Read Mayangna Malaquías 1 Bible Online

Malaquías 1 - Mayangna bible

Malaquías 1

¹Adika yulni balna Papang yaklauwi Israel tawanni yakat diyulna dai, prapit Malaquías[1] munah.

²Papang yulwi: “Yang manna kau dalani manatalayang.” Kaunah manna lawa yulta mana: “¿Amput amangladarang yah mayang kau dalani maintalaman kidika?” Papang yaklauwi biri diyulwi: “Yang manna kau dalani mana talyang, sihm kidika yulni Esaú dawi Jacob karak kalwirah dai, Jacob yakat baisa dalani talna yang,

³dawak Esaú yakat Esaú yakat dutni kaltalna yang. Dawak Esaú sauni asangpas dai kaupak kauhmak wanilang yamna yang, dawakat witing dini balna sau yakat duwa dai kidika, asangpas dini wail balna manah yamni dai.”

⁴Esaú sulani balna Edomita balna kidika yuyulwarang kat: “Maidaukalwi dis yayamna kaunah watdi ma tawanki balna kidika yamni yamdarang”, Papang parasni bitik duwa kidika biriwi yulna karang kat: “Witingna watwi yamwi dulalauwarang, kaunah yang lawik wattik bahtik dis diyamki. Witingna saunina kidika ayangni papakna karang ‘dutni manah sauni’ dawi ‘Papang yaklauwi ban kaput atnin nining kauh annin kingni sauni.’ ”

⁵Manna palni mamaknapa kau talnama data yultanama: “¡Papang kidika nuhni palni bang Israel sauni sainni bitik yakwi!”

⁶Papang parasni bitik duwa kidika sumalyang balna yakat aput di yulwi: “Walabis balna kidika papangnina yakat ayangni dulauwi rispik kalalawi, dawakat di yamyang balna kidika daninawan yakat rispik kalalawi. Kat yang adika manna papangmana yang kat. ¿Ampadawak manna yangkau rispik yatas manah? Manna yang kau yadunin manawas ki data baisa aput yultamana: ‘¿Ais palni niningyakat man kau madunikna yanawas daih?’

⁷Manna yangkau sakripais busnin pāni yakat, plawar busna yamni awas maisihni kidika duaita yatamana data kidika minit yakat manna yulta dakamana: ‘¿Ais nining yakat kulnam daukaltayangnah?’ Manna kulnik daukalta mana, angdika mani manna kultanama, sakripais busnin pāni nining kauh mana kat

⁸dawi yang kau sakripais yamnin kidika tinglau minikpa dis, kalni balna sakahwa awas kat siknis kat yamnin kidika dutni dis tala mana mani.” ¡Kaput bahang yawanauh, saumana tatuna balna yakat duta yawanauh! ¡Manna talnama witingna adika prisantni kidika yamni karak duduwarang!

⁹Manna Papang kau kalyultanauh mayang kau mamikun maitalwang. Kaunah manna witing kau kidika satni minitdis dini kalatamana kat, manna witing kaupak tahahawinih kulnin alasna karak, manna yakat mana dakawarang. Papang parasni nuhni duwa kidika aput yulwi:

¹⁰“¡Manna paskaupak muih as kat bik papangni uni dūrni kidika putwang, kaput karak sakripais busnin pāni duta yang yakat dauh kuhpau dahlnin awas yulni! Kat manna karak alasna awasyang dawak manna kaupak minitdis dini yatamana kidika baisa dutas awaki.

¹¹Sau nuhni bitik yakat king sauni balna bitik kidika yang ayangki yakat nuhni dulauwi rispik yayawi; pa bitik yakat yang ayangki usnit yakat walapni yamni bubuswi dawi minit dis dini yamni kidika yayawi.

¹²Nawatkauh laih manna yaustamana, yang sakripais busnik pāni kidika laih, yang tikibil, bahang sipki maisihni kulnin, dawak kasnin dini kidika yakat ilna bangkidika bik dutni ki.[2]

¹³Manna yultamana: ‘¡Adika dini uman maisuhdana!’ Dawak bik yang adika wantki awaski.[3] Dawakat manna baisa kulta mana, yang alasna kaldakaki, yang kau tinglau malna dini as awas kat tinglau as bahna awas kat siknis kat minit dis yatamana yulni.

¹⁴¡Dutni palni karang kidika muihni tingnilau balna paskaupak salani yamni kat yanin pramis kalahwi dawi tinglau sakahwa kat yang kau sakripais yamwa muihni yakat! Yang laih king nuhni yang, dawak king sauni bitik yang yamakiduduwi.” Aput yulwi Papang parasni bitik duwa kidika.