Read Mayangna Matyu 13 Bible Online

Matyu 13 - Mayangna bible

Matyu 13

¹Sihm kidika mani yakat Jisas laih ū kaupak kalahwi kiwi lakun kung yakat yalahna dai.

²Muih mahni palni kalududuhna dai kidika yulni, Jisas laih kuring as pasyakat kawi yalahna dai, dawak muih balna kidika laih kauhmak yakat wawatna dai.

³Bahang di manas palni yuldibauna dai malni yulni kau. Aput diyulna: “Di dahyang muihni as di dahna kalahwi kiuna.

⁴Di balna kidika dahna kat, di minik balna buas kidika laih ta yakat bubukna, dawak di lawani balna kidika uiwi ukmumukna dai.

⁵Di minik balna ūk kidika laih kipala walsah kau sau mahni dis yakat bubukna; kidika di minik balna kidika laih sirihni palni pitna dai, kat sau kidika laih pasluihni awasdai kidika yulni;

⁶kaunah ma kidika kalahna kat busyamna dai, dawak bik rikni disdai kidika yulni laih, kusulana dai.

⁷Di minik ūk balna kidika laih wakal walsah yakat bubukna dai, dawak wakal balna kidika laih barakwi balakwi imumukna dai.

⁸Kaunah ūk balna kidika laih sau yamni yakat bubukna, dawak minik yamni yayakna dai; di minik balna buas kidika laih minik as kaupak minik 100 yayakna, ūk balna kidika laih minik 60, dawak ūk balna kidika laih minik 30.

⁹Angdika muihni tapamana dutamana kidika, dakanauh.”

¹⁰Disaipil balna kidika laih Jisas yaihnit yakat uiwi kalyulwi dakakana ais yulni muih balna yakat malni yulni kau yul dibauwapa.

¹¹Jisas yaklau nangnitnalana: “Manna yakat laih Papang yaklau kisang kau king kanin sauni yakat di malni kau balna kidika namangna kawi; kaunah witingna yakat laih niningnakawas ki.

¹²Bahang wais duwa kidika laih, baisa kalana karangki, dawak mahni palni duwarang ki; kaunah dis muihni yakat laih, ampus duwa kat kidika bitik dakyakna karang ki.

¹³Kidika bahang malni yulni kau yul dibautayang; kat witingna laih tatalwi, kaunah tatalwas ki; dakakawi, kaunah dakakawas dawak amanglalawas kapat ki.

¹⁴Witingna yakat kaput kalahwi prapit Isaías yulna dai kaput: ‘Ais wāk dakakawarang bik, sip amanglalawas karang ki, ais wāk tatalwarang bik, sip tatalwas karang ki.

¹⁵Bahang adika tawanni sinsni adika laih balakna, tapanina kidika laih putna dawak miniknapa kidika bik putna, talninna awas dawak dakaninna awas yulni, amanglaninna awas dawak bik yang yakat wiryaklaninna awas, yang lawik sikninanis kaupak diyamnik awas yulni.’

¹⁶“Kaunah yamni palni ki manna laih, kat mamaknapa duta di talnamana dawak tapamana bik duta di dakanamana.

¹⁷Barangni manayultayang prapit balna dawak barangni muihni balna mahni palni dukih diana dai, manna talnama adika talna atninna, kaunah sip tatalwas dai; manna dakamana yulni adika dakakih diana dai, kaunah sip dakakawasdai.

¹⁸“Bahang dakanauh, malni yulni di dahyang tanka yulni yulwa kidika:

¹⁹Muih balna king kanin sauni yulni kidika dakawi amanglalawas kidika laih, sihm di minik ta yakat bukna dai kidika kapat ki; dutni muihni kidika laih kaiwi isning yakat yul yamni dahna dai kidika yakpamwi.

²⁰Di minik kipala balna walsah yakat bukna kidika laih sihm muih balna yul yamni kidika dukih dakakawa kapat kidika ki,

²¹kaunah riknina yamni dis kidika yulni laih, sip barangni yaklalauwas ki; yul yamni kidika yulni trainitalnin lani kidik awas kat uinin lani kalahwa kat sip barangni laihwatwas bubukwi.

²²Di minik wakal pasyakat bukna kidika laih sihm muih balna yul yamni dakakawa kidika kapat ki, kaunah lalah warkni kalahnin sangnika kidika yulni uba palni kulwi kalbabauwi dawak rits balna yakat dalani tatalwa kidika yulni alas diyuyulwi. Adika dini balna bitik kidika yaklau yul yamni kidika yakat balakwi ihiwa kat sip minik yayakwas ki.

²³Kaunah di minik sau yamni yakat bukna kidika laih sihm muih balna yul yamni kidika dakawi amanglalawa kidika kapat ki dawak bik minik yamni yayakwa kidika kapat ki, sihm plawar minik balna kat minik as kaupak minik 100, 60 kidik awas kat 30 yayakna dai kidika kapat.”

²⁴Jisas yaklau adika malni yulni ūk diyulna dai: “Papang king kawa sauni kidika laih sihm muih al as kat di dahwa pāni yakat di minik yamni dahna kidika kapat ki;

²⁵kaunah muih balna kidika bitik kamabangkat, niningnakauh yaklauwa muihni as kiwi dibasta dutni kidika plawar minik pasyakat dahwi nawatwi kiuna dai.

²⁶Plawar minik kidika ukuswi kalahwi minik duna mani kat, dibasta dutni kidika bik kalahna dai.

²⁷Bahang wark muihni balna kidika laih yāwak dawan yakat uiwi kalyuyulna: ‘Dakinawan, di dahnin pāni yakat man di minik dahnaman kidika laih yayamni dai, ¿angkaupak kalahna yah dibasta dutni kidika?’

²⁸Yamak dawan yaklau nangnitnalana: ‘Adika laih manikingkauh yaklauwa muihni as yamna.’ Wark muihni balna kidika yaklau kalyulwi dakakana: ‘¿Dibasta dutni kidika yawik dutna atnikna dukih mawih?’

²⁹Kaunah witing yaklau diyulna: ‘Dikah, dibasta dutni kidika duttanama kat sip ki plawar minik kidika bik dutnamna.

³⁰Baisa yamni karang ki dadakat papatni barakwi minik yakwarang kat; kidika yakat laih takat di minik dulaunin muihni balna kidika sihting kat dibasta dudutni kidika tatuna dutwi wirwi laihwi kuh kau busna atninna, dawak kidika usnit kat laih yang diki putayang ūni balna yakat pupuwarang.’ ”

³¹Jisas yaklau adika malni yulni bik diyulna dai: “Kisang yakat king kanin sauni kidika laih sihm muih al as witing di dahwa pāni yakat mustat minik dahwa kapat ki.

³²Kidika laih rahm ki, di minik balna bitik minitna yakat witing kidika baisa dibindauh ki; kaunah barakwa mani kat, pan ūk balna kidika karak witing kauh nuhni ki, dawak pan nuhni kalwa kat tingni balna yakat di lawani balna kidika ūnina yamwi kakawi.”

³³Adika malni yulni bik diyulna: “Papang king kawa sauni kidika laih sihm plawar pupuhnin dini kapat ki muih yal as plawar sutak bās karak banawa kidika plawar ulangna kidika bitik pupuhnin yulni.”

³⁴Adika balna bitik kidika Jisas yaklau muih balna yakat malni yulni kau diyulna dai, dawak malni yulni kau awas laih sip diyulwasdai.

³⁵Adika dini kalahna dai prapit ais yulna dai kidika kat kalahna atnin yulni: “Malni yulni munah yulbauki ki; di balna malni yakat bangdai kidika laih yaktik yulki ki Papang yaklau sau adika yamna mani kaupak.”

³⁶Bahang Jisas yaklau muih balna kidika disihmukwi ū pasyakat kana, bahang kidika yakat disainipil balna kidika witing yaihnit yakat uiwi kalyuyulna di dahnin pāni yakat dibasta dutni ukusna malni yulni kidika laih yakwi diyulna atnin.

³⁷Jisas yaklau nangnitnalana: “Di minik yamni dahwa muihni kidika laih muih Walanibis al kidika ki,

³⁸dawak di dahnin pāni kidika laih sau kidika ki. Di minik yamni kidika laih king kanin sauni muihni balna kidika ki, dawak dibasta dutni kidika laih dutni muihni dini balna kidika ki,

³⁹dawak manikingkauh yaklauwa muihni dibasta dutni dahna kidika laih muih alasni yulyang kidika ki. Di minik kalahwa kidika laih sau adika bayakkiwarang mani kidika ki, dawak di minik dulauyang muihni balna kidika laih insal balna kidika ki.

⁴⁰Dibasta dutni kidika dulauwi kuh yakat busnin awa kidika, sihm kaput kalahwarang ki sau adika bayakkiwarang mani kat.

⁴¹Muih Walanibis al innisal balna kidika sihwarang ki witing king kawa sauni kidika yakat dutni yayamwa kat muih ūk balna dutni yayamwa kidika yakat yakmukna atninna.

⁴²Di busnin pāni daihni yakat amumukwarang ki, dawak kidika yakat kaidinin lani dawak tahanin lani dis kidika kaiwarang ki.

⁴³Bahang kidika yakat barangni muihni balna kidika laih sihm ma kapat yaringni dadalhwarang ki Papangni king kawa sauni yakat. Angdika muihni tapamana dutamana kidika dakanauh.

⁴⁴“Kisang yakat king kanin sauni kidika laih sihm di minit nuhni as kat sau as kau malpamna kidika kapat ki. Muih al as yakwi sihm kidika pāni yakat malpamwi; alasna manah palni, kiwi dini balna duwa kidika bitik bakanmukwi kidika sauni kidika bakanna.

⁴⁵“Papang king kawa sauni kidika laih sihm di bakanyang muihni as kat kipala yararingni minit nunuhni kat walwa kidika kapat ki;

⁴⁶kidika dini minit nuhni kidika as yakna mani kat, kiwi di duwadai kidika bitik bakanmukwi, kidika kinipala yaringni minit nuhni kidika bakanna dai.

⁴⁷“Papang king kawa sauni kidika bik sihm waspa dini laihnin dini as kat kuma yakat awi waspa dini satni bitik yakwa kidika kapat ki.

⁴⁸Waspa dini laihnin dini kidika waspa dini manah kalpuwi buhngdawa mani kat, waspa dini pamyang muihni balna kidika laih angdika pāni yakat yalahwi waspa dini balna kidika walyayakwak kidika kauhnimak yakat mur'ihilwi; angdika yayamni balna kidika laih di punin dini yakat pupuwi dawak dudutni balna kidika laih ruruhmwi.

⁴⁹Sihm kaput kalahwarang ki sau adika bayakkiwarang mani kat: insal balna kidika kalalahwarang ki dudutni balna kidika dawak yayamni balna kidika karak dakwi yakna atnin yulni,

⁵⁰dawak dudutni balna kidika laih di busnin kuhni yakat amumukwarang ki, bahang kidika yakat kakaidarang ki dawak bik ananina kakarswarang ki.”

⁵¹Jisas yaklau yulwi dakana: —¿Manna adika dini balna bitik amanglatamanah? Witingna yaklau nangnitlalana: —Agha.

⁵²Bahang Jisas yaklau diyulna: —Lā sumalniyang as yaklau kisang yakat king kanin sauni kidika yulni sumalwa kat, kidika laih sihm ū as daniwan kat, di apakna balna kidika kaupak di wisam dawak di umani yakwi amanglawa kapat ki.

⁵³Jisas witing kidika malni yulni balna diyulwi dana mani kat, kidika pāni kaupak kiuna dai

⁵⁴dawak witing sauni yakat Papang yulni sumamalwa ūni yakat kiwi kana dai. Muih balna kidika laih yamni talwi aput yuyulna: —¿Angkaupak amanglanayah adika muihni di bitik amanglawa kidika? ¿Di taldas dini balna kidika kaput yamwih?

⁵⁵¿Adika awasyah tat ūni yamyang walanibis kidika, dawak nanangni laih Mery kidika awasyah? ¿Jims, José, Saiman dawak Judas kidika balna wirahnina awasyah,

⁵⁶dawak witing wirahni balna kidika bik mayang mapasking akat bang awasyah? ¿Adika muihni witing angkaupak yakwih adika dini balna bitik adika?

⁵⁷Dawak witing yakat sip rahm kalkukulwasdai. Kaunah Jisas yaklau diyulna: —Pa balna bitik yakat laih prapit as kidika ayangni tanit nuhni yayamwi, kaunah witing sauni dawak witing ūni yakat laih kaput awas ki.

⁵⁸Dawak kidika pāni yakat witing di taldas dini balna kidika yamwas dana dai kat kidika muihni balna laih rahm kulnin lani kidika witing yakat disdai kidika yulni.