Read Mayangna Matyu 21 Bible Online

Matyu 21 - Mayangna bible

Matyu 21

¹Jerusalén ulis dawak Olib asangni Betfagé yakat ui'kakana mani kat, Jisas yaklau disainipil balna kidika kaupak muih bu yakwi sihwi,

²aput diyulna dai: —Betfagé muhnit kau tawan bin as pakkidika yakat yawanauh. Kidika pāni yakat biriku yal as dawa biriku bin as karak sitna kat sakkarang ki. Uluhta duai'yatanauh.

³Dawak muih as manayulwi dakawarang kat, Dawan yaklau yulwi bahang usnit kat watwi mawarangki kaltinama.

⁴Adika kaput kalahna dai prapit ais yulwi ulna dai kidika yakat kalahna atnin yulni:

⁵“Sayan tawanni nuhni yakat kalyultanauh: ‘Talah, man Kingma kidika laih man yakat kaiwi, minikunni, biriku as kau kilwi, biriku bin as, aras di trukyang walanibis as kau.’ ”

⁶Disaipil balna kidika laih uiwi Jisas yamnin diyulna dai kidika yayamna dai.

⁷Biriku walanibis kidika karak laihwi duwi uina dai, dawak kidika balna dangnina yakat kalmumukwa dini balna kidika ihilwa kat Jisas kilna dai.

⁸Muih mahni palni bangdai. Muih balna buas kidika laih kalmumukwa dini kidika sau yakat ririwa dai dawak ūk balna kidika laih pan ting bahwi lalakwa dai.

⁹Dawak muih mahni palni tatuna yakat dawak dangnit yakat bik uiwa kidika laih, aput yulwi sararahwa dai: —¡King Devid Walanibis al kidika alasnina yaksihni[22] yamna karang! ¡Dawan ayangni duwi kaiwa kidika laih ayangni nuhni yamna ki! ¡Maluihni yakat laih alasnina yaksihni yamna karang!

¹⁰Jisas witing Jerusalén yakat kiwi kana mani kat, tawan nuhni muihni balna kidika bitik laih di pini manah yamwi aput yulwi dakakawa dai: —¿Adika muihni wais yah?

¹¹Dawak muih balna kidika laih nangnitlalawadai: —Adika laih Galilea sauni Nazaret kaupak prapit Jisas kidika ki.

¹²Jisas makat yulnin ūni yakat kawi muih di bakanyang balna bangdai kidika bitik kangwi yakmukna dai. Muih balna yakat lalah sinsni diayawa dawak buhtuku ilwi bakakanwa tinibil balna bangdai kidika abuklamukwi;

¹³aput diyulna: —Ulna yakat aput yulwi: ‘Yang ūki kidika laih makat yulnin ūni karang’, kaunah manna laih di malyang balna pānina sulihni yamtamana.

¹⁴Makat yulnin ūni yakat muih miniknapa di tatalwas dawak muihnina dikukuslana balna kidika bik Jisas yaihnit yakat uiwa kat sikninanis kaupak yamni diyamna dai.

¹⁵Kaunah sumalyang balna taninatuna dawak lā sumalyang balna kidika Jisas yaklau taldas dini balna kidika yamwa kat tatalna manikat dawak bik walabis balna kidika laih makat yulnin ūni yakat aput yulwi sararahwa kat dakakana mani kat: “¡King Devid Walanibis al kidika laih ayangni yaksihni yamna karang!”, kulninna daukalwi

¹⁶Jisas yakat aput kalyuyulna: —¿Kidika muihni balna ais yuyulwa kidika dakamahn? Jisas yaklau nangnitnalana: —Agha, dakayang. Kaunah ¿manna baisa yulta talas manah ulna yakat adika yulni yulwa kidika? Aput yulwi: ‘Walabis balna unbabauwa kidika karak, muih binina ta susuwa kauna unbabauwa kidika karak bik, man ayangma nuhni yamnin kidika yaknaman.’

¹⁷Bahang didamukwi tawan nuhni kaupak kalahwi Betania yakat kiwi payahna dai.

¹⁸Jisas witing mapiris niningkauh tawan nuhni yakat nawatwi kiwa kat yuh kallaihna dai.

¹⁹Ani damni panan as ta yaihnit yakat sakkat talwi yaihnit yakat kiuna, kaunah kidika panan laih basni manah duwa dai. Bahang ani damni panan yakat kalyulna: —¡Watta minik yaknam awas ki! Dawak kidika minitni yakat ani damni panan kidika laih kusulana dai.

²⁰Disaipil balna laih di kalahna kidika talwi muihsakdauwi Jisas yakat kalyulwi dakakana: —¿Amput dawakat ani damni panan kidika laih sirihni palni kusulanayah?

²¹Jisas yaklau nangnitnalana: —Barangni manayultayang manna rahm kulnin lani duta rahm kultanama kat, ani damni panan akat kalyamnayang kaput laih yamtas awanamaki, kaunah baisa kidika minit yakat adika asangni akat kalyultanama kat: ‘Kidika kaupak lawa kuma yakat ayawah’, kaltinama kat, kaput kalwarang ki.

²²Dawak manna mamatna yulta, rahm kulnin lani kidika karak yultanama kat, dutanama ki.

²³Kidika usnit kat, Jisas laih makat yulnin ūni yakat kana dai. Kidika yakat sumalwa sakkat, sumalyang balna taninatuna dawak Ju muihnibararak balna karak Jisas yaihnit yakat uiwi kalyulwi dakakana: —¿Wais parasni kau duta adika dini yamtamahn? ¿Adika parasni wais yaklau manayah?

²⁴Jisas yaklau nangnitnalana: —Yang bik manna yakat yulwi dakana as manayultik dakaki ki: ¿Jan kidika wais yaklau sihnayah muih wassina atnin, Papang yaklau kidik awas kat muih balna yaklau? Manna lawa nangkitlatanama kat, yang lawik manayulki ki wais parasni kau dutik adika dini yamtyangpa. Witingna manah biri biri yulwi dakakana: “Papang yaklau sihna atdarang kat, witing yaklau maiyulwarang: ‘Bahang, ¿ampadawakat rahm kalkultasmanadaih?’

²⁵

²⁶Dawak sip muih balna sisihna atdaski, kat muih balna bitik laih Jan kidika prapit as kalkukulwa dai, bahang kidika yulni laih mayang muih balna yakat yamaninadudi.”

²⁷Bahang kaput laih witingna Jisas yakat nangnitlalana: —Mayang nu awasmayang. Bahang Jisas yaklau nangnitnalana: —Bahang yang bik sip manna yakat manayultasyang ais parasni kau dutik adika dini yamtayangpa.

²⁸Jisas yaklau diyulwi dakana: —¿Ais kultamanah manna adika yulni? Muih al as witing walanibis ahal bu duwa dai, dawak kidika kaupak as yakat kalyulna: ‘Walakibis al, man warmani yawa wainki yamak yakat wark alahwah.’

²⁹Walanibis al kidika yaklau nangnitlana: ‘¡Yawana atnik dukih yawas ki!’ Kaunah usnit kat kulnin wirlawi kiuna dai.

³⁰Usnit kat papangni kidika laih walanibis uk yakat sihm kidika yulni kalyulna. Kidika laih nangnitlana: ‘Agah, dakiwan, yawaki ki.’ Kaunah kiwas dana dai.

³¹¿Bu kidika kaupak angdika kauh papangni dukih kalawa dai kidika kaput yamnayah? Witingna yaklau nangnitlalana: —Tatuna kidika. Dawak Jisas yaklau diyulna: —Barangni manayultayang Roma dini tunan minit dadakwa balna kidika dawak ahal karak kalpakyang yayalni balna kidika kauh tatuna kakawarang ki Papang king kawa sauni yakat.

³²Kat Jan yaklau kaiwi sumalna amput yalahna atnamna kidika, kaunah manna laih rahm kalkultas danamana dai; wirlawa kat, kidika tunan minit dakyang balna dawak ahal karak kalpakyang balna kidika kauh laih rahm kaldakakana dai. Kaunah manna laih, adika dini balna bitik talnamana dai karang bik, kulnamna wirlata rahm kalkultas danamana dai.

³³“Malni yulni uk dakanauh: Yamak dawan as yanimak yakat wain yamak as dahwi daklanadai; wain yamnin pani as yamna dawak mayakat kilwi maintalnin pani as yamna. Usnit kat sauni kidika di malyang balna yakat wayaki bakanpamwi pa uk kau kiuna.

³⁴Minik kalahna mani kat, dini yamyang balna buas yakwi sihna di malyang balna yakat yuyulwa kat witing dunin dai kidika kalana atninna.

³⁵Kaunah di malyang balna kidika laih yamak dawan dini yamyang balna kidika niningna yakat tingnina dulalana: buas yakat laih dalani diayana, ūk balna yakat laih ihīna dawak ūk balna yakat laih kipala kau babahrna dai.

³⁶Yamak dawan kidika laih watwi baisa dini yamyang balna sihna dai muhnilau dai kidika karak dawakat; kaunah di malyang balna kidika yaklau bitik kau yakat sihm kaput diyayamna dai.

³⁷“Witni kat witing walanibis al palni kidika sihna, aput kulwinah: ‘Rahm palni yang walakibis kidika laih rispik kalyayamwarang ki.’

³⁸Kaunah walanibis al kidika yakat tatalna mani kat, di malyang balna kidika laih biri biri yulwi dakakana: ‘Adika ki di pahni duwarang muihni kidika; bahang mayang īdi witing dini balna kidika dudanang.’

³⁹Kaput laih laihwi wain yamak kaupak yakwi īpapamna dai.

⁴⁰“Dawak waralaih, wain yamak dawan kidika kaiwi, ¿kidika di malyang balna yakat ais diyamwarang kultamanah?”

⁴¹Nangnitlalana: —Kidika muih dudutni balna yakat laih miniknakun talwas īmukwarang ki, dawak wain yamak kidika laih di malyang uk balna yakat wayaki dibakanwarang ki di minik kalahwa kat ampus kalaninna kidika mani kat kalalawarang kidika balna yakat.

⁴²Bahang Jisas yaklau kidika balna yakat diyulna: —¿Manna wat as bik Ulna wauhnitaya kidika yulta talasmanah? Yuyulwi: ‘Ū yamyang balna witingna kipala as yakwi dapapamna kidika laih kidika kinipala laih tunan nuhni kalna ki. Adika laih Dawan yaklau yamna, dawak mayang laih muihsakdauna bangmayang.’

⁴³Kidika bahang manna yakat manayultayang Papang king kawa sauni kidika laih tingmana kaupak manadakyakwarang ki, dawak ampus minik yaknin kidika kaput yakwa tawanni yakat kalawarang ki.

⁴⁴[Kipala kidika niningkauh laih, kidika minit yakat wais bukwarang laih muihni dakwi dis dawarang ki; dawak kipala kidika muih as minit yakat bukwarang laih, muihni kidika lungni manah yamwarang ki.][23]

⁴⁵Sumalyang balna taninatuna dawak parisi muihni balna kauna witingna Jisas yaklau malni yulni yulwa kidika dakakana kat, witingna amanglalana dai witingna yakat diyulwa kidika.

⁴⁶Bahang īpamna atnin kukulna, kaunah yamaduduwa dai, kat muih balna kidika laih kukulwa dai Jisas laih prapit as ki.