Read Mayangna Matyu 3 Bible Online

Matyu 3 - Mayangna bible

Matyu 3

¹Kidika mani balna yakat muih wassiyang alni Jan witing Judea kauhnimak walang yakat kiuna dai.

²Witing yulwi sumalwa balna yakat aput yulwa dai: “¡Manna Papang yakat kulnamna wirlatanauh, kat Papang king kawa sauni kidika[5] laih ulis dana!”

³Jan yulni kidika laih prapit Isaías yaklau ulna dai kidika ki: “Yulni as yulwi sarahwi kauhmak wanilang yakat: ‘Dawan tani kidika barangni yamtanauh; ta as barangni yamta kalatanauh.’ ”

⁴Jan prakni kidika laih kiamil butuni kau yamna dai, dawak banimak yakat libitwi sitwadai di unitak as karak; witing kasnin dini kidika laih sisin dawi amak karak kaswadai.

⁵Jerusalén muihni balna, Judá sauni muihni balna bitik dawak Jordán yaihnit kau muih balna kidika bitik kalahwi kaldakakawadai.

⁶Witingna dutnina balna kidika yayakwa kat Jan laih was disiwadai Jordán wasni yakat.

⁷Kaunah Jan talwakat parisi dawak saduceos muihni balna mahni palni was disina atnin uiwakat, aput diyulna: “¡Bil sulani balna! ¿Wais yaklau manayulnayah ira lawanama wah yamadangni kaiwa kidika kaupak?[6]

⁸Manna Dawan yakat wirlawanamana kidika laih awanauh yamtamana kidika,

⁹dawak manna alas kulnamna yakat kulta yuyulwinih: ‘Yangna laih Abraham sulaniyangna’; kat barangni manayultayang Papang laih adika kinipala balna kat bik Abraham sulani balna yamnin sip ki.

¹⁰Ki kidika laih pan balna kidika riknina kau daknin manah ridi lakna sak ki. Angdika panan minik yamni yakwas kidika laih, dakwi kuh pasyakat ruhmwi.

¹¹Yang laih rahm was kau was manasihtayang Papang yakat wirlawa aiwanamna yulni; kaunah yang uskit yakat kaiwa kidika laih Spirit Holi kau dawak kuh pau kau was manasiwarang ki. Witing laih baisa parasni ki yang karak dawakat, susni balna kat bik duyawinik sip awasyang.

¹²Witing subilni kidika tingni yakat duaiwi, dawak plawar minik kidika klin yamwi dibasta balna kidika kaupak dakyakwarang ki. Planiwar minik balna kidika punin pāni yakat dawarang ki, kaunah dibasta balna kidika laih piwas ban kaput atnin kuhnipau kidika kau buswarang ki.”

¹³Jisas laih Galilea kaupak Jordán wasni yakat kiuna dai, Jan sakdai kidika pāni yakat, Jan yaklau was kalsina atnin yulni.

¹⁴Tatuna yakat laih Jan yaklau yulwas dana dai, dawak aput kalyulna: —Yang laih takat man lawa was yasinamki, ¿dawak man laih yang akat aiwamahn?

¹⁵Jisas yaklau nangnitlana: —Waradika mahn kaput yamtah, bahang yamni karangki Papang yaklau yamnin yulna kaput laihdi yamdarang kat. Bahang Jan yaklau was kalsina dai.

¹⁶Jisas laih was kalsiwakat, was pa kaupak kilna dai. Sirihni palni kisang kidika apahna dai, dawak Jisas talna dai Papang Spirit kidika witing minit yakat kai'bukwakat sihm buhtuku kapat.

¹⁷Bahang kisang kaupak yulni as yulwakat dakana dai, aput yulna: “Adika ki yang walakibis dalani, waltik yaknayang kidika.”