Read Mayangna Matyu 17 Bible Online

Matyu 17 - Mayangna bible

Matyu 17

¹Ma tiaskauas bayakwak usnit kat, Jisas yaklau Pita, Jims dawak wirahni al Jan kauna duwi asang as maluihni yakat diduwi kilkiuna dai.

²Kidika pāni yakat witingna muhnitna yakat, Jisas muihni kidika satuk kalna dai. Muhni kidika laih sihm ma kapat dahlwadai, dawak prakni kidika laih pihni yaringni kalna dai.

³Kidika minitni yakat Moses dawak Elías kauna Jisas karak yulbauwarau kat tatalna dai.

⁴Pita yaklau Jisas yakat kalyulna: —Dawan, ¡yamni ki mayang adika pāni akat bang-atnin! Man dukih man kat, yang ū labanni bas yamki: man as, Moses as dawak Elías as dini.

⁵Pita yulbauwasak kat, mukus yaringni as witingna minitna yakat bukna dai, dawak kidika mukusni kaupak yul as aput yulna: “Adika ki yang walakibis dalani yang lawik waltik yaknayang kidika: witing yakat kaldakanauh.” ,

⁶Kidika dakakana mani kat, disaipil balna kidika laih yamaduwi muhnina kidika sau yakat abubukna dai.

⁷Jisas laih witingna yaihnitna yakat kiwi disukwi diyulna: —Lawanauh; yamaduduwinih.

⁸Dawak tatalna mani kat, muih as kat bik tatalwasdai, kaunah Jisas manah alas sakkat tatalna dai.

⁹Asang kaupak yaklakwi aiwak, Jisas yaklau yamnin diyulna: —Adika dini sahmuhni amana kau kapat talnamana kidika, muih as kau bik yulnamna awas ki, muih Walanibis al kidika watwi yaklauwarang mani kat laih takat.

¹⁰Bahang disaipil balna kidika yaklau Jisas yakat kalyulwi dakakana: —¿Ais yulni lā sumalyang balna kidika yaklau yuyulwih Elías kauh tatuna kainin kidika?

¹¹Dawak Jisas yaklau nangnitnalana: —Rahm ki Elías kauh tatuna kaiwi, dawak witing yaklau di balna bitik kidika barangni yamwarang ki.

¹²Kaunah yang lawik manayultayang Elías laih uman kaina, dawak witingna laih amanglawas dawi amput yamnin kukulna kidika kaput yayamna. Sihm kaput bik, muih Walanibis al kidika laih witingna tingnina yakat dalani wauhwarang ki.

¹³Bahang disaipil balna kidika witingna amanglalana dai Jisas laih Jan muih wassiyang yulni yulwa kidika.

¹⁴Witingna muih bangkidika yakat ui'kakana mani kat, Jisas yaihnit yakat muih al as kaiwi witing muhnit yakat limbabahwi aput kalyulna:

¹⁵—Dawan, yang walakibis yakat minikun talah, kat dutni kalawa kat dalani dutni wauhwi; ma mahni kuh yakat kidik awas kat was yakat bukwi.

¹⁶Man disaimapil balna akat duainayang kaunah witingna sip yamni kalyamwas dadana.

¹⁷Jisas yaklau nangnitnalana: —¡Rahm kulnin lani dis dawak sins dis muihni balna! ¿Mampat mani kat yang manna karak awakiyah? ¿Mampat mani kat manna tikimana kidika trukkiyah? Muih al wahmabin kidika akat duaitanauh.

¹⁸Bahang Jisas yaklau spirit dutni yakat bilwa kat muih al wahmabin kidika kaupak kalahna dai, kidika mani kaupak muih al wahmabin kidika yamni kalahna dai.

¹⁹Usnit kat disaipil balna kidika Jisas karak manah yulbauwi kalyulwi dakakana: —¿Amput dawakat yangna sip kang'yaktasyangna daih spirit dutni yakat?

²⁰Jisas yaklau diyulna: —Kat manna laih rahm kulnin lani kidika uba dibindauh palni dutamana bahang. Barangni mana yultayang manna rahm kulnin lani kidika dutamana kat laih mustat minik us karang bik, adika asangni akat kalyultanama: ‘Adika pāni kaupak lawa pa ūk kau yawah’, dawak asang kidika laih pa ūk kau yaklawarang ki. Di as bik sip awas laih awas awanama ki.[17]

²²Galilea sauni yakat witingna karak kalpakna bangkat Jisas yaklau diyulna: —Muih Walanibis al kidika muih balna tingnina yakat ana karang ki,

²³dawak ihiwarang ki; kaunah ma bas yakat watwi yaklauwarang ki. Kidika yulni dakakana kat uba palni bik kulninna bukna dai.

²⁴Jisas witing disainipil balna karak Capernaum yakat ui'kakana mani kat, makat yulnin ūni lalahni tunan minit dadakwa muihni balna kidika Pita yakat uiwi kaltatalna, dawak aput kalyulwi dakakana: —¿Sumalmayang kidika laih makat yulnin ūni kidika lalahni tunan minit lauwasyah?

²⁵Pita yaklau nangnitlana: —Agha, lauwi. Usnit kat Pita witing ū yakat kawa kat, Jisas yaklau tatuna aput kalyulna: —¿Saiman man laih ais kultamahn? ¿Adika kingni balna laih wais balna yakat tunan minit dadakwih: witingna walaninabis balna yakat kidik awas kat sau ūk muihni balna yakat?

²⁶Pita yaklau nangnitlana: —Sau ūk muihni balna yakat. Jisas yaklau minit lakwi yulna: —Kaput bahang, witingna walaninabis balna laih di as bik lalauwas karang ki.

²⁷Kaunah, muih as bik kalni laknin awas yulni laih, lakun yakat yawa kuyuhl kidika ruhmtah dawak waspa dini tatuna tuswarang kidika iltah. Kidika tinipas yakat lalah dadasni as yakma ki, kidika karak laih yang dawak man tunama minit launin kidika minit bayak karang ki; duta yawa minit lautah.