Read Mayangna Matyu 28 Bible Online

Matyu 28 - Mayangna bible

Matyu 28

¹Yakurupdinin mani bayakna mani kat, sandi wisam ma tatuna kawa kidika yakat, Mery Makdalen dawak Mery uk kidika karak sau ū yakat talna uina dai.

²Sirihni palni sau isihna dai, kat Dawan innisal as yaklakwi sauū yaihnit yakat kiwi kipala taihna sakdai kidika dulauwi minit yakat yalahna dai kidika yulni.

³Insal kidika laih sihm alwana yaringni lapwa kapat dai, dawak prakni kidika laih sihm mukus pihni kapat dai.

⁴Kalbauyang muihni balna kidika laih talwi yamaduwi diyukna dai dawak sihm muih dadauna kapat kakalna dai.

⁵Insal balna kidika yaklau muih yayal balna yakat diyulna: —Manna yamaduduwinih. Yang nuyang manna laih Jisas pan prihni kau ilwi papana yakat waltamana kidika.

⁶Akat laih diski, kaunah watwi yaklauna, witing yaklau yulna dai kaput. Aiwa talnauh ahana dai pani kidika.

⁷Sirihni palni yawa disaipil balna yakat diyultanauh: ‘Watwi yaklau, dawak manna tamatna yakat kiwarang ki Galilea yakat; kidika yakat kaltalnama ki.’ Adika ki yang manayulnik dini dai kidika laih.

⁸Muih yayal balna kidika laih sirihni palni sau ū kaupak yamaduwinah dawak alasna karuk bik uina dai, dawak kiri uiwi yul kidika disaipil balna yakat diyuyulna dai.

⁹Kidika yakat Jisas laih muih yayal balna kidika muhnina yakat kalahwi diparasna dai. Muih yayal balna kidika laih Jisas yaihnit yakat uiwi kalni yakat wakaihwi ayangni tanit nuhni yayamna dai,

¹⁰dawak witing yaklau diyulna: —Manna yamaduduwinih. Yawa yang wirahki ahal balna yakat diyultanang kat Galilea yakat uiwang, bahang kidika yakat yatatalwarang.

¹¹Muih yayal balna kidika laih uiwa bangkat, kalbauyang muihni balna maintalwa bangdai kidika kaupak buas tawan nuhni yakat uiwi sumalyang balna taninatuna balna yakat diyuyulna dai ais kalahna dai kidika bitik.

¹²Kidika tunan muihni balna kidika laih muihbararak balna karak yul bauwi talna uina dai. Dawak kalbauyang muihni balna yakat laih lalah mahni palni diayana dai,

¹³yul yuyulna muihni balna yakat: —Manna laih pukta ama bangmana kat Jisas disainipil balna kidika aiwi Jisas muihni nuhni kidika mamalna tinama.

¹⁴Dawak adika dini kabamint muihni kidika dakawarang kat, yangna lawik kulnin laihtanaki ki, dawak manna yakat laih tamatna daktanaki ki.

¹⁵Kalbauyang muihni balna kidika laih lalah kidika duwi ais yamnin diyulna dai kat kaput yayamna dai. Dawak adika yulni kuduh warmani kat bik Ju muihni balna pasyakat awaihwa kidika.

¹⁶Kaput bahang, disaipil balna 11 kidika laih Galilea yakat uina dai, Jisas yaklau asang as kau uinin diyulna dai kidika yakat.

¹⁷Dawak Jisas yakat tatalna mani kat, ayangni tanit nuhni yayamna dai, buas balna kidika laih rahm kukulwas dai karang bik.

¹⁸Jisas laih witingna yaihnitna yakat kiwi aput diyulna: —Papang yaklau parasni yana kisang yakat dawak sau akat bik.

¹⁹Bahang yawa nesan muihni balna bitik yakat yang disikipulo balna diyamtanauh; Papang ayangni, Walanibis ayangni dawak Spirit Holi ayangni usnit kau bik was disitanauh,

²⁰dawak manna yakat yamnin manayulnayang kidika bitik witingna yakat disumaltanang kat dakawi kaput yayamwang. Yang nikingkauh laih, ma bitik yakat manna karak awaki ki, ma witni mani kat.