Read Mayangna Matyu 26 Bible Online

Matyu 26 - Mayangna bible

Matyu 26

¹Jisas witing sumalwi dawi disainipil balna yakat diyulna:

²—Manna nu mana, ma bu bayakwa kat insal kaiwi bayakna mani kidika, dawak muih Walanibis al kidika laih muih ūk balna tingnina yakat bukwa kat pan prihni yakat ilwi papana karang ki.

³Kidika mani yakat, sumalyang balna taninatuna dawak Ju muihninabararak balna kauna kalududuhna dai sumalyang nuhni Caifás ūni kidika yakat,

⁴dawak yulbauwi tatalna dai Jisas kidika yakat alas kalyulwi īna atnin.

⁵Kaunah yuyulwa dai: —Kasnin alasnina yakat laih awas ki, muih balna kidika kiri yaklaunin awas yulni.

⁶Jisas laih Saiman pilau muihni kalatwa dai kidika ūni yakat sakdai;

⁷kidika yakat muih yal as witing yaihnit yakat kiuna dai kidika yalni laih kahnin dini walapni minit dini kidika dukiwalik dai. Jisas laih tibil yakat sakkat, yal kidika yaklau Jisas tunani yakat kahnin dini walapni kidika kau utuhna dai.

⁸Disaipil balna kidika laih talwi kulninna daukalwi aput yuyulna: —¿Ais yulni adika dini dauh utuhwih?

⁹Lalah nuhni minit bakanpamwi muih miniknakunni balna yakat ilp dianin sip dai.

¹⁰Jisas laih kidika yulni dakawi diyulna: —¿Ais yulni adika yalni akat ustamanah? Yang yakat wark as yamni yamna.

¹¹Muih miniknakunni balna kidika laih manna pasmangna yakat ban dutanama ki, kaunah yang laih ban yadutas awanama ki.

¹²Adika yalni yang muihki nuhni yakat kahnin dini walapi utuhna kidika laih sau pasyakat yanunin kidika yulni ridi yayamna.

¹³Barangni manayultayang adika yulni yamni adika sau bitik yakat yulwi sumalwarang mani kat, adika yalni ais yamna kidika bik yulna karang ki, bahang kaput laih maisingkatna karang.

¹⁴Disaipil 12 balna kidika kaupak as, Judas Iscariote kaltadai kidika, sumalyang balna taninatuna yakat talna kiuna dai

¹⁵dawak aput diyulna: —¿Ampus yadangtimanah, Jisas kidika tingmana yakat akikat? Witingna yaklau lalah dadasni 30 lauwi kalalana dai.

¹⁶Dawak kidika mani kaupak Judas laih amput dawi Jisas kidika witingna tingnina yakat anin kidika walwa dai.

¹⁷Ma tatuna alasnina yakat plawar pupuhnin dini dis busna kat kakaswa dai kidika mani, disaipil balna kidika laih Jisas yaihnit yakat uiwi kalyulwi dakakana: —¿Ensal kaiwi bayakna manisan kasnin dini holi kidika angdika pani yakat ridi yamtik matanakiyah?

¹⁸Witing yaklau nangnitnalana: —Tawan nuhni yakat muih as ūni kau yawa kalyultanauh: ‘Sumalyang kidika yaklau yulwi: Yang awarki kidika laih ulis dana ki, dawak man ūma yakat yang disikipulo balna karak yawa ki ki insal kaiwi bayakna alasnina kidika yamna atnin yulni.’

¹⁹Disaipil balna kidika laih Jisas yaklau amput yamnin diyulna dai kidika kaput yayamna dai, dawak insal kaiwi bayakna manisan kasnin dini holi kidika ridi yayamna dai.

²⁰Puklakna mani kat, Jisas laih disainipil balna karak tibil yakat bangdai;

²¹dawak di kaswabangkat, aput diyulna: —Barangni manayultayang manna kaupak as yaklau malni kau pāt yakat yahawarang ki.

²²Witingna laih kulninna bukna dai, dawak as as kalahwi kalyulwi dakakana: —Dawan, ¿ais yang awakiyah?

²³Jisas yaklau nangnitnalana: —Plawar busna suihtayang plitni kidika yakat witing bik planiwar busna suihwa muihni kidika yaklau malni kau pāt yakat yahawarang ki.

²⁴Muih Walanibis al kidika laih ta yakat lapakna atnin karang ki, Ulna yakat yulwa kapau; kaunah, ¡malni kau pāt yakat āwa muihni kidika laih minikun palni karang ki! Baisa yamni dai batahnwas dai kat.

²⁵Bahang Judas witing malni kau īwa dai kidika yaklau kalyulwi dakana: —Sumalyang, ¿ais yang awakiyah? Jisas yaklau nangnitlana: —Man lawa yulnaman.

²⁶Witingna laih di kaswa bangkat, Jisas laih plawar busna kidika duwi Papang yakat tingkih kalana usnit kat, bahwi dawi aput yulwinah disainipil balna yakat diana: —Duta kastanauh, adika laih yang muihki nuhni.

²⁷Usnit kat tingni yakat sutak as duwi Papang yakat tingkih kalana usnit kat, aput yulwinah witingna yakat diana: —Adika sunitak kaupak manna bitik ditanauh,

²⁸kat adika laih yang aki, kidika kau aslah kalahnin lani barangni yamwa kidika,[27], muih mahni dutnina dawak disnin yulni a utuhwa kidika.

²⁹Kaunah manayultayang wat laih adika wainni wasni kaupak ditas awaki ki, Papangki king kawa sauni yakat manna karak kalpakki kat laih wattik wain wisamni wasni kidika kaupak diki ki.

³⁰Salmo unni bauna balna kidika un babauna usnit kat, Olib asangni yakat uina dai.

³¹Dawak Jisas yaklau diyulna: —Manna bitik laih adika puknita yang yakat rahm kulnin lani dutamana kidika distanamaki. Ulna kidika yakat kaput yulwi: ‘Sīp maintalyang kidika yakat īki ki, dawak sīp balna kidika laih rawi dislalawarang ki.’

³²Kaunah yang wattik lauwaki mani kat, Galilea yakat yang tatuna yawaki ki manna karak dawakat.

³³Pita yaklau nangnitlana: —Witingna bitik man yakat rahm kulnin lani duduwa kidika didiswarang bik, yang laih distas awaki ki.

³⁴Jisas yaklau kalyulna: —Barangni mayultayang adika puknita baisa sakara yulwas tanitkauh yakat wat bas yang yatalasyang tima.

³⁵Pita yaklau barangni yulna: —Man karak daunik karang bik, matalasyang tis awaki ki. Dawak disaipil balna bitik kau kaput yuyulwa dai.

³⁶Usnit kat Jisas laih disainipil balna karak uina dai pa as ayangni Getsemani tayakat, dawak kidika yakat Jisas yaklau diyulna: —Akat yalahtanauh, yang laih kidika yakat minikit yulna yawayang.

³⁷Dawak Pita dawi Sibidi walanibis balna bu kidika kauna duwi kiuna, dawak witing laih kulnin sau yakat bukna kaldakana dai.

³⁸Aput diyulna: —Yang kulnik yakat daunin lani kidika laih kaldakayang. Manna laih akat wattanauh, dawak sahmuhni bang-awanauh yang karak.

³⁹Usnit kat Jisas laih kidika kaupak baisa tanit yakat kiwi abukwi muhni kidika sau yakat sukdawi, aput yulwi minit yulna: “Yang Papangki, man sipman kat adika dinin tapahlni adika kaupak yalaihta yaktah; kaunah yang dukih yawa kidika laih yamwinih, kaunah man dukih mawa kidika yamtah.”

⁴⁰Usnit kat disainipil balna bangdai kidika yakat nawatwi kiuna, dawak kamana bangkat ditalna dai. Pita yakat kalyulna: —¿Awar as kat bik yang karak sahmuhni bang-atnamna sip awasdaih?

⁴¹Sahmuhni bangkauna mamatna yultanauh, dutni yakat buknamna awas yulni. Manna laih kulnin lani yamni dutanama, kaunah parasmana diski.

⁴²Wat bu yakat kiwi aput minit yulna: “Yang Papangki, adika traini talnin adika minit bayakyaknin sip awas kat, man kulnam lani kidika yamtah.”

⁴³Nawatwi kaiwa kat, disaipil balna kidika laih watwi kakamana kat ditalna dai, kat uba palni miniknakauhna dai kidika yulni.

⁴⁴Wat bas yakat didamukwi kiwi sihm yulni balna kidika yulwi minit yulna dai.

⁴⁵Bahang disaipil balna bangdai kidika yakat nawatwi kaiwi aput diyulna: —¿Manna baisa ama urupda bangmanah? Muih Walanibis al kidika laih dutni yamyang muihni balna tingnina yakat buknin kidika awarni kaiwi kana.

⁴⁶Lauwanauh; malni kau pāt yakat yahawa muihni kidika laih uman kaiwi uliswi.

⁴⁷Jisas laih baisa yulbauwasak kat, disaipil balna 12 kidika kaupak as Judas kalta kidika, muih mahni karak kalpakwi isparah dawak pan duwi ui kakana dai. Sumalyang balna taninatuna balna dawak tawan muihnibararak balna yaklau disisihwa kat uina dai.

⁴⁸Malni kau pāt yakat āyang muihni Judas yaklau sain as diana dai, aput diyulwinah: “Angdika muihni yakat yang lawik umki kidika laih kidika karang ki; bahang laihtanauh.”

⁴⁹Kaput laih, Jisas yaihnit yakat kiwi aput kalyulna: —¡Pukta yamni, Sumalyang! Dawak umna dai.

⁵⁰Jisas yaklau nangnitlana: —Yang karak kaltalyang yamni, ais yamnam kulta aiwanaman kidika yamtah. Bahang uk balna kidika laih yaihnit yakat uiwi Jisas yakat lalaihna dai.

⁵¹Kidika minitni yakat, Jisas karak bangdai kidika kaupak as kalahwi isparah yakwi sumalyang nuhni dini yamyang kidika tapani nakas dakna dai.

⁵²Jisas yaklau kalyulna: —Ismaparah kidika pani yakat atustah. Kat isparah kau kalbabauwa muihni balna bitik kidika laih isparah kau dadauna karang ki.

⁵³¿Man nu awasmahn yang Papangki kalni dinit buknik sipyang kidika, dawak witing yaklau warminitni insal kalbauyang muihni manah 12 minit yakat yasihnin sip kidika?

⁵⁴Kaunah kidika niningkauh laih, ¿amput kalahwarangyah Ulna balna kidika kaput, kaput kalahwarangki atwa kidika?

⁵⁵Usnitkat Jisas yaklau muih balna yakat diyulwi dakana: —¿Ais yulni manna isparah dawak pan duta aiwanamanah yalaihna atnamna yulni, sihm yang laih muih dutni as yang kapat? Yang laih ma bitik yakat makat yulnin ūni yakat sumalnayang dai kaunah sip yalaihtasmana dai.

⁵⁶Kaunah adika dini balna bitik laih kalahwi ulna balna yakat prapit balna yuyulna dai kidika kaput kalahna atnin yulni. Kidika mani yakat, disaipil balna bitik kidika laih Jisas yakat alas dapamwi kikirana dai.

⁵⁷Jisas yakat lalaihan muihni balna dai kidika laih sumalyang nuhni Caifás ūni kidika yakat duwi uina dai, lā tunan muihni balna dawak muihbararak balna kauna kaluduhna bangdai kidika yakat.

⁵⁸Pita laih naikau usnit uiwi kiuna dai sumalyang nuhni ūni watak kat. Pasyakat kawi makat yulnin ūni maintalyang muihni balna karak yalahna kat sakdai, kidika dini kidika ais kat dahn kalwarangpa kidika talna atnin yulni.

⁵⁹Sumalyang balna taninatuna balna kidika dawak la tunan muihni balna kidika laih alas as wawalwa dai Jisas kidika īna atnin yulni,

⁶⁰kaunah sip yayakwas dai, muih mahni palni alas yulwi yulni yayakna dai karang bik. Witni kat baisa muih bu kalalahna dai,

⁶¹witingna laih lāih yakwi yuyulna dai: —Adika alni laih yulna dai: ‘Yang sipyang Papang ūni kidika daukalpamtik ma bas kat wattik dulautik yamna atnik.’

⁶²Bahang sumalyang nuhni kidika laih kasakni yaklauwi Jisas yakat kalyulwi dakana: —¿Birita nangnitnalatasmahn? ¿Adika ais dini kat man namangkauh yuyulwih?

⁶³Kaunah Jisas laih ap dana dai. Sumalyang nuhni kidika yaklau kalyulna: —Papang sangka kidika ayangni kau yaktik mayultayang di as rahm kidika yultah. Maiyultah rahm man kidika Papang Walanibis Mesías man kat.

⁶⁴Jisas yaklau nangnitlana: —Man lawa yultaman. Dawak yang lawik bik manayultayang muih al walanibis kidika laih parasni bitik duwa kidika tingnipal niningyakat yalahwi kisang mukus yakat kaiwak talnamaki.

⁶⁵Bahang sumalyang nuhni kidika laih kulnin daukalwi prakni kidika iswi bisna dai dawak aput yulna: —¡Adika alni yulni balna kidika laih Papang niningyakat dutni yulwi! ¿Mayang ais baisa witnis waldih? Manna dakanamana yulni dutni balna yulwa kidika;

⁶⁶¿ampat talamanah? Witingna yaklau nangnitlalana: —Witing laih pat muihni ki, bahang daunin karang ki.

⁶⁷Bahang muhni yakat susuihwas tuhwi dawak wiwisna dai. Uk balna kidika laih muhni yakat wiwisna dai,

⁶⁸aput yulwinah: —Man laih Mesías man kidika, ¡yultah wais mawisnayah!

⁶⁹Pita laih ahni watak yakat yalahna kat sakdai. Kidika minitni yakat di yamyang yal as witing yaihnit yakat kiwi kalyulna: —Man bik Galilea muihni Jisas kidika karak likman dai.

⁷⁰Kaunah Pita laih witingna bitik muhnina yakat aput yulwi talasyang atna dai: —Yang amanglatasyang ais yulni yultamanpa.

⁷¹Usnit kat dur kung yakat kiuna, kidika yakat yal uk kaltalwi uk balna yakat diyulna: —Kidika bik Jisas Nazaret kaupak kidika karak likdai.

⁷²Pita laih watwi pramis kalahwi talasyang atna dai: —¡Kidika alni laih yang amanglatasyang!

⁷³Usnit kat, kidika yakat bangdai kidika muihni balna Pita yaihnit yakat uiwi kalyuyulna: —Rahm palni man bik kidika balna kaupak as man. Yul bautaman kidika yakat bik laih ki.

⁷⁴Bahang witing laih la tuhwi pramis kalahna, aput yulwinah: —¡Yang amanglatasyang kidika alni kidika! Sihm kidika minitni yakat sakara yulna dai,

⁷⁵dawak kidika yakat Pita laih isning katna dai Jisas yaklau kalyulna dai yulni kidika: ‘Baisa sakara yulwas tanitkauh yakat, wat bas yatalasyang tima.’ Dawak Pita laih kidika kaupak kalahwi parasni palni kaidana dai.