Read Mayangna Malaquías 3 Bible Online

Malaquías 3 - Mayangna bible

Malaquías 3

¹Papang parasni bitik duwa kidika aput yulwi: “Yang yulki muryang kidika sihting kiwarang, yang yawinik tani kidika ridi yamnin yulni. Papang, witing yakat walta mana Papangni kidika warakauna Papang uni yakat kaikana karang. ¡Pramis yulni muryang dukih manawa kidika bainah kaina ki!”

²Kaunah ¿witing watwi kaiwarang nining yakat wais as sip karang yah yaklaunin? ¿Angdika muihni palni kau yaklauna sak karang yah? Bahang witing sihm kuhpau kapat kaiwarang, mayang kau ma dutki dis maiyamnin yulni; sihm sup as kapat karang maisihni mailaihna kidika suhwi yaknin yulni.

³Papang kidika yalahwarang ki sumalyang balna kidika dutnina dis yamnin yulni, Leví sulani balna yakat, sihm lalah, gol kuhpau yakat arwi dutni disyamwa kapat. Kidika usnit, witingna sip karang Papang kau prisantnina kalanin, kaput yamnin duduwa kapat.

⁴Bahang yakat laih Papang alasna kalahwarang Judá dawi Jerusalén prisantni kalawa yakat, sihm nai balna bayakna yakat alasna kalahna dai kapat.

⁵Papang parasni bitik duwa kidika aput yulwi: “Yang aiwana awaki manna lamana yamna. Dawakat sihm mani yang witmananis alahwaki, kidika muihni balna di dutni lan kakalwa balna niningna yakat, marid lani daukakalwa balna niningna yakat, alas yulwi sain kalahwa balna niningna yakat, wark parasni kalahwa balna yakat di tataihwa balna yakat tingmak balna dawi warau balna kau bik di tataihwa balna yakat bik, muih tringsar balna kau dutni di yayamwa yakat dawi yang kau rispik yayawas balna yakat bik.

⁶“Yang kuduh Papang. Satuk bik kaltas yang. Dawakat kidika yulni manna Jacob sulani balna mana iwi dis yayamwas ki.

⁷Manna kidika yang laki balna kaupak ahni yakat alahwa yawanamana, sihm manna muihmana barak balna yayamna dai kapat, dawakat bik manna sip yulnina dakas alahwana mana. Yang, Papang parasni bitik duwa kidika mana yultayang: ¡Watta yang yakat nawatta aiwanauh, dawak yang bik manna yakat nawattik yawaki! Kaunah manna yulta mana: ‘¿Ampadawak mayang adika watdi man yakat nawat yawinikna yah?’

⁸Dawak yang yultik daka yang: ¿Ais muih al as kidika sip yah Papang kau kulnin sau yakat laknin? ¡Kat manna yang kulnik sau yakat lakna mana! Dawak manna baisa kalyulta dakamana: ‘¿Ais yakat man kulnam kidika sau kau lakna yangna?’ ¡Salap minit launin dawi minit yanin lani yakat bik kulnik sau yakat lakna mana!

⁹King sauni nuhni bitik dawi manna bitik kulnik sau yakat yalaktamana, kidika bang manna yakat lamanatuhki. Yang, Papang parasni bitik duwa kidika mana yultayang:

¹⁰Salap tunan minit kidika manna, Papang uni yakat prisantni nuhni sak yakat duaitanauh dawak kaput ūki yakat di kasna mahni sak karang. Kidika nining yakat traiyatalnauh, manna yakat sip makau kisang winnidar kidika apahtas awaki pa, manna mamatna yakat blisinni yamni kidika laknin yulni.

¹¹Datingkat di muih balna yamanamak balna yakat di dahna mana kidika dawi wain mana yanimak balna bik dahn kakalwas karang.

¹²King sauni mahni kidika manna yamni alasna mana kidika yuyulwarang, kat manna king sauni as yamni palni dutamana bahang. Yang, Papang parasni bitik dutayang kidika, yulnayang.”

¹³Papang yulwi: “Manna yang niking yakat yul pararasni yulna mana. Dawak manna baisa yulta dakamana: ‘¿Ais as man namang yakat yulnayangnah?’

¹⁴Adika yulni mana: ‘Papang dini yamnin kidika di yakdas ki. ¿Witing yaklauwi maiyulwi Papang parasni bitik duwa muhnit yakat makulnik bukna asnina ānin maiyulwa yakaupak ais as yakdarang yah?

¹⁵Mayang talna mayang, muih muihnina nuhni kukulwa kidika alasna palni ki, dutni yamyang balna niningna yakat di bitik kidika yamni manah di kalahwi, Papang nining yakat traini tatalwi kaunah wah wisna as bik duduwas ki.’ ”

¹⁶(Bahang Papang ayangni yak rispik kalawa kidika witingna manah biri biri yulwi dakakana, dawak witingna yuyulna kidika Papang yamni tapayuwi dakana. dawak Papang muhni yakat wauhtaya nuhni as ulwa dai, yakat ulwi isningkatwa dai, Papang ayangni dulalauwi dawi witing yakat bik barangni kukulwa muihni balna yulnina).

¹⁷Papang parasni bitik duwa kidika yulwi: “Ma as ridi yamtayang, bahang kidika mani kaiwi kawakat witingna kidika yang tawanki kalna karang. Papang as walanibis yakat minikun talwi ilp kalawa kapat, yang bik witingna yakat miniknakun talki.

¹⁸Kaput dawak manna watta amanglatanama di yamni dawak dutni kidika, kaput bik laih Papang yakat ayangni nuhni yamwa kidika dawak ayangni nuhni yamwas kidika bik.”