Read Mayangna Malaquías 2 Bible Online

Malaquías 2 - Mayangna bible

Malaquías 2

¹“Waralaih sumalyang balna, adika laih manna dimana:

²Manna yang yulki dakanamna ki data yang ayangki dulaunamna kidika bik rahm yamnamna ki. Manna yamtas awanama kat, yang manna kau lāmanatuhki. Dawakat yang ayangki dulaunin kidika rahm barangni yamtas mana bahang, yang lawik dutni mana yulna awaki, sumalyang balna kaupak ilpni duta mana bitik bik.” Papang parasni bitik duwa kidika yulwi.

³“Parasnina duduwa kaupak di dakyakki datik muhnina yakat bik, tinglau balna sakripais busnin duwi aiwa bani kau muhnina yakat barhna awaki. ¡Dawak diba karak aslah libittik manna bik manabitwi yakna karang!

⁴Kaput laih manna amanglatamana, yang lawik adika anidar diana yang Leví karak pramis yamna yang kidika barangni ban kidika yulni.” Papang parasni bitik duwa kidika yulwi.

⁵“Yang pramiski yamna yang kidika kuduh sangka dawi kulnin aslah lani ki libait karak. Witing yakat kalana yang; yang kau rispik yanin dawi yamakidunin, dawak witing yang kau nikingkana yamakiduwa kidika dawi yang kau bik muhni minikun kawi abuk yaklauwa kidika bik.

⁶Libait di rahm kidika sumalna dai dawi kungnimak kaupak yul dutni bik kalahwas dai. Witing yang karak kulnin aslah lani karak yalahna dawi dutni yamnin kaupak nai kau kalahna.

⁷Sumalyang balna warkni kidika laih muih yakat sumamalwakat yang kau amangkilana atninna ki, dawak muih bitik kidika witingna yakat uinin ki, ais yamnin kidika amanglanin yulni, kat witingna kuduh Papang parasni bitik duwa kidika yulni muryang balna bahang.

⁸“Kaunah manna sumalyang balna, ta yamni kaupak nai yakat alahwanaman; manna sumalta mana munah yamtanang kat muih mahni bubukna. Kaput laih yang libait karak pramis yamna yang kidika dutni yamna mana.

⁹Kidika bahang, manna yang yulki dakasdanamana, dawak kidika minit yakat, manna muih yakat sumalta mana mani bitik kau sihm papatni di kultasmana, bahang yang yamting kat tawan bitik yaklauwi manna yakat mana taihwi dawi dutni bik mana tatalna karang.” Papang parasni bitik duwa kidika yulwi.

¹⁰¿Mayang adika bitik sihm Papangni dudas yah, kidika Papangni bitik kau maiyamna kidika? ¿Ampadawakat mayang adika biri biri alas kalyuldi, kaput karak Papang dawi ma muihki barak balna karak pramis yamna dai kidika bahdi?

¹¹Judá kidika Papang karak barangni awaski, dawi Jerusalén dawi Israel yakat di dudutni mahni palni yamwi. Judá kidika Papang uni dutni dis kau Papang dalani talwa lani balna bahna dawi Judá ahalni balna kidika yayal wayani dauh kau minitna yuyulwa balna yakat maridnina duduna.

¹²¡Papang kat ampadawak, ma sauki pas akaupak kidika sat dini yayamwa balna yakat uswi yakwas yah, wais wais karang dawi Papang parasni bitik duwa yakat, minit dis dini duahaiwarang bik!

¹³Kaunah manna baisa kidika yamtaman; Papang kau sakripais busnin pāni kidika makwas kau bahng-iltamana, dawakat parasni karak sarahta aidamana, kat Papang yakat minitdis kalata mana kidika kulnin alasna karak duwas yulni.

¹⁴¿Dawak manna baisa yulta mana ampadawak? Bahang kat Papang kidika witnis bang, man wahma man mani yal yakarak marid alahwana man pranimis yamna man kat yamtas dana man bahang. ¡Man yaihmat yakat dunam yalni as dai, dawakat witing yakat barangni atnam pramis yamna man dai![4]

¹⁵¿Witing kidika sihm Papang dai kidika awasyah, muih muihni nuhni yamna dawi spirit bik yamna kidika? ¿Bahang kidika Papang ais dukih kalawi, sulani balna kidika witing dini balna manah kalna atnin?[5] ¡Manna amung talnauh, manna alas spiritma balna karak, dawak bik manna wahma mana mani kau maridmana dunin pramis mana yamnamana kidika yamwas atwinih!

¹⁶Papang, Israel Papangni kidika parasni bitik duwa kidika aput yulwi: “¡Bahang manna palni spiritmana yakat amung talnauh, dawak witing karak barangni awas laih atwinih; kat yang dutni palni kaltalayang kidika muihni maridni yal kaupak dakwi kalahwa yakat dawi kaput yamwi dutni kalwa yakat bik!”

¹⁷Papang kidika mana dakana manah kalsuhna; dawakat manna baisa yulta dakamana: “¿Ais as yulna mayang kat witing maidakana manah kalsuhna yah?” Kat manna yulnamana, Papang kidika kulnin alasna kalwi muih di dutni yayamwa nining yakat, dawi witingna karak bik kulnin alasna kalwi. ¡Manna Papang kidika barangni atnin kultas manah!