Read Mayangna Matyu 22 Bible Online

Matyu 22 - Mayangna bible

Matyu 22

¹Jisas yaklau watwi malni yulni balna kau yul dibauna dai. Aput diyulna:

²“Papang king kawa sauni kidika laih sihm muih al as walanibis al marit kalahwa kat kasnin alasnina yamna kapat ki.

³Witing dini yamyang balna yakat sihna muih yuyulwa kat aina atninna, kaunah kidika muihni balna laih uiwas dadana dai.

⁴Watwi dini yamyang balna uk sihna, aput diyulwinah: ‘Ainin muihni balna yakat diyultanauh kasnin dini kidika laih uman ridi yamnayang. Yang tukiruh balna dawak tingkilau balna salalani kidika īna atnin sihnayang, bahang di balna bitik laih ridi ki; kasnin alasnina yakat aiwang.’

⁵Kaunah uinin muihni balna kidika laih dakawas dadana dai. Witingna kaupak as kidika laih sauni balna yakat kiuna dawak uk kidika laih witing lalahni warkni balna yakat kiuna dai,

⁶dawak uk balna kidika laih king dini yamyang yakat laihwi dutni kalyamwi ihīna dai.

⁷Bahang king laih uba palni kulnin daukalna, dawak witing soldados balna duwa yakat dipakna kidika muih īyang balna yakat laihwi īna atninna dawak tawannina kidika bik busna atninna.

⁸Usnit kat dini yamyang balna yakat diyulna: ‘Marid yakat kasnin dini kidika laih di bitik ridi ki, kaunah ainin muihni balna kidika laih aininna awasdai.

⁹Bahang manna ta balna nunuhni yakat yawanauh, dawak muih yapak kalpaktanama kidika balna bitik yultanang kat kasnin alasnina akat aiwang.’

¹⁰Bahang di yamyang balna kidika laih ta nunuhni balna yakat kalalahna dawak muih yapak kalpapakwa kidika bitik ududuna, muih dudutni dawak yayamni bik; dawak kaput laih ū paskau ahni panuhni kidika muih manah bung dana dai.

¹¹“King witing muih diyulwakat uina balna yakat talna kana mani kat, muih as kidika laih marit prakni dis kiuna dai.

¹²Aput kalyulna: ‘Yang karak kaltalyang yamni, ¿amput awanamahn akat, man marit prakni dis aiwanaman kat?’ Kaunah uk kidika laih ap dana dai.

¹³Bahang king yaklau diyulna tibil yakat di lalakwa muihni balna yakat: ‘Kalni yakat dawak tingni yakat bik sitta ahni puksani yakat ruhmyaktanauh. Bahang kaput laih kaidinin lani kidika dawak ananina karksnin lani kidika kaiwarang ki.’

¹⁴Kat mahni palni kidika laih diyulwa kat uina ki, kaunah walwi yakna balna kidika laih bulah palni ki.”

¹⁵Kidika usnit kat, parisi muihni balna laih uiwi yulbauwi tatalna Jisas yakat yul as kalyuyulwa kat ais yulwa kat kidika kau yulni yakna atnin.

¹⁶Kaput laih witingna kaupak muih buas dawak Herod kaupak muih buas yakwi libitwi sisihna dai, uiwi aput kalyulna atninna: —Sumalyang, yangna yamni nuyangna man laih yul rahm yultaman kidika, dawak man laih muih balna yuyulwa yakat dakas Papang yaklau amput yalahnin yulwa yakat sumaltaman kidika bik yangna nuyangna, kat man laih muih muhni yakat talas la yamtaman.

¹⁷Bahang man kulnam lani kidika yanatah: ¿Roma dini tunan minit dakwa muihni yakat lautik kalanikna kidika yamniyah, kidik awas kat dutniyah?

¹⁸Jisas laih witingna kulninna lani dutni duduwa kidika amanglawi aput diyulna: —Sins dis muihni balna, ¿ais yulni manna yang yalaihnin dini atamanah?

¹⁹Tunan minit launin lalahni dadasni kidika nikingkatanauh. Dawak lalah as duaiwi kalalana,

²⁰dawak Jisas yaklau nangnitnalana: —¿Adika wais muhniyah dawak ayangni ulna kidika laih wais ayangniyah?

²¹Witingna yaklau nangnitlalana: —King tanit nuhni kaupak. Bahang Jisas yaklau diyulna: —Bahang tunan minit dakyang tanituna dini kidika witing yakat kalatanauh, dawak Papang dini kidika laih Papang yakat kalatanauh.

²²Kidika yulni dakakana mani kat, yamni dakawi dapamwi uina dai.

²³Sihm kidika mani, saduceos muihni balna buas Jisas yakat talna uina. Saduceos muihni balna laih yuyulwi muih dadauna balna kidika laih watwi yaklalauwas karang ki; kaput bahang adika yulni kidika witing yakat duwi uina dai:

²⁴—Sumalyang, Moses yaklau yulna muih al as witing walanibis dis dauwarang kat sipki witing wirahni al kidika yaklau yal tingmak yakat duwi walanibis kalana atnin wirahni dauna kidika pani yakat.

²⁵Bahang wat as kat yangna paskingna akat kalwirah ahal tiaskaubu bangdai. Tatuna kidika laih yal duna usnit kat dauna. Walabis dis dai bahang, witing tingnimak kidika laih wirahni al usnit kidika duna dai.

²⁶Usnit kidika bik sihm kaput kalkalahna dai, dawak usnit kat bas kidika yakat, dawak kaput manah kalwirah ahal tiaskaubu kidika yakat dikalahna dai.

²⁷Kalwirah ahal balna kidika dadauna usnit kat yal kidika bik dauna dai.

²⁸Bahang yamni, yaklauna atnin mani yakat, ¿kalwirah ahal tiaskaubu kidika balna kaupak angdika kauh witing yalni karangyah, witingna bitik kidika yalni karak kalduduna dai kat?

²⁹Jisas yaklau nangnitnalana: —¡Manna laih rahm palni tunamana balakna, Ulna wauhnitaya kidika dawak Papang parasni amanglatas mana kidika yulni!

³⁰Muih dadauna balna kidika watwi yaklalauwarang mani kat, muih ahal dawak yayal balna kidika laih kalduduwas karang ki, bahang witingna laih sihm kisang kau insal balna bangkidika kapat karang ki.

³¹Dawak muih dadauna balna yaklalauwa kidika niningkauh laih, ¿manna baisa yulta talas manah Papang witing palni aput yulna kidika:

³²‘Yang kuduh Abraham, Isaac dawak Jacob Papangniyang kidika’? ¡Dawak Papang laih dadauna balna Papangni awaski, kaunah sangka balna kidika Papangnina!

³³Jisas yulwi sumalna yulni kidika muih balna dakakana kat yamni palni dakakana dai.

³⁴Parisi muihni balna laih Jisas yaklau saduceos muihni balna yakat diyamwakat ap dadana kidika dakakana kat, witingna kalududuhna dai,

³⁵dawak witingna kaupak as lā sumalniyang dai kidika laih Jisas yakat dutni kalyamna atnin yulni aput kalyulwi dakana:

³⁶—Sumalyang, ¿lā pasyakat angdika lani kidika kauh tanit nuhni kalkulnayah?

³⁷Jisas yaklau nangnitlana: —‘Man Papangma Dawan yakat ismang, sangmaka dawak kulnam bitik karak dalani kaltalah.’

³⁸Adika ki baisa tanit nuhni dawak tatuna kidika la balna yakat.

³⁹Kaunah kidika kaupak usnit yakat uk as sak ki, sihm kapat as; kidika laih aput yulwi: ‘Man wanaihma yakat dalani talah sihm man muihma dalani talaman kapat.’

⁴⁰Adika lani balna bu adika laih lā bitik yakat dawak prapit balna sumamalna kidika yakat bik kawi.

⁴¹Parisi muihni balna laih baisa kaluduhna bangkat,

⁴²Jisas yaklau diyulwi dakana: —¿Manna ais kultamanah Mesías kidika yulni? ¿Wais sulani kaupak kaikalahwih? Witingna yaklau nangnitlalana: —Devid sulani kaupak kaikalahwi.

⁴³Bahang Jisas yaklau diyulna: —¿Bahang amput kat Devid witing Spirit yakat Dawan kaltih? Kat Devid yaklau yulna:

⁴⁴‘Dawan yaklau Dakiwan yakat kalyulna: Yang tingkipal niningyakat yalahtah, yang lawik man namangkauh yaklalauwa muihni balna kidika man klma dinit yakat aki mani kat.’

⁴⁵¿Amput dawakat Mesías kidika Devid sulani kaupak kalahwarangyah, Devid yaklau Dawan kaltakat?

⁴⁶Muih as bik nangnitlawas dai, dawak kidika mani kaupak muih as bik witing yakat yulwi dakanin yulni kalyulwi dakawas dai.