Read Mayangna Matyu 12 Bible Online

Matyu 12 - Mayangna bible

Matyu 12

¹Kidika mani yakurupdinin mani[15] as kat, Jisas laih di dahna balna pasmunah lapakwa dai. Disainipil balna laih yuh dauwi plawar minik dakwi kakasna dai.

²Parisi balna laih kidika talwi Jisas yakat kalyuyulna: —Talah, disaimapil balna yayamwa yakat yakurupdinin mani yakat yamnin dini awasdai kidika.

³Witing yaklau nangnitnalana: —¿Baisa manna yulta talasmanah Devid witing kaltalyang yayamni balna karak ma as kat yuhdauwi ais yayamna kidika?

⁴Bahang Papang ūni yakat kawi plawar busna Papang dini yakna dai kidika kasna dai, kidika plawar busna balna kidika laih witing dawak kaltalyang yayamni balna kidika bik kasninna dini awasdai, kaunah sumalyang balna manah kasninna sipdai.

⁵¿Kidik awas kat manna Moses lāni yakat yulta talasmanah sumalyang balna laih makat yulnin ūni yakat dutni yayamwas kidika yakurupdinin mani yakat yakururupdas karang bik?

⁶Bahang manayultayang akat laih baisa di as nuhni kalkulna dini kidika sakki makat yulnin ūni kidika karak dawakat.

⁷Manna laih adika yulni tannika balna kidika baisa amanglatas mana: ‘Yang dukih yawa kidika laih manna kidika minikun talnin lani kidika duna atnamna, kaunah sakripais busnamna laih awas ki.’ Manna amanglatamana kat laih, muih dutni yayamwas muihni balna kidika pāt yakat ātas awanama.

⁸Bahang yamni ki, muih Walanibis al kidika laih parasni duwi yakurupdinin mani yakat.

⁹Jisas laih kidika kaupak kiwi Papang yulni sumamalwa ūni yakat kana dai.

¹⁰Kidika yakat muih al as tingni kukuslana kat sakdai; dawak Jisas yulni yakna atnin kukulwadai kidika bahang, kalyulwi dakakana: —¿Yakurupdinin mani yakat muih sikninis kaupak yamna atnin sipyah?

¹¹Jisas yaklau nangnitnalana: —¿Manna kaupak wais kidika witing sīp as duwa kat yakurupdinin mani yakat pa kudungni as kau kakiwa kat kiwi yakwas karangyah?

¹²Bahang ¡muih al as kidika ampus minit nuhniyah sīp as karak dawakat! Kaput bahang, yakurupdinin mani balna yakat di yamni yamnin kidika laih sip ki.

¹³Bahang kidika alni yakat kalyulna: —Tingma uhrtah. Muih al tingni kidika uhrna dawak tingni nakas yamni kapat kalna dai.

¹⁴Kaunah parisi balna kalalahna mani kat, Jisas yakat īna yulni kidika yulbauwi tatalna dai.

¹⁵Jisas witing amanglana mani kat kidika kaupak kiuna, dawak muih mahni palni usnit uhuina dai. Jisas laih siknis muihni balna bitik kau sikninanis kaupak diyamwadai,

¹⁶dawak diyulwadai witing yulni kidika muih balna yakat yulninna awas.

¹⁷Adika dini kalahna dai prapit Isaías yulna dai kidika kaput kalahna atnin yulni, aput yulna dai kidika:

¹⁸“Yang diki yamyang waltik yaknayang kidika akat sak ki, dalani talayang kidika yaklau yang dukih yawa kaput yawa kidika. Witing minit yakat yang Spiritki kidika lakki ki, dawak witing yaklau nisan balna yakat la kat kidika sumalwarang ki.

¹⁹Niningyakat yulwas karang ki dawak bik sarahwas karang ki; witing dinit kidika muih as bik dakawas karang ki ta balna yakat.

²⁰Tisnak bahna kidika iswi biswas karang ki dawak kuh wayau puk awa kidika bik sip piwas karang ki, la kat kidika minit bayakwarang kat.

²¹Dawak nisan balna kidika laih witing yakat tahanin lani duduwarang ki.”

²²Jisas yakat duwi uina spirit dutni kalkana muihni as minikpa di talwas dawak bik yulbauwas, dawak Jisas yaklau minikpa dawak tuni bik kalana.

²³Muih balna kidika bitik yamni talwi yulwi dakakana: “¿Devid Walanibis kidika adikapah?”

²⁴Parisi balna laih adika yulni dakawi yuyulna: “Spirit dudutni balna taninatuna Beelzebú yaklau adika alni akat parasni kalana spirit dudutni balna kangwi yakmukna atnin.”

²⁵Witingna ais kukulwa kidika Jisas amanglana dai bahang, aput diyulna: “Sau balna sahwi kalahwi witingna alas yakauna niningna yakat yaklalauwa kidika laih, witing alas yakauna kaldaukalwi; dawak tawan nuhni as kidik awas kat sulani as witing alas yakauna sahwi kalahwa kidika laih, sip sakawaski.

²⁶Kaput bik, satanas kidika witing alas yakauna kalruhmwarang kat, witing alas yakauna sahwi kalahwi; ¿bahang amput witing parasni duwarangyah?

²⁷Manna yultamana yang lawik spirit dudutni balna kang'yaktayang Beelzebú parasni kau; kaunah kaput karang kat, ¿manna usmatna uiyang balna yakat wais yaklau parasni diawih spirit dudutni balna yakat kangwi yakna atnin? Kidika bahang, witingna silp yaklau yamwi namangna kakawi manna laih mistik alahwanaman kidika.

²⁸Yang lawik Papang spiritni parasni kau spirit dudutni balna yakat kang'yaktayang kat, kidika tannika laih kisang yakat king kanin sauni kidika uman manna yakat kaina.

²⁹“¿Amput muih as yaklau muih ūk baisa parasni kidika ūni yakat kawi dini balna kidika malwarangyah, tatuna kau sitwas karang kat? Sitwarang laih takat sip karang ki dini balna kidika malna atnin.

³⁰“Angdika muihni kat yang ilpki yakat awas kidika laih, yang nikingkauh ki; dawak yang karak kalpakwi dulauwas kidika laih, nawatkauh rawi.

³¹“Kidika bahang manayultayang muih ahal balna dutni yayamwarang kidika dawak dutni yuyulwarang kidika bitik laih Papang yaklau dutnina dawak diswarang ki, kaunah, Spirit Holi yakat yul kau dutni kalyuyulwarang kidika laih dutnina dawak diswas karang ki.

³²Papang laih angdika muihni muih Walanibis al niningyakat yakat yulwarang kidika laih dutni dawak diswarang ki; kaunah Spirit Holi niningyakat yulwarang kidika laih, dutni dawak diswas karang ki adika mani balna akat dawak ma balna kaiwarang kidika yakat bik.

³³“Pan kidika yamni laih, minik yamni yakwarang; kaunah pan kidika dutni laih, minik yamni yakwas karang; bahang pan kidika laih minik munah amanglawi.

³⁴¡Bil balna sulani! ¿Amput di yayamni yultanamayah, manna palni dudutni mana kat? Muih isning yakat mahilwa kidika kaupak tinipas kidika laih yulwi.

³⁵Muih al yamni kidika laih di yayamni balna kidika yulwi kat di yamni kidika laih witing yakat bahang, dawak muih al dutni kidika laih di dudutni balna kidika yulwi kat di dutni kidika laih witing yakat bahang.

³⁶Dawak yang lawik manayultayang la yamwarang mani yakat muih balna bitik laih yulnina yakwi yuyulwarang ki yul dutni yuyulna balna kidika.

³⁷Bahang man silp yulma yakauna la yakat awama ki, dawak laih mayakwarang ki dutni yamtasman daipa, kidik awaskat man pātma pa.”

³⁸Bahang parisi balna kaupak buas dawak lā sumalniyang balna kaupak buas yaklau Jisas yakat kalyuyulna: —Sumalyang, taldas sainni as yamtang kat talkih yanawi.

³⁹Jisas yaklau nangnitnalana: —Adika muihni dudutni barangni awas balna adika laih taldas sainni as talnin yuyulwi; kaunah prapit Jonás sainni kidika kaupak taldas sainni ūk laih niningkatas awama ki.

⁴⁰Bahang Jonás witing waspa dini nuhni bani pasyakat ma bas dawak pukta bas sakdai kidika kaput muih Walanibis al kidika ma bas dawak pukta bas sakkarang ki sau pasyakat.

⁴¹Nínive muihni balna laih la yamwarang mani yakat yaklalauwarang ki, adika mani muihni balna yakat lanina yamwi imukwarang mani kat; kat Nínive muihni balna laih Jonás yulni kidika dakawi Papang yakat wiryaklalana kidika yulni, dawak adika pāni akat muih as sak adika laih Jonás kauh kuihwas ki.

⁴²Ma kilwa niningkauh king yal sakkidika bik yaklauwarang ki adika mani muihni balna yakat lanina yamwi imukwarang mani kat; kat yal kidika laih sau ūk naikaupak kaina kidika yulni Salomón sinsni lani kidika dakana atnin yulni, dawak adika pāni akat muih as sakkidika laih Salomón kauh kuihwas ki.

⁴³“Spirit maisihni karuk kidika muih kaupak kalahwa mani kat, pa balna buhni yakat awaihwi yakurupdana atnin; dawak kidika pāni yakwas laih, aput kulwi:

⁴⁴‘Angkaupak ūki alahwanayang kat, kidika yakat nawattik yawaki ki.’ Nawatwi kiwa mani kat, kidika muihni laih sihm ū as kat bitwi yamni dana kat muih as bik dis kapat kat talwi.

⁴⁵Bahang nawatwi kiwi spirit dudutni tiaskaubu ūk kalpakwi kidika muihni sangnika yakat kawi yalalahwi, witni kat kidika alni laih baisa dutni kalwi tatuna dai kidika karak dawakat. Sihm kidika kaput dikalahwarang ki adika muihni dudutni balna kat.”

⁴⁶Jisas witing muih balna yakat baisa yulbauwa sakkat, witing nanangni dawak wirahni ahal balna kauna uina dai, witingna laih Jisas karak yulbaunin dukih diawadai. Ahni yakat wawatna dai bahang,

⁴⁷muih as yaklau Jisas yakat isningpakna: —Man nanangma dawak wirahma ahal balna kauna ahni yakat bangki, dawak man karak yulbaunin dukih diawi.

⁴⁸Kaunah witing yaklau nangnitlana isningpakna muihni yakat: —¿Waisyah yang nanangki dawak yang wirahki ahal balna adik?

⁴⁹Bahang, disainipil balna yakat tingni yuwi, aput yulna: —Yang nanangki dawak yang wirahki balna laih adika.

⁵⁰Kat angdika muihni yang Papangki kisang kau sakkidika yakat kulnin lani yamwa kidika laih, kidika ki yang wirahki al, wirahki yal dawak nanangki.