Read Mayangna Matyu 16 Bible Online

Matyu 16 - Mayangna bible

Matyu 16

¹Parisi dawak saduceos muihni balna laih Jisas yakat kaltalna uina, dawak dutni as kalyamnin yulni, di taldas dini as yamtah kaput karang kat man kidika rahm Papang kaupak aiwaman.

²Kaunah Jisas yaklau nangnitnalana: “Manna laih maulah yakat yultamana: ‘Ma yamni karangki, kat kisang kidika laih pauni bahang’;

³dawak mapiris niningkauh laih yultamana: ‘Warmani laih ma dutni karang ki, kat kisang kidika laih pauni pukni bahang.’ Bahang manna kisang ampat kidika amanglatamana kat, ¿amput dawa kat adika mani sainni balna adika laih amanglatas manah?

⁴Adika muihni dudutni barangni awas balna adika laih di taldas dini as taldang atwi; kaunah Jonás sainni kidika kaupak sain ūk laih diatas awama ki.” Dawak didamukwi kiuna dai.

⁵Disaipil balna kidika lakun nakas yakat dakyaklalana mani kat, plawar busna duwi kiunin kidika dinitnakahna dai.

⁶Bahang Jisas yaklau diyulna: —Manna talnauh, parisi dawak saduceos muihni balna planinawar pupuhnin dini kidika yakat amung talnauh.

⁷Disaipil balna kidika laih biri biri yulwi dakakana dai: —¡Plawar busna laih duaidasdai!

⁸Jisas laih amanglawi diyulna: —¿Ais yulni plawar busna dismayang timanah? ¡Manna laih rahm kulnin lani kidika dibindauh palni dutamana!

⁹¿Manna baisa amanglatasmanah, dawak bik ismangnakatwasyah plawar busna singka karak muih ahal tausin singka, kidika yakat diating kat di punin dini balna yakat yayahni balna wawatwa kat uduhnamana dai kidika?

¹⁰¿Dawak bik ismangnakatwasyah plawar busna tiaskaubu karak muih ahal tausin arungka yakat diatingkat yayahni balna wawatwa kat di punin dini balna kau uduhnamana dai kidika?

¹¹¿Amput manna ismangna katwasdaih yang plawar busna yulni yultasyang kidika? Manna amung talnauh parisi dawak saduceos balna planinawar pupuhnin dini kidika yakat.

¹²Bahang witingna amanglalana dai Jisas yaklau plawar busnin dini pupuhnin dini yakat yulwasdai kidika, kaunah witing parisi dawak saduceos balna sumamalwa yulni kidika yulna dai.

¹³Jisas witing Cesarea sauni Filipo yakat kiu'kana mani kat, disainipil balna yakat diyulwi dakana: —¿Muih balna laih muih Walanibis al kidika wais atwih?

¹⁴Witingna yaklau nangnitlalana: —Muih buas laih yuyulwi Jan muih wassiyang kidika; ūk balna laih yuyulwi Elías, dawak ūk balna laih yuyulwi Jeremías kidik awas kat prapit as ki.

¹⁵Witing yaklau diyulwi dakana: —Dawak manna laih, ¿yang adika waisyang yatimanah?

¹⁶Saiman Pita yaklau nangnitlana: —Man kuduh Mesías man kidika, Papang sangka atnin Walanibis.

¹⁷Bahang Jisas yaklau kalyulna: —Jonás walanibis Saiman man laih yamni palni ki, kat man laih sau muihni balna munah amanglatas bahang, kaunah yang Papangki kisang kau sakkidika yaklau namangkana.

¹⁸Dawak yang lawik mayultayang man laih Pita, dawak adika kinipala minit yakat yang ūki kidika yamkiki; dawak daunin parasni kidika yaklau bik minit bayakwas karang ki.

¹⁹Kisang kau king kanin sauni kiniting balna kidika laih man tingma yakat āki ki; man lawa sau akat sitma kidika laih kisang yakat bik sitna karang ki, dawak sau akat uluhma kidika laih kisang yakat bik uluhna karang ki.

²⁰Usnit kat Jisas yaklau disainipil balna yakat diyulna witingna yaklau muih as yakat bik yulninna awas ki witing laih Mesías kidika.

²¹Kidika mani kaupak Jisas laih disainipil balna yakat diyulna dai witing laih Jerusalén yakat kiwa kat muihbararak balna, sumalyang balna taninatuna dawak la sumalniyang balna yaklau kalyayamwa kat dalani wauhnin nuhni wauhwarang kidika. Witingna yaklau ihiwa kat ma bas kat yaklauwarang kidika bik diyulna dai.

²²Bahang Pita yaklau ahni naikau dukiwi aput yulwi bilna dai: —¡Dawan, Papang laih dukih kalawas karang! ¡Adika dini laih sip man yakat makalahwas karang ki!

²³Kaunah Jisas laih wiryaklawi Pita yakat kalyulna: —¡Satanas yang kaupak naikau alahwah, kat man laih yang buknik yamadangni yakat yahataman! Man laih Papang di talwa kapat talasman, kaunah muih balna di tatalwa kapat talaman.

²⁴Usnit kat Jisas yaklau disainipil balna yakat diyulna: —Angdika muihni yang disaikipil atnin dukih kalawa kat, witing alas muihni kidika dinitkahwang, dawak panan prihni kidika duwi uskit uiwang.

²⁵Kat angdika muihni witing alas sangnika kidika laihtik yakkuh tarang kidika laih, diswarang ki; kaunah angdika muihni yang yulki sangnika diswarang kidika laih, laihwi yaknin lani kidika duwarang ki.

²⁶¿Muih kidika sau akaupak ais as yamni duwarangyah, sangnika laih diswarang kat? ¿Kidik awas bik minit nuhni ampus lauwarangyah sangnika kidika minit?

²⁷Kat muih Walanibis al kidika laih witing Papangni ayangni yaksihni yamnin lani kidika dawak innisal balna karak bik kaiwarang ki, dawak kidika mani yakat laih muih balna kidika muihnina kat kat minitna diawarang ki witingna ais yayamna kat kaput.

²⁸Barangni manayultayang akat bang-adika muihni balna kaupak buas laih dadauwas karang ki, angkat mani muih al walanibis kidika kaiwi king kawa kat tatalwarang kat laih.