Read Mayangna Matyu 19 Bible Online

Matyu 19 - Mayangna bible

Matyu 19

¹Jisas laih adika dini balna yulwa dawi Galilea kaupak kalahwi Jordán wasni kaupak ma kilwa niningkauh Judea sauni yakat kiuna dai.

²Muih mahni palni usnit uhuina dai, dawak kidika pāni yakat siknis muihni balna yakat sikninanis kaupak yamni diyamna dai.

³Parisi muihni balna buas laih Jisas yakat dutni kalyamna atnin yulni witing yaihnit yakat uiwi kalyulwi dakakana: —¿Muih as kidika marid lani kaupak dakwi kalahna atnin sipyah di as yulni?

⁴Jisas yaklau nangnitnalana: —¿Manna baisa yulta talas manah Ulna wauhnitaya yakat tatuna kau yamna muihni balna kidika, ‘muih al dawak muih yal yamna kidika’?

⁵Dawak aput yulna: ‘Kidika bahang, muih al kidika laih papangni dawak nanangni dawarang ki witing yalni karak kalduna atnin yulni, dawak witingna laih sihm muih aslah kapat karang ki.’

⁶Kaput bahang waralaih muih bu awas ki, kaunah muih aslah ki. Kaput bahang Papang yaklau libitna kidika laih muih al yaklau sip dakwi yakwas karang ki.

⁷Witingna yaklau kalyulwi dakakana: —¿Bahang ais yulni, Moses yaklau yamnin yulnayah muih yalni yakat dakwi kalahna wauhnitaya as kalawi sihpamna atnin?

⁸Jisas yaklau diyulna: —Manna laih kulnamna dadasni bahang, Moses yaklau manayulna yalmana balna kaupak dakta alahwana atnamna; kaunah tatuna kau laih kaput awasdai.

⁹Yang lawik manayultayang angdika muihni kat witing yalni karak dakwi kalahwi yal ūk duwarang kat, yal kidika al ūk karak la munah kalduduwas lani yamwas bik, marid lani bahwi.[19],

¹⁰Disainipil balna yaklau kalyuyulna: —Adika lani adika muih al yalni karak kaput atnin laih, sip muih al kidika yal ūk duwas karang ki dawak yal kidika bik al ūk duwas karang ki.

¹¹Jisas yaklau nangnitnalana: —Muih bitik laih adika yulni adika amanglalawas ki, kaunah Papang yaklau amanglana atnin muihni balna diana kidika manah amanglalawi.

¹²Tanka sat sat bangkidika yaklau diyamwa kat muih ahal balna kidika laih yal duduwi: as as balna kidika laih uman kaput batahn dadana marid lani yakat sip awas atnin, ūk balna kidika laih muih ahal balna kidika yaklau sip awas diyayamwi, dawak ūk balna kidika laih sip awas kapat yalalahwi Papang king kawa sauni kidika yulni.

¹³Jisas yakat walabis buas duwi uina witingna minitna yakat tingni dulauwi minit yulna atnin yulni; kaunah disaipil balna kidika laih duwi uiwa muihni balna yakat dibibilna dai.

¹⁴Bahang Jisas yaklau yulna: —Datanang kat walabis balna kidika yang yakat aiwang, dawak nawatwi sisihwinih, kat Papang king kawa sauni kidika laih sihm witingna balna kapat kidika dinina.

¹⁵Walabis balna kidika minitna yakat tingni kidika dulauna dawak kidika pāni kaupak kalahwi kiuna dai.

¹⁶Muih al wahma as Jisas yakat kiwi kaltalna dawak kalyulwi dakana: —Sumalyang,[20] ¿ais dini yamni as yamtik ban kaput sangka atnin lani kidika dukiyah?

¹⁷Jisas yaklau nangnitlana: —¿Ais yulni di as yamni kidika yulni yayulta dakamahn? Di as yamni kidika laih aslah ki.[21] Kaunah sangka atnin lani yakat awanam kultaman kat, la balna kidika yakat daka yamtah.

¹⁸Muih al wahma kidika yaklau yulwi dakana: —¿Angdika balna? Dawak Jisas yaklau kalyulna: —‘Man muih iwinih, marid lani bahwinih, di malwinih, alas yulta muih as kau bik dutni yamwinih,

¹⁹papangma dawak nanangma yakat risnipik nuhni yamtah, dawak man wanaihma kidika yakat dalani talah sihm man muihni kapat.’

²⁰Muih al wahma kidika yaklau yulna: —Kidika dini balna bitik yamnayang. ¿Ais kidika baisa yamtasyahn?

²¹Jisas yaklau nangnitlana: —Man barangni atnin kultaman kat, yawa di dutaman balna kidika bitik bakanmukta muih balna minikunni yakat diatah. Kaput laih man kisang yakat dima balna kidika duma. Usnit kat aiwa yang uskit uitah.

²²Muih al wahma kidika witing adika yulni dakawi kulnin bukwi kiuna dai, kat witing laih uba palni di duyang dai kidika yulni.

²³Bahang Jisas yaklau disainipil balna yakat diyulna: —Barangni manayultayang muih as di duyang kidika laih dadasni palni karangki Papang king kawa lani kidika yakat kana atnin.

²⁴Wattik manayultayang kiamil as nining yakat laih baisa isi ki silip minikpa munah bayakna atnin dawak di duyang muihni as Papang king kawa lani yakat kana atnin karak dawakat.

²⁵Disainipil balna kidika laih kidika yulni dakawi amanglawas dawi aput yuyulna: —Bahang, ¿wais kidika laih laihwi yaknin lani kidika duna atnin sip karangyah?

²⁶Jisas yaklau ditalwi nangnitnalana: —Adika dini muih balna niningna yakat laih sip awaski, kaunah Papang niningyakat laih di bitik kidika sip ki.

²⁷Bahang Pita yaklau kalyulna: —Yangna laih di balna dutayangna dai kidika bitik damuktik man usmat uinayangna. ¿Bahang ais dutanakiyah?

²⁸Jisas yaklau nangnitnalana: —Barangni manayultayang di balna kidika bitik wisamni manah kalwarang mani kat, muih Walanibis al tronni alasnina yaksihni kidika yakat yalahwarang mani kat, manna yang uskit aiwanamana kidika bik trun 12 yakat yalahta Israel sulani balna 12 kidika yakat lanina yamtanama ki.

²⁹Dawak angdika muihni balna yang yulki ūnina, wirahnina ahal balna kidik awas kat wirahnina yayal balna, papangnina, nanangnina, walaninabis balna, saunina dadana balna kidika laih kidika minit yakat wat 100 duduwarang ki, dawak ban sangka atnin lani kidika bik duduwarang ki.

³⁰Kaunah waradika muih mahni balna tatuna yakat kidika laih, witni yakat yaklalawarang ki; dawak waradika muih mahni balna witni yakat kidika laih, tatuna yakat yaklalawarang ki.