Read Mayangna Matyu 15 Bible Online

Matyu 15 - Mayangna bible

Matyu 15

¹Parisi muihni balna dawak la sumalyang balna buas Jerusalén kaupak uina dai kidika witingna Jisas yaihnit yakat uiwi kalyulwi dakakana:

²—¿Ais yulni man disaimapil balna kidika yangna muihkinabararak balna lanina kidika kat dakakawasyah? ¿Ais yulni witingna di kasdas tanitkauh matingki suhnin kidika kaput laihwi yayamwasyah?

³Jisas yaklau diyulwi dakana: —¿Dawakat ais yulni manna Papang lani kidika kat dakas data manna lamana kat usnit uitamanah?

⁴Kat Papang yaklau yulna: ‘Man papangma dawak nanangma kidika yakat nuhni kultanauh’, dawak bik ‘Wais muihni kat papangni kidik awas kat nanangni yakat lakaltuhwarang kidika laih daunin yakat wirlana karang ki.’

⁵Kaunah manna lawa yultamana muih al as kidika papangni yakat kidik awas kat yakat kalyulnin sip ki: ‘Yang man yakat ilp manik sip awasyang, kat di dutayang balna bitik kidika laih Papang yakat kalanayang’;

⁶dawak angdika muihni kat adika yulwarang kidika laih, papangni kidik awas kat nanangni yakat ilp kalawas atnin sip ki. Kaput bahang, manna lawa Papang lani kidika dispamnamana manna silp lamana kidika yakat usnit uina atnamna yulni.

⁷¡Sins dis muihni balna! Prapit Isaías laih yamni yulna manna yulmana, aput yulna mani kat:

⁸‘Adika tawanni laih tinipas kau ayangki nuhni yamwi, kaunah witing isning kidika laih yang kaupak naikau ki.

⁹Prikias yamnin bik sip awas ki; witingna sumamalwa balna kidika laih muih al lani balna.’

¹⁰Usnit kat Jisas yaklau muih balna yakat diyulwak uiwakat diyulna: —Dakanauh dawak amanglatanauh:

¹¹Muih tinipas munah kawa kidika yaklau muih al yakat maisihni kalyamwas ki. Nawatkauh laih, muih al yakat maisihni kalyamwa kidika laih tinpas kaupak kalahwa kidika yaklau maisihni kalyamwi.

¹²Bahang disaipil balna kidika laih Jisas yaihnit yakat uiwi kalyulwi dakakana: —¿Man numahn parisi balna laih man yul yulnaman kidika dakawi dutni kaldakakana kidika?

¹³Witing yaklau nangnitnalana: —Angdika panani yang Papangki kisang kau sakkidika yaklau dahwas kidika laih, rikni kauna dutna karang ki.

¹⁴Bahang datanauh, witingna laih miniknapa dis kidika yaklau ūk balna miniknapa dis yakat mumurwi. Bahang minikpa dis muihni as yaklau minikpa dis muihni ūk yakat murwa kidika laih, witingna albupak pa kudungni as kau auiwarang ki.

¹⁵Bahang Pita yaklau Jisas yakat kalyulna: —Yulnaman yulni kidika laih yakta yanasumaltah.

¹⁶Jisas yaklau nangnitlana: —¿Manna kat bik baisa amanglanamna sip awasmanah?

¹⁷¿Manna amanglatasmanah di balna kidika matikpas munah kawi mabaki yakat kiwi, kidika kaupak mamuihki kaupak kalahwi kiwa kidika?

¹⁸Kaunah tinipas kaupak kalahwa kidika laih muih muihni paskaupak kaiwi; bahang kidika kuduh muih yakat maisihni kalyamwa kidika.

¹⁹Kat muih muihni paskaupak kuduh kulnin dudutni balna, īnin lani, la bahnin lani, muih al, yal karak dutni yamnin lani, malnin lani, alas yulnin lani, dawak muih ūk yakat dutni kalyulnin lani balna kalalahwa kidika.

²⁰Adika dini balna kuduh muih yakat maisihni karuk kalyamwa kidika; kaunah ting suhwi di kasnin lani kidika yakat yamwas kidika laih muih yakat maisihni kalyamwas ki.

²¹Jisas laih kidika pāni kaupak Tiro dawak Sidón sauni niningyakat kiuna dai.

²²Dawak kidika sauni kaupak cananeo muihni yal as, sarahwi Jisas yaihnit yakat kiuna: —¡Dawan, Devid walanibis, yang akat mikun yatalah! ¡Yang walakibis yal kidika laih spirit dutni as yaklau kalyamwa kat uba palni dalani wauhwi!

²³Jisas laih di as bik nangnitlawasdai. Bahang disainipil balna laih witing yaihnit yakat uiwi kalni dinit bubukna: —Kidika yal yakat kalyultang kat kiwang, kat mayang madangkit yakat sarahwi kaiwa kidika yulni.

²⁴Jisas yaklau yulna: —Papang yaklau yasihna Israel tawanni yakat sīp balna didisna yakat manah.

²⁵Kaunah muih yal kidika laih Jisas muhnit yakat kiwi limbabahwi aput yulna: —¡Dawan ilp yatah!

²⁶Jisas yaklau nangnitlana: —Yamni awaski walabis balna kasninna dini kidika dakyakwi sul balna yakat diana atnin kidika.

²⁷Yal kidika yaklau kalyulna: —Agha, Dawan; kaunah sul balna kat bik daninawan balna tininabil kaupak kasnin dini yayahni bubukwa kidika kakaswi.

²⁸Bahang Jisas yaklau kalyulna: —¡Yal, rahm kulnin lani dutaman kidika laih uba palni nuhni ki! Man amput yamni talaman kidika yamtah. Dawak kidika minitni kaupak muih yal walanibis kidika sikninis kaupak yamni kalahna dai.

²⁹Jisas laih kidika pāni kaupak kalahwi Galilea lakunni kung yakat kiuna dai; usnit kat asang as kilwi yalahna dai.

³⁰Witing sakdai pāni yakat muih mahni palni kalududuhna dai. Muih muihnina kukuslana, miniknapa dis, muih tingnina nakaslah duduwa balna kidika, yulbabauwas muihni balna dawak siknis muihni ūk balna mahni palni duwi uiwi Jisas kalni yakat lalakwakat witing yaklau sikninanis kaupak yamni diyamna dai.

³¹Muih balna kidika laih yamni tatalna dai yulbabauwas muihni balna kidika yul babauwa kat, tingnina nakaslah duduwa kidika yamni kakalna kat, muihnina kukuslana balna kidika lapapakwa kat dawak miniknapa di tatalwas balna kidika laih di tatalna dai. Dawak Israel Papangni yakat ayangni tanit nuhni yayamna dai.

³²Jisas yaklau disainipil balna yakat diyulwa kat uiwa kat diyulna: —Adika muihni balna laih dalani ditalayang, kat uman ma bas dawi adika pāni akat yang karak bangki dawak kasnin dini as kat bik dis bangki. Witingna ūnina yakat di dibayahtas disihmuknik kidika dukih yawas ki, kat ta bamak yakat sangka dauninna sip ki.

³³Disainipil balna yaklau kalyuyulna: —Kaunah ¿amput yamdi muih mahni kasninna dini kidika yakdarangyah, adika pāni muih as bik dis adika?

³⁴Jisas yaklau diyulwi dakana: —¿Manna plawar busna ampus dutamanah? Witingna yaklau nangnitlalana: —Tiaskaubu, dawak waspa dini buas.

³⁵Bahang muih balna yakat diyulwa kat sau yakat yalalahna dai,

³⁶tingni yakat plawar busna balna tiaskaubu kidika dawak waspa dini balna kidika bik duna, dawak Papang yakat minit yulwi tingkih kalyulwa dawi disainipil balna yakat diawa kat muih balna yakat yuyuna dai.

³⁷Bitik kaswi isningnalak dana dai, kaput bik kidika minit yakat yayahni balna wawatna kidika laih di punin dini balna tiaskaubu ududuhna dai.

³⁸Kakasna muihni balna kidika laih muih tausin arungka dai, muih yayal dawak walabis balna kidika laih banawi kukulwasdai.

³⁹Usnit kat Jisas yaklau muih balna kidika disihmukwi kuring yakat kawi Magadán[16] sauni yakat kiuna dai.