak dauwarang. Gaza bik kasak wauhna karang, dawak Ecrón witing tahanin as duwadai kidika saukat bukna karang. ¡Gaza kidika king dis kalwarang, dawak Ascalón muihni dis kalna karang!

⁶Asdod yakat yalalahna karang muih āni sat ūk karak kalbananana balna kidika, dawak kaput laih filisteo balna witingna manah kapat kaldakakawa kidika sau kat bubukna karang.

⁷Dawak witingna tininapas kau dimuihni ā manah kakaswa kidika dakyakna awaki, ananina kaupak, kasnin dini dutni dai kidika kakaswa kidik. Kauna kidika muihni balna kaupak as as wawatna karang yang diki atnin yulni; bahang kidika laih Judá yakat kana karang, dawak Ecrón laih Jebuseo balna kapat karang.

⁸Dawak yang laih yakat manah talasak awaki, yang diki balna kidika nanitdakna atnin wais kidika munah bayakwarang kidika niningyakat. Muih taihyang muihni kidika watwi muih taihwas karang, kat waralaih yang mikpa palni kau maintalayang bahang.”

⁹¡Alasna nuhni dutah, Sayan tawanni nuhni! ¡Alasna unbautah, Jerusalén tawanni nuhni! Man kingma kidika man yakat kaiwi, barangni dawak minit bayakna kidika karak, kaunah kulnin limahni, biriku almuk as kau kilwi kaiwi, biriku almukbin as kau, biriku yal walanibis kidika.

¹⁰Witing yaklauwi Efraín kārni balna kidika daukalmukwarang, Jerusalén aniras balna dawak kalbaunin lasni balna kidika bik. Nisan balna yakat diyulna karang kulnin aslah lani kidika dawak, kuma as kaupak kuma ūk kat kabamint kana karang, Éufrates kaupak sau nuhni adika bitikkau sutni kat.

¹¹Dawan adika yulwi: “Jerusalén, pramamis āni kau, pa kuhrna as was dis kidika kaupak yakna awaki simalak muihni balna kidika yakat bangkidika.

¹²¡Manna, tahawi talnin dai kidik silak yakat dutamana kidika, ū parasni yakat nawatta duyawanauh! Manayultayang blisin kalana awaki watlamna bu, ampus wawauhna kidika yulni.

¹³Laski kalbaunin dini kidika istik dulnayang, kidika laih Judá, dawak sibang as ānayang, kidika laih Efraín. Sayan man kaupak isparah as yamki, dawak man walamabis balna kidika dulauki, Grecia walanibis balna niningna yakat.”

¹⁴Dawan kidika niningkana karang witing tawanni minityakat; sinibang kidika ruhna karang sihm alwana lapwa kapat. Papang, Dawan kidika trumpit puhna karang dawak kawi kiuna karang wadah niningkauh wingbauwa sakyakat.

¹⁵Dawan parasni nuhni bitik duwa kidika, witing dini balna kidika nanitdakna karang, dawak witingna yaklauwi kiwah ruhmyang balna kininapala kidika atatakwarang dawak waihninala balna kidika bitik kasmumukwarang; dawak āni kidika wain kapat didina karang, dawak dibahngna karang, sutak kau bahngwa kapat, dawak sakripais busnin pāni kau tamni balna yakat puwi babahngwa kapat.[9]

¹⁶Kidika mani, Papang, witing Daniwan kidika yaklauwi laihwi yakna karang tawanni kidika sihm sīp uduhna as kapat, dawak witing dini balna kidika yaringni karang witingna saunina yakat kipala minit nuhni kat kraun kau āna kapat.

¹⁷¡Ais yamniyah, ais nuhni yaksihn karang sauni kidika! Plawar minik dawak wain bik manas karang kidika, mawalakibis ahal dawak yayal balna kidika bararakna karang nuhni yaksihni.